Du rut nău nchih: Pâl nđaih Dak Lak joi trong hăn đăt ndal tâm ntŭk mhe

Nău nchih bôk năp pơk tĭng trong link dja: https://cms-vov4.vov.vn/mnong/nkoch-nau-ueh-blau-tam-nau-reh-van-hoa/pal-ndaih-dak-lak-jeh-ap-njar-trong-mo-ueh-518091.vov4

Bơi 15 năm kơp ntơm bah nar dơn trong nchrăp ntuh kơl, tât kêng dŭt năm 2025, Trong nchrăp pâl nđaih rlu rlău gưl têh Cù Lao Mái Nhà ta xã Ô Loan, n’gor Dak Lak mhe ntơm rdâk ƀư. Trong nchrăp geh rnoh hvi rlău 200ha, đah lĕ rngôch tơm prăk ntuh kơl 5.000 rmen prăk, dơi dăp rgum lah nkual pâl nđaih rlu rlău meng dak lêng uĕh khlay đah âk rnoh uĕh di 6 sao. Tâm ban kơt âk nuĭh ƀon lan meng dak lêng Dak Lak, wa Võ Văn Ngầu, ta xã Ô Loan mpŏng aơ mbra lah trong rlay kah săk geh pâl nđaih dak lêng bah n’gor.

“Kônh wa kâp dŭt jŏ hôm. Lah trong nchrăp an ƀư uĕh ri ntŭk dja mbra jêng ntŭk chrat ang bah n’gor”.

Bol ntơm rdâk ƀư khuh n’gôr đah âk nău ton, yơn lôch bơi n’gul năm ƀư, ntŭk nchrăp ƀư 5.000 rmen prăk dơn lôch jêh 40 rmen prăk dơm. Aơ lah nô nău nsum ta âk trong nchrăp kan têh ta Dak Lak. Tĭng nchih rgum, lam n’gor geh 39 ntŭk nchrăp ƀư pâl nđaih dơi an siƀŭt ntuh kơl, tâm nê geh tât 28 trong nchrăp đah lĕ rngôch rlău 16.850 rmen prăk dôl mâp jêr jŏt, wăk kol ntoch jong.

Gay ntrôl ngăch ƀư ăp trong nchrăp kan rgum tơm, n’gor Dak Lak hŏ njêng ăp rmôt pah kan nkoch trêng nkra ăp kô̆ nău wăk kol, pơk luh rơh kan 30 nar măng droh rklaih wăk kol đă ntrơn du”. Âk rmôt pah kan jŭr na nê̆ tât tâm dâng gay nkra ăp nău nchiăng khan, ntrôl ngăch ƀư.

Tĭng wa Đào Mỹ, Groi Kruanh UBND n’gor Dak Lak, nău nkra dŭt bah ăp ntŭk nchrăp kan mbrơi mô dơn gay der bah mpŭng lir tơm neh ntu, ma hôm nta trong dơh jêng ăp suan ntrôl hun hao mhe an pâl nđaih ta n’gor.

“Mpôl hên mĭn tât nău joi ăp nuĭh ntuh kơl ngăn. Mbra geh nău ơh na nê̆ an tĭng trong nchrăp kan. Geh ăp nuĭh ntuh kơl mô an ƀư ri mpôl hên mbra geh ăp trong nkra tĭng di nău way, gay nta trong dơh an ăp săk geh bah n’gor ân mât dŏng lĕ, ân ntik n’hao dơi, lơn lah ăp trong nchrăp kan geh ăp ntŭk khlay ƀư khlay”.

 Ndrel đah wăch rgum ntuh kơl, droh rklaih ăp kô̆ yơn kol khan, ntrŭt ntrôl rnoh ngăch ƀư ăp ntŭk nchrăp pâl nđaih têh, Dak Lak dôl dăp rgum tay nkrum lam gay n’gâng kan pâl nđaih geh ntŭk soih hvi mhe lôch n’glăp nsum. Wa Trần Hồng Tiến, Giám đốc Sở Văn hóa, Thể thao n’hanh Pâl nđaih an gĭt, n’gor hŏ ntơm mpơl saơ dơi săk ntơr pâl nđaih ma Lễ hội cà phê, Lễ hội sầu riêng nkre đah suan dăng tuch tăm; lễ hội ka ngừ đại dương, lễ hội ôp brah ka nkre đah văn hoá dak lêng. Dak Lak hŏ ƀư njêng dơi âk ƀon pâl nđaih nsum mpôl nkre đah ntŭk tŭr goh chĭng gong Tây Nguyên.

Let năp tay, Dak Lak mbra ntik n’hao dơi ang ngo đah nkual duyên hải mpeh luh nar n’hanh dor  yôk mpeh nhâp Nar gay njêng luh ndơ geh ƀư tâm di đah tĭng rmôt năch. 

“Mpôl hên ntrŏng mbra ƀư ăp jêr jŏt jêng dơh uĕh gay hun hao pâl nđaih. Nkual mpeh nhâp nar sŏk văn hóa chĭng gong, cà phê ƀư ntŭk rgum tơm. Nkual mpeh luh nar hun hao pâl nđaih rlu rlău, mât dŏng ntŭk gŭ rêh bri dak hôm uĕh kơt ơm gay wăch rgum năch. Mpôl hên mô ƀư mbrach lêng ma sơch tĭng mbor năch tâm di”.

Lôch du năm pơk hvi ntŭk “bri – dak lêng”, Dak Lak dôl geh ăp trong nkra bôk năp mpeh rnoh têh hvi n’hanh tâng jru rlong uănh saơ pâl nđaih. Âk ntŭk nchrăp ƀư rlu rlău têh dơi ntrŭt ntrôl; ăp kô̆ yơn kol khan ntuh kơl dơi mĭn uănh droh rklaih; buăt nthoi geh nău mpơl uĕh.

Cao tốc Khánh Hoà - Buôn Ma Thuột hŏ bơi mbluh soih; ăp kuel dak lêng dŭt uĕh bah n’gor dơi n’glăp tâm săk nchih wăch rgum ntuh kơl... Tâm ƀah đah bri dak têh hvi n’hanh dak lêng dôl dơi rhuăt glêh, du ndru wăr pâl nđaih têh khlay dah lam ntŭr neh n’hanh săk ntơr êng bah Dak Lak dôl mbrơi jêng luh./.