Tĭng nău mbơh, ntơm bah bôk năm tât aƀaơ, Dak Lak năl geh bơi 4.200 nuĭh ntưp ji luh mham rih, hao bơi 40% rđĭl đah ndrel khay dja năm 2025. Dŭt njrăng uănh khlay, n’gor hŏ năl geh nuĭh khĭt lor bôk năp tă bah ji luh mham rih tâm năm aơ phường Tân An.

Nău dŭt rvê lah ta rơh bôk năp, mpơl ji luh mham rih tâm ban kơt ăp nău ji kop ngăn. Kon se mbra mô dơn kop duh, r’ah rgănh lam săk, ât sông sa, ƀư me bơ̆ dơh uănh lhơ. Yơn lah, lor rnôk lăp tâm rơh klach rvê, nău ji mbra rgâl jêng jru dŭt ngăch, ntoh mănh gŭr mô lah săk jăn djôr lêt. Bác sĩ CKII Đặng Việt Nam, Khoa Nhi Tổng hợp, Nhih dak si nkual Tây Nguyên, njrăng đă:

“Ăp nuĭh ntưp lah ăp kon se ơm geh nău ji tâm săk mô lah dôl ntưp ăp nău ji jŏ bah ri ân njrăng uănh tĭng groi nđôi n’hanh mât chăm, mô dơn nê ân lăp nhih dak si ơm lơn rlău nuĭh êng. Ntĭt kơt kon se n’glên lay, kon se ntưp ăp nău ji jŏ bah kơt nău ji leh dôl ngêt ăp ntil dak si chŏl bah nău ji… Aơ lah ăp nuĭh geh suan chŏl đêt jêng rnôk geh ntưp ji mbra dơh jêng rgâl ji jru. Mô lah ăp kon se brêt rgay, lơn lah ăp kon se djôr rgay săk, kon se geh ji rhiăn, ji play nuih ơm bah ndŭl me… Lah but săm năl saơ ntưp nău ji luh mham rih ri ân lăp nhih dak si săm ơm”.

Bah năp nău tât ji luh mham rih ntoh âk, UBND n’gor Dak Lak hŏ đă ăp n’gâng kan n’hanh ăp ntŭk tâm dâng lor an ƀư ăp trong njrăng n’gang, mô an nuh srê ntoh luh, rêng lam hvi n’hanh ntoch jong.

Sở Y tế dơi jao ƀư bôk buăt nthoi groi nđôi grêt dăch nô nău, n’hao dăng groi nđôi, nkah njrăng lor geh ma nău ntưp; rđău đă Ntŭk rgum Mât kân kop ji n’gor kan nsum đah ăp ntŭk tâm dâng nkra lơh bah lĕ tơm nuh srê, nkhĭt tăp măch, rhai dak n’hanh puh dak si nkhĭt măch ta ăp nkual geh ma nău ntưp âk. Ăp ntŭk but, săm ji lor nchrăp nuĭh kan, dak si, ndơ dŏng, nsưng bĭch ji, n’hao nău dơi tam săm, bah ir jêng geh nău ji jru n’hanh khĭt.

Ndrel đah n’gâng kan dak si, ăp ntŭk kan, n’gâng kan, nsum mpôl n’hanh n’gâng kan tâm dâng ân n’hao âk nkoch trêng, rgŏ jă nuĭh ƀon lan mât kloh uĕh ntŭk gŭ rêh, jăng rchŏk dak mih ngâr, nkhĭt rhai dak, tăp măch dŭt đêt du pơh du tơ̆ ta nhih pah kan, nhih nti, ntŭk ƀư njêng, tăch rgâl n’hanh nkual ƀon lan gŭ.

Ăp xã, phường dơn na nê̆ pah kan njrăng, n’gang nuh srê ta ntŭk he; ra uănh tay nkual geh ma nău ntưp âk, nkra lơh bah ngăch tơm nuh srê, n’hanh rgum ăp mpôl kan ndrel râng ƀư.

ji luh mham rih mô di ăp rnôk ntơm ma du nău mpơl kloh rvah đŏng ôh. Yor kơt nê̆, bah meng nău lăp kan bah n’gâng kan dơi kan, nău nuĭh ƀon lan lơh bah ntŭk măch deh tăp, njrăng der măch kăp n’hanh njŭn kon se hăn but săm ơm rnôk geh nău mpơl ndal lah trong ƀư ngăn ngăn gay nking nchăng bah jêng rgâl ji jru n’hanh bah ir geh ma nău ntưp rêng lam hvi.