Ta Công ty TNHH Ntuh kơl rdâk njêng ngih jay Thái Bình pah kan ta Quy Nhơn ntŭk leo kan bơi tât 30 bôk ndeh điện leo pâl nđaih ta Quy Nhơn, nău kan uănh nđôi, mât nkra geh ƀư tâm ndrih. Wa Hồ Thanh Khiết, Giám đốc ntŭk kan an gĭt, lĕ rngôch ndeh klư lĕ geh uănh năl na nê̆ gay ma ngăch geh saơ, ndâk nkra nău khuch, mât đăp mpăn tâm di ueh ê lor geh vơt năch. “Công ty lĕ geh njêng1 rmôt nkra ndeh êng đah ăp ntŭk nkra ndeh n’hanh lĕ rngôch oh nô. Rnôk ndeh khuch rĭ mbơh dâl gay ma công ty an rmôt nkra tât nkra tâm nar dâl. Lah geh nkra mô dơi an ndeh nĕ rlu kan n’hanh sŏk ndeh êng ndơn . Nău đăp mpăn bâh ndeh rĭ way geh uănh năl bâh nău ŭnh, kăp pre lah 2 nău khlăy ngăn tâm nău đăp mpăn ndeh”.

Ta ăp ntuk kan nchoăn rdeng têh nău ƀư tĭng uănh năl kĩ thuật ndeh điện lĕ geh ƀư tĭng răng dăng. Wa Lê Hùng Thịnh, Groi giám đốc ntŭk kan Công ty cổ phần Sun Taxi ta Bình Định an gĭt, nău uănh năl ndeh klư geh ƀư ăp nar n’hanh mât uănh ăp khay tĭng di nău ntrŭnh. “Tâm rnôk vơt rdeng năch ăp nar, rnôk oh nô tâm pleh kan, dơn ndeh rĭ lĕ geh ntŭk kan kĩ thuật ta ntŭk, ntŭk leo kan uănh năl ndeh klư. Đah nău mât uănh nkra ăp khay rĭ ndeh way geh nkra uănh kăp pre, ntŭk ƀĭt n’hanh ăp ndơ êng. Ntŭk kan nkra ndeh way kâp kan lĕ măng nar gay ma ngăch nkra khuch ndeh an mât đăp mpăn geh ndeh rdeng năch”.

Đah mpôl kan ƀĭt ndeh, nău mât đăp mpăn an năch way lah nău kan an lor bôk năp. Nô Phan Tấn Duy, du hê nuĭh ƀĭt ndeh điện pâl nđaih nkoch, ê lor geh hăn, nuĭh ƀĭt ndeh an geh uanh năl lĕ rngôch kĩ thuật n’hanh nkah bu năch ƀư tĭng nău way mât đăp mpăn. Nô Phan Tấn Duy an gĭt. “Ê lor  hao ndeh jur ndeh an geh uănh ŭnh đen,  jâng ndeh, lah mât đăp mpăn rĭ mơ an ndeh nchoăt. Tâm rnôk hăn rĭ an ngeh nkah bu năch văn rse kât săk, gŭ ueh ta ndeh tâm ban kơt rdeng âk ir nuĭh gay ma mât đăp mpăn trong hăn ndeh lah nău khlăy ngăn.

Aƀaơ, ta n’gor Gia Lai geh 3 doanh nghiệp pah kan rdeng năch ma ndeh điện đah lĕ rnoh 119 bôk ndeh. Bâh nău uănh năl bâh ntŭk kan têh, ăp doanh nghiệp lĕ geh an dŏng n’hanh ndeh klư an geh ueh nâp di nău ntrŭnh đăp mpăn kĩ thuật. Nău uănh njrăng lor, mât nkra ndeh mô dơn ntop mât đăp mpăn hăn nsong an năch ma hôm nha n’hao nău vơt năch, njêng nău ueh dăch bên, way kan an pâl nđaih ta nkuăl ƀon têh dak lêng Quy Nhơn tâm khay pâl nđaih tât tay.

Hoàng Qui / VOV Tây Nguyên

.