Lôch geh djăt ăp ntŭk kan bâh Radio nău ngơi Việt Nam mbơh tơih nău ngăch pah kan nchrăp an rơh tâm mâp tâm nđur ăp nuĭh ƀư ntoh ngơi lam dak tal 17, ntoh ngơi nglôch lôch rơh pah kan, Groi Tổng Giám đốc Radio nău ngơi Việt Nam Phạm Mạnh Hùng, kruanh rnâng kan leo kan tâm mâp tâm nđur ntoh ngơi lam dak knơm an lah, đah nău leo kan n’hanh nchrăp na nê̆, rơh tâm mâp tâm nđur ntoh ngơi lam dak rơh aơ mbra geh nău hun hao mhe an ntoh ngơi lam dak n’hanh ăp phóng viên, biên tập viên, kĩ thuật viên geh du nău nđơr hăn ndrel đah mpôl rnoi gay ma ƀư tĭng ăp nkô̆ hun hao bâh neh dak ta rơh mhe.

Ăp tác phẩm râng tâm rlong geh âk ntil bâh báo chí ntoh ngơi kơt ntoh ngơi sŏng dăng, phóng sự, phóng sự điều tra,m bôk nău ntoh ngơi khlăy, ntoh ngơi rno đê̆. Ngăn lah, rơh tâm rlong aơ rơh bôk năp, Radio nău ngơi Việt Nam râng tâm rlong ntil Podcast- du ntil nkô̆ nău ntoh ngơi dôl geh hun hao âk dăng tâm ntŭk kan rnoh mbrô, ƀư rơh rƀŭn nchră lam ntur neh n’hanh ntơm pơk đah bôk nău nghệ thuật “Nău nteh bâh rach năm mhe” geh ƀư ta Quảng trường 30/10, phường Hạ Long đah nău tât râng bâh âk nghệ sĩ, ca sĩ ntoh lư n’hanh rbăn mrưn nuĭh uănh.