Rơh rlau aơ, nau tâm boh chính trị, nchră nau lŏ hun hao ueh, nar lơn ma tâm rngăp ndrel tâm rnơm. Bar ding nsôih tâm nchră rmôt kan, tâm mâp gưl prêh ndrel ăp gưl, rgop nau rƀŏng tât nau rgum tâm boh 2 dak. Tâm boh neh dak, rnă njrăng đah bar dak lŏ geh n’hao năp rnoh geh ndrel nau nâp. Bar ding nsôih ƀư nau nchrăp, nau tâm boh, tâm rgop mât nau tăch luh, rvăt lăp, lơh rgot phung tih dôih rloh rlau neh dak.

            Tâm boh văng sa, tăch rgâl ndrel ntuh kơl đah 2 dak lŏ geh âk nau mhe. Gay pơk trong nơih ân ntŭk kan tăch rgâl ndrel ƀon lan 2 dak, bar ding kí kol nau nkah tât hun hap ndrel nthoi gung trong tăch rgâl bar nkuăl n’har bri Việt Nam-Lào, nau tâm boh tăch rgâl Việt Nam-Lào; ntrŭnh ƀư săk tam nau tăch rgâl bah bar dak Việt Nam-Lào. Rnơm ăp nau nsôih tă bah 2 ding, nau geh tăch rgâl bar ding năm 2024 nkah ăp nau rlet 2,2 rmen đôla, hao 34% rđil năm 2023.

            Ntĭm nti ndrel nau ueh ơm hôm lah nau tâm boh ueh geh bar ding uănh khlay. Rnôk aơ geh rlau 14 rbăn kon se nti bah Lào nti tâm Việt Nam. Bar ding ƀư ngăn Bôk nau kan tâm boh ntĭm nti Việt Nam-Lào lvang năm 2021-2030 ndrel nau ntrŭnh tât nau tâm boh ntĭm nti Việt Nam-Lào. Êp nê, bar ding nsôih ƀư nau kan tâm boh nau ơm-njroh mprơ ndrel pâl n’aih. Việt Nam kơl an Lào ndâk nau kan hun hao thể thao Lào lvang năm 2023-2030.

            Nau tâm boh đah ăp nkuăl, ngăn lah nkuăl geh nsum trong n’har, lŏ n’hao nar lơn ma lăp tâm nau jru, ăp ntil, rgop nau mât đăp mpăn tâm nkuăl n’har bri bar dak. Ăp nau tă geh bah Năm tâm rnglăp tâm boh Việt Nam-Lào 2022 kŏ kơt lah nau tâm n’ur đah ăp năm rlau aơ rgop nau n’hao nau tâm git rbăng nsum ndrel ƀư nâp nau tâm boh đah ƀon lan bar dak.

            Tâm nau tâm boh âk ding, bar ding tâm rgop ngăn, tâm kơl tâm nau tâm nchră tâm nkuăl ndrel lam ntur neh, ngăn lah tâm nau tâm boh ăp neh dak Đông Nam Á (ASEAN), Liên hợp quốc ndrel ăp nau kan bah nkuăl.

            Bar ding ƀư dơi rơh rƀŭn tal 46 bah Uỷ ban bar ding mpeh nau tâm boh bar dak Việt Nam-Lào ndrel nau tâm mâp gưl prêh đah Đảng Cộng sản Việt Nam ndrel Đảng ƀon lan Cách mạng Lào. Tâm nau nchră ƀư nau tă dơi geh, 2 ding tâm ban ăp nau rƀŏng tâm boh kan têh tâm rơh tât.

            Nau tâm boh kan nsum khlay Việt Nam-Lào dôl geh bun dăp tâm nau tă geh dơi yor nau geh nsum bah bar neh dak, đah nuih n’hâm lam ntur neh ueh ang, leo nau tâm bh 2 dak ăp nhoat rlet nau jêr, nkol.        

            Việt Nam ndrel Lào mra lŏ nsôih n’hao lơn ndrel ƀư jru nâp lơn nau tâm boh bar dak, tâm rnglăp ueh khlay, ngăn lah tâm boh ăp ntil, yor nau geh dơi ngăn bah ƀon lan bar dak, yor đăp mpăn, tâm boh ndrel hun hao tâm nkuăl ndrel lam ntur neh./.