Tâm bah ri aơ nơh, n’gor Quảng Nam uănh khlay ntop kơl ntĭm nti nău kan, nta joi nău kan, ntrŭt đă nuĭh rnoi mpôl đê̆ n’hanh mpeh yôk yang râng luh hăn kan dak bah dih geh nău dơi âk. Lôch nê, kơl nuĭh kan n’hao geh nău rêh đăp mpăn.

 5 năm bah năp nơh, nô Phan Hữu Trung ta thôn ĐhaMi, xã Ba, nkuâl mpeh yôk yang Đông Giang, n’gor Quảng Nam mpeh rnăk jêr jŏt, mô geh nău kan đăp mpăn. Lôch geh bôk  nău kan hăn luh kan dak bah dih, nô Phan Hữu Trung dơi n’gâng kan ta ntŭk ntop kơl ƀư siƀŭt manh 200 rkeh prăk bah Ngân hàng Chính sách xã hội gay hăn luh kan dak bah dih. Lôch 3 năm kan ta Nhật Bản, nô rƀŭn rgum geh đê̆ đă tơm prăk. Rlău ma prăk rgum geh, nău hăr blău ti kan nô Phan Hữu Trung dơi n’hao geh. Geh tơm prăk, nô Phan Hữu Trung plơ̆ gĭt ƀon tơm ntuh kơl rvăt ndeh nchuăn rdeng ndơ, geh tơm wăng sa  mbơm ôi. Nô Phan Hữu Trung an gĭt:

“Ntơm nơh rnăk gâp jêr jŏt nơm đă n’gâng kan ta ntŭk rgŏ jă n’hanh uănh khlay ntuh kơl  hăn luh kan ta dak  Nhật Bản. ăp khay gâp nsĭt geh 32 rkeh prăk/ khay. Aƀaơ nău rêh mô hôm jêr jŏt kơt ntơm nơh đŏng ôh. Aƀaơ n’gâng kan ta ntŭk geh âk băl mpôl hăn luh kan âk”

Tĭng ƀư trong nchrăp kan 3 “Hun hao ntĭm nti nău kan n’hanh nta joi nău kan an nuĭh rnoi mpôl đê̆ n’hanh mpeh yôk yang”, nkuâl Đông Giang dơi ntop kơl rlău 3 rmen prăk. Nkuâl dja hŏ uănh khlay leo nuĭh luh kan dak bah dih. Tĭng nê, nuĭh kan dơi ntop kơl prăk ntĭm nti nău kan, nti nău ngơi dak bah dih, but săm n’hâm suan n’hanh ăp siƀŭt luh lăp, dơi ntop kơl manh tơm prăk ma Ngân hàng Chính sách xã hội. Râng luh kan dak bah dih, nuĭh rnoi mpôl đê̆ mô dơn nsĭt nău geh wăng sa âk, klaih rlău ach o ngăch ma hôm dơi kơt nti nău gĭt blău, hăr ngăch gay plơ̆ sĭt ƀon tơm njêng nău kan.

Ntơm bah năm 2022 tât aƀaơ, nkuâl Đông Giang hŏ njŭn leo 150 nuĭh luh kan dak bah dih. Wa Đỗ Hữu Tùng, Groi Kruanh UBND nkuâl Đông Giang, n’gor Quảng Nam an gĭt, lam nkuâl Đông Giang geh 15.000 nuĭh di  năm  kan yơn rnoh nuĭh luh kan dak bah dih mô hŏ âk:

“Trong nchrăp  mpeh hun hao ntĭm  nti nău kan n’hanh nta  joi nău kan an nuĭh kan nkual rnoi mpôl đê̆ n’hanh mpeh yôk yang” mpeh bôk  nău kan hun hao wăng sa- rêh jêng kon nuĭh gưl neh dak mpeh nkual rnoi mpôl đê̆ n’hanh yôk yang, gâp mĭn  aơ lah trong nchrăp kan dŭt geh nkô̆ khlay ngăn ngăn. Kônh wa gĭt kloh mpeh nău luh hăn kan dak bah dih nsĭt geh wăng sa, đăp mpăn nău rêh. Aơ lah nău dŭt di ma rhơn. Let năp tay, nkuâl Đông Giang ntrôl ngăch mbơh nti, leo ƀư ntŭk ndranh mbơh joi nău kan gay ăp ntŭk tâm dak n’hanh dak bah dih tât dơi mpeh ntŭk luh hăn kan dak bah dih”

Tâm bah ri  aơ nơh, ăp nkuâl mpeh yôk yang n’gor Quảng Nam hŏ nkoch trêng n’hanh leo ƀư âk jrô ntĭm nti nău kan  n’hanh ntop kơl nuĭh luh kan dak bah dih. Ntơm bah năm  2022 tât aƀaơ, n’gor Quảng Nam njŭn leo 4 rbăn nuĭh luh kan dak bah dih, lơn âk hăn luh kan ta dak Hàn Quốc, Nhật Bản, Lào, Đài Loan. Gay ntop kơl nuĭh kan hăn pah kan geh lĕ năm gŭ ta dak bah dih, ăp n’gâng kan dơi kan n’gor Quảng Nam hŏ ƀư âk ntŭk ndranh mbơh joi nău kan, ra uănh tay nău ŭch geh ntŭk kan gay  mbơh nti, rƀŏng trong kan nuĭh kan.  

N’gor Quảng Nam ntrŏng luh kan dak bah dih lah ngoăy tâm ăp trong nkra ƀư ngăn ngăn tâm nău nta joi nău kan, n’hao nău geh wăng sa. Yor kơt nê̆, ăp năm, ăp n’gâng kan, ăp nkuâl n’hao dăng nkoch trêng,  đăm gĭt jru trong nchrăp, trong kơl bah Ngih dak mpeh luh kan dak bah dih. N’gor dja hŏ rdâk njêng trong nchrăp ra uănh tay, nchih rgum rnoh nuĭh hŏ tât di năm kan, joi gĭt nău mpŏng, nău ŭch hăn luh kan dak bah dih. Nsing ta nê, lor nchrăp kan nsum đah ăp doanh nghiệp luh kan dak bah dih, ƀư njŭn leo nuĭh luh kan dak bah dih tâm di đah nău gĭt blău bah nuĭh kan. Wa Nguyễn Qui Quý, Groi Giám đốc Sở Lao động, Thương binh n’hanh Xã hội n’gor Quảng Nam an gĭt:

“Mpeh nău njŭn leo nuĭh hăn kan dak bah dih, tâm bah ri  aơ nơh dơi kruanh rđău kan n’gor Quảng Nam dŭt uănh khlay. aơ lah nău dơn kan khlay tâm pah kan n’hŭch ach o jŏ jong tâm  ban kơt nsan hao ƀư geh ndrŏng an ăp rnăk, lơn lah ta ăp nkuâl mpeh yôk yang. Nău njŭn leo nuĭh hăn pah kan dak bah dih tĭng nău tâm ton geh âk nău rgâl uĕh n’hanh geh nău ring lam, rnoh âk nuĭh hăn pah kan dak bah dih nar lơn ma hao, nău rêh bah khân păng n’hanh rnăk wâl dơi rgâl geh dŭt âk, nkre rgâl dơi nău kan n’hanh pơk hvi nău kan ƀư njêng".

 He mbra dơi lah, ma pah kan njŭn leo nuĭh luh kan dak bah dih tĭng nău tâm ton hŏ nta trong dơh an nuĭh kan ta n’gor Quảng Nam n’hao nău geh wăng sa, đăp mpăn nău rêh, rgop n’hao săk blău tơm nuĭh kan, n’hŭch ach o ngăch, nâp dăng.