Rơh mih dak bŭk dŭt khay 11/2025 ta n’gor Khánh Hòa lĕ ƀư khuch khat rlău 6.000 rmen prăk, ƀư 22 nuĭh khĭt, 20 nuĭh sôt rmanh n’hanh hang rhiăng rbăn rnăk ƀon lan geh khuch khat. Wa Nguyễn Hồng Trường, Giám đốc Đài khí thượng-Thủy văn Khánh Hòa, bôl mô hŏ rlău dak bŭk têh ta tu dak, yơn dĭ dak djôt dơn rnoh dak têh ngăn. Nkô̆ nău lah mih têh ntop tâm rnôk rgâl ntŭk ntô ƀư jêt trong dak hoch, n’hŭch dơi luh dak. Ntŭk ntô dak me n’glêh, yôk, dâng rđŭng jêt ƀư dak bŭk ngăch, rhoăt ngăch, yơn nău mâp nar lơ âk.

Mpôl hên dôl mbơh ƀư treh tĭng têl dak bŭk ta ăp nkual geh dak băm jru. Kơt jay gâp lah du ntŭk têl dak bŭk n’hanh ngih pah kan geh bơi 20 rnăk cán bộ, viên chức geh jay dak băm bah 1 tât bơi 2 mét, nĕ lah ăp têl dak bŭk. Tĭng nkô̆ nău nĕ, ntŭk kan ndâk ƀư rup treh dak bŭk, ƀư nkô̆ nău tâm ôp tâm nchră UBND n’gor ndâk ƀư dăp rgum, n’hao săk rnglăy trong kan njrăng trôk nar tâm năm tât.

Bah n’hêl na nê̆ mbơh trong kan rdâng đah rơh mih dak lip dŭt năm e, Thiếu tướng Nguyễn Túy, Chi huy trưởng N’gâng kan ntĭm rđău Tahen n’gor Khánh Hòa, ntĭm ăp nău mô hŏ dơi an mkra: nău gĭt ntŭk ntô mô hŏ rjăp, nău tâm rgop đah ăp rmôt hôm e wĭ wĕ, trong way ƀư “4 ta ntŭk” mô hŏ mât ngăch, n’hanh nău mbơh tâm ôp rhŏ an ntĭm rđău geh ntŭk tăch proăt. Thiếu tướng Nguyễn Túy đă an ƀư rup treh dak bŭk dâl gay dơi nchrăp kơp uănh nkual ƀon lan gŭ, trơn ƀon lan luh nkual klach; nchrăp lor ndeh rklư, ndoh ndơ; n’hao tiăr nti n’hanh n’hao dơi tâm rgop đah ăp rmôt kan.

Ban ntĭm rđău Njrăng rdâng ƀon lan n’gor ntĭm rđău ăp ntŭk, ntŭk kan uănh nđôi tay, kơp uănh nkual ƀon lan gŭ, ntŭk ngih pah kan, ntŭk kan, ntŭk gŭ; nsrôih trơn, du trơn ƀon lan, ndeh rklư, drăp ndơ luh nkual phit klach. Nkre, tâm ôp tâm nchră UBND n’gor ndâk ƀư ăp nău nchrăp ƀư hun hao wăng sa-rêh jêng geh nău tâm rgop đah ƀon lan, nchrăp rhŏ an trong kan njrăng n’gang trôk nar lơh n’hanh joi kơl nău rmanh.

Wa Trần Phong, Kruanh UBND n’gor Khánh Hòa an lah, an uănh dơn trong kan njrăng n’gang trrôk nar lơh tĭng trong gĭt tât nchrăp lor, jŏ jong. Ndrel đah njrăng n’gang trôk nar lơh, n’hao dơi ntĭm rđău, ƀĭt joet n’hanh ntrôl dăng kơt dŏng khoa học-công nghệ uănh nđôi, nchroh mbơh, mbơh tơih trôk nar.

Ndăn kơp uănh, ƀĭt joet, lôch jêh trong nchrăp njrăng n’gang trôk nar lvang 2026-2030; uănh joi tŏng ăp trong rdâng tĭng gưl nău mâp, êp đah ntŭk tĭng nkual, tĭng ƀon lan. Nkre, n’hao uĕh trong kan ntĭm rđău, ƀĭt joet; ntrôl dăng rgâl mrô, kơt dŏng khoa học-công nghệ tâm uănh nđôi, mbơh tơih n’hanh ntĭm rđău tât bah dâng.

N’hêl na nê̆ ta Khánh Hòa an saơ, tâm rnôk rgâl trôk nar, mih sial mô hôm geh nu nău tĭng nău way ơm. Rnôk ăp rnoh đăp mpăn na nao geh phah chrai, ri samƀŭt sam groi nđôi, dơi nchroh mbơh n’hanh nău nchrăp rdâng lah nkô̆ nău tơm ntrŭnh an. Ăp nău mâp lor bah mih dak bŭk, lah dơi rhoăt nău blău ơm rjăp, mbra lah n’gâng tơm an ăp ntŭk nchrăp lor bah năp trôk nar, n’hŭch khuch khat n’hanh đăp mpăn an nuĭh ƀon lan./.