Bah 20 năm, ntơm bah ăp nau nkoch nau mhe, bôk nau rgum nkoch nau mhe ân tât nau mprơ, nau Bunong jêng nau mơng ngăn tâm nau rêh bah âk rnăk vâl. Nê lah nau nkoch tât yan tuch tăm, n’hâm soan; lah ăp nau nkoch geh nkre tâm ƀon lan; lah ăp nau ntrŭnh geh nkoch ma nau me deh, tâm dăch ndrel nơih gĭt.

            Gay ăp nau nê tât ma băl djăt ân du trong ueh, ba kơi nê lah ăp nau nkhah njrăng êng tâm rplay, tâm nau mbơh ngơi. Yuh H’Thi Rơya, nŭih răk blang nau ngơi Bunong VOV Tây Nguyên, nkoch:

            “Nau ueh ngăn lah phung hên deh ndrel têh tă bah ƀon lan rnoi Bunong, gĭt nau me deh, nau vay ơm ndrel nau rêh jêng bah kônh wa ƀon lan nơm ri ma nơih geh nau tâm dăch dơh rnôk nơm hăn pah kan tâm ƀon lan. Yơn lah nau jêr ngăn nê lah nau nơm rblăng. Mô di lah ăp rplay nau ngơi Yuăn kŏ geh tâm ban ma rplay ngơi nau Bunong ôh. Ndrel ma, nŭih rblang ân geh săch du trong nơih gĭt, tâm dăch, geh rnôk ri manh rplay ngơi gay nkoch tĭng nau gĭt gay kônh wa tâm ăp ƀon lan geh dơi gĭt, nê lah nau kan ŭch geh âk nau blau, nau dơi ndrel nau gĭt bah nau ngơi”.

Ăp nau nsôih mô rlu bah ăp nŭih răk, rblang nau ngơi Bunong hŏ leo nau ngơi bah rnoi nơm tât đah ăp rnăk vâl tâm ăp ƀon. Tâm nklang bri duh nar tâm ƀon Bu Bong, xã Đức An, n’gor Lâm Đồng, rnôk dôl bĭch nchah njoal êp ngih, wa Thị Hel nkre uănh sau, nkre pơk điện thoại gay ma djăt Bôk nau ntuh ngơi Bunong bah Radio. Đah wa, ăp nau ngơi tâm nê nkre tâm dăch dơh, nkre lah nơih gĭt ndrel nơih ƀư tâm rnăk vâl:

            “Rnăk gâp vay djăt Đài ngăn. Geh rnôk ri bôk nau ntuh nkoch ngăn nau tât 5 nŭih kon se geh rmok dak, jêh ri ăp nŭih ngơi nau bunong hôm nkoch nkah lah yan mih ri ân geh mât njrăng kon sa nơm, mô ân păng dah ma hăn ŭm tâm dak. Gâp saơ ăp nau nkah kơt nê ri ueh ngăn. Kon bu ur gâp ri ƀư Facebok ân gâp, rnôk mông ru ri gâp uănh ndrel saơ nau Bunong bah Radio Việt Nam, geh nkoch nđơn, geh mprơ nau nơm, geh video ndrel nau mprơ bah ăp nŭih ma gâp gĭt năl đŏng. Gâp uănh ri gâp ŭch ngăn”.

            Đah yuh Thị Nia (tâm ƀon Tu Suay, xã Đức An, n’gor Lâm Đồng), bôk nau ntuh ngơi nau Bunong kơt lah “du ndrôm săm ƀŭt nchih ty” ngăn. Yuh djăt nau nkoch mât chăm n’hâm soan, nau ma njrăng rdâng ma srê ji kop sâr, ji rtoh trong mham, tât ăp nau ntĭm nti “moh kon ntil tăm, moh kon ntil rong” gay ma ƀư tĭng tâm nau kan. Radio kon jê̆ nê jêng băl tâm dăch ngăn, leo tĭng ăp nau nkoch mbơh ueh, nau mprơ m’ak tâm nau rêh ăp nar. Yuh Thị Nia, nkoch:

            ‘Gâp djăt Đài âk ngăn. Hăn tâm mir ri điện thoại geh rnôk păng mô geh mạng ri ma gâp ndjôt leo n’ăp ma Radio kon jê̆. Geh ntŭk sóng mô lăng dăng, gâp têk n’hao angten ân prêh, jêh ri gât ngăn tâm n’gĭng si prêh ri mơ dơi geh djăt. Nkre pâk neh, nkre jik pih nkra djăt Đài kŏ ueh đŏng, sĭt tâm ngih ri gâp djăt ndrel uănh bah Facebok đŏng, Gâp saơ trang Facebok Bunong ueh ngăn. Geh Video mpeh nau mprơ Bunong ueh ngăn. Ăp Video nê mpeh nau ngơi Bunong tâm trang Facebok nê ri gâp like ƀa ƀơ. Gâp uănh uănh oh H’Thi nkoch nđơn đŏng âk. Knŭng ndjôt điện thoại lah geh uănh nkra, ăp rnôk nơm ru ri kŏ dơi geh pơk tay gay ma uănh đŏng”.

            Geh nŭih djăt bôk nau ntuh ngơi gay ma njrăng nau ji, nau kan tuch tăm; geh nŭih ri gâp djăt du nau mprơ, du nau nkoch nđơn; geh nŭih uănh djăt gay ma blau nau ngơi rnoi nơm đŏng. Nŭih ƀư nau ngơi Bunong VOV Tây Nguyên lăp mro tâm nau rêh. Yuh H’Juel Sinur (nŭih răk rlang nau ngơui Bunong, Báo Phát thanh-Truyền hình n’gor Lâm Đồng), nkoch:

            “Jêh lôch du nar pah kan, gâp ŭch pơk djăt Bôk nau ngơi rnoi Bunong bah Rdaio Việt Nam gay djăt nau mprơ, nkoch nđơn. Âk rnôk hăn pah kan tâm ƀon lan, kônh wa vay ôp gâu: “Đah ntŭk khân ay pah kan mô geh nkoch nđơn, mprơ nau kơt lah VOV ôh êh, đah nê ri bu nkoch âk ueh ngăn êh” Ri ma tĭng gâp, nê lah nau geh dăng dơi ngăn bah rmôt nŭih ƀư nau ntoh ngơi rnoi Bunong VOV Tây Nguyên, yor mô êng pă nkoch mbơh ăp nau geh tât ăp nar ma hôm rgop nau mât ăp nau mprơ, nau nkoch nđơn ndrel ăp nau ơm ueh bah rnoi nơm tâm ntŭk nkoch mbơh đŏng”.

            Lah bah năp nơh kônh wa kâp tât tâm di mông gay ma djăt Radio, ri rnôk aơ, knŭng đah du mlâm điện thoại dơm, nau ngơi rnoi Bunong mro geh tăng tâm ăp rnôk, ăp ntŭk.

            Chuyên trang Website VOV M’nông ndrel Fanpage “Nau Bunong VOV Tây Nguyên” lĕ mơng đah kônh wa. Tâm ăp pơh, Website rgum rlau 70 rbăn nŭih lăp uănh; Fanpage geh rlau 6000 nŭih tĭng uănh. Âk nau nchih, Video nơih geh âk rbăn nŭih bu uănh. Ăp rnoh mrô nê ân saơ: Nau mơng lĕ geh nau rgâl, yơn nau ŭch geh djăt nau me deh ri hôm nâm ơm. Yuh H’Juel Sinur (Nŭih rblang nau ngơi Bunong, Báo Phát thanh-Truyền hình n’gor Lâm Đồng), nkoch:

            ‘Gâp ŭch ngăn ma nau ƀư kan bah VOV Tây Nguyên. Mô êng ntoh nau ngơi mô lah nkoch ndah Video, nau mbơh tâm mạng xã hội, ăp nô, yuh hôm ndâk trang website đah nau nchih rnoi Bunong. Nau kan aơ geh nau khlay gay mât nau nchih bah rnoi mpôl. Kônh wa ndrel ngăn lah băl mom nkre djăt, nkre răk, ndơn saơ rplay săm ƀŭt ndrel nti nau ngơi Bunong du trong ueh ngăn”.

            Gay njêng nau ntrơn rgâl tâm trong kan mrô, leo nau ngơi, nau nchih, ăp rup ơm yau bah rnoi Bunong tâm Internet du trong ueh ngăn, tâm dăch ngăn, lah nau kan nsôih kơt tĭng nti ndrel nsôih blau bah ăp nŭih rlang nau ngơi rnoi Bunong bah Radio Việt Nam. Nŭih rblang răk nau ngơi Y Sưng Phêja, mkoch:

            “Bôk năp, rnôk ntrơn jêng ƀư báo âk ntil, ri ma nau kan kơt tĭng nti nau kan mhe đah ma phung hên ri mô geh nau nơih ôh. Yơn rnơm nau rgâl nê lŏ leo tât âk nau ueh lơn, kơl an bôk nau ngơi rnoi Bunong tât êp lơn ma băl djăt Radio. Gâp ŭch njêng nau kan tĭng ntrong ƀư mhe aơ, yor nơm mô knŭng nkoch mbơh nau bah ntrong ntoh nau ngơi ma hôm dơi ƀư rêng tay nau Bunong nơm ndrel nau ơm yay rnoi Bunong nơm tâm trong kan mrô tât âk nŭih lơn, ngăn lah rơh mom. Đah săk gâp, aơ nkra lah nau jêr kŏ lah nau ân gâp nsôih gay ăp nar kơt tĭng nti ndrel ƀư mhe săk nơm”.

            Mplơng tay ăp nau nsôih ƀư kan nê lah nau ŭch rŏng bah băl djăt Radio njoalư tât bah ăp nau nkoch mbơh tâm Fanpage nau Bunong.

            “Ăp nau mprơ rnoi Bunong ueh ngăn nê, nau ƀư aơ tâm ntŭk bu ƀư nê ăp băl...Khân ay may sâm nkoch mbơh aka nau mprơ, nau nkoch nđơn tâm Facebok đŏng hŏ, djăt ŭch ngăn!”.

            “Oh nô nsôih âk hŏ, pah kan ân ueh gay ma bu gĭt tât rnoi Bunong nơm geh âk mpeh nau vay ueh, nau ơm yau ueh. Phung he nsôih ƀư mhe mơ dơi mât nau ngơi bah rnoi nơm. Nkô̆ tơm ngăn lah gay mât nau ngơi, nkoch nau ơm yau, gâp saơ ueh ngăn”.

            Nê lah ăp nau njoăl, nau bonh đă bah băl djăt Radio, uănh Facebok tă bah ăp nick moh Điểu Chí Jam ndrel Điểu Ntri.

            Ăp nau njoăl nê njoăl nau mpŏng ŭch nau ngơi Bunong bah Radio Việt Nam lăp tâm du nau kan mhe geh âk nau ntrơn rgâl lơn tay tă bah nau nkhah 20 năm ntoh nau ngơi. Wa Y Long (Groi Hiệu trưởng Ngih săm ƀŭt PTDT Nội trú n’gor Dak Nông), ntoh nau;

            “Gâp lah ueh ma Đảng ndrel Ngih dak hŏ pơk trong nơih ueh gay ma nau ngơi, nau ơm yau ueh geh ntoh tâm bôk ntuh nau ngơi VOV bah 20 năm rlau aơ. Ŭch ăp rmôt nŭih ƀư nau ntuh ngơi lŏ rgâl mhe nkô̆ nau, âk ntil nau ntoh nau ƀư tâm ntŭk kan ndrel ăp ntrong kan mrô êng êng. Ma nau khlay ngăn lah lŏ ƀư rêng tay nau mprơ nkoch nđơn, nau ơm yau ueh gay ăp rơh kon se rnôk aơ mro gĭt tât mpeh tu tơm bah rnoi deh nơm”.

            Bar jêt năm, bol ma tâm ntŭk ntoh ngơi ơm yau bah Đài mô lah ăp Video nkoch tâm mạng Facebok, website... Ri nau ngơi rnoi Bunong VOV Tây Nguyên dôl pơk luh ăp ntrong hăn mhe gay ma tât tâm ƀon lan. Đah ăp nau nsôih ŭch nau kan bah ăp nŭih rblang nau, rnăk nau ngơi ndrel nau hăn nsum djăt uănh bah ăp nŭih, nau ngơi, nau nchuh bah n’hâm ueh khlay bah Bunong mra lŏ mpar ngai, ƀloh ngai mro mrăng tâm nau rêh nar aơ./.