Trong bê tông ntơn bah thôn Ka Đô, xã Ka Đô, n’gor Lâm Đồng rnôk aơ mô knŭng nthoi ăp ngih ma ăp ntŭk lŏ ma hôm leo tât tâm ntŭk tuch tăm ma bah năp nơh geh dak bok hôm tâm yan mih.  Bar đah trong, ăp ngih nkra ma bil gay tăm băp lĕ tâm nthoi, ntoh ân du nkuăl tuch tăm dôl ma nar lơn geh nau rgâl Ma Ren lah ngoai tâm ăp rnăk leo trong lor tâm nau kan ntrơn rgâl nau kan tuch tăm du ntrong. Ntơm bah 5 sào mrăch têh, tăm yăp tâm ngih mong, tâm rgop nsum ma nau leo rong 50 mlâm sur bri ndrel bơi tât jêt mlâm ndôk, ăp năm rnăk wa hôm geh rlau 500 rkeh prăk jêh lôch nkŭp lơi rnon. Ngơi hăn nsum ma nau kan, wa Ma Ren jêng nŭih geh nau rnơm ngăn ntoh lư bah n’gor Lâm Đồng. wa hăn leo trong lor râm nau kan bah thôn, ntơm bah nau pă neh ndrel bonh đă ƀon lan pă neh gay nkrab trong ân tât nau dŏng ndrel pơk rêng nau pah kan jan sa jăp blau. Wa Ma Ren mbơh: ‘Săk gâp nơm ndrel ăp rmôt kan vay ƀa ƀơ bonh đă kônh wa ƀon lan nkra trong ƀon ân ueh, răk trong ƀon lan kloh, ndrih ueh. Ŭch kônh wa janh ŭch tâm nau kan ntrơn rgâl tơm tăm mpa rong ri nơm ân geh ƀư leo trong lor. Rnôk saơ geh săk tam ri kônh wa mơ dĭng rnơm ndrel ƀư tĭng. Tât rnôk aơ âk rnăk hŏ blau dĭng tâm ăp nau kan tuch tăm mhe, n’hao nau săk geh âk, nau geh jêng kŏ hao âk rđil ma bah năp nê”.

Nau rgop bah ăp nŭih bu rnơm kơt wa Ma Ren dôl lŏ jêng rêng tay tâm âk ƀon lan tâm Lâm Đồng. tâm xã Đam Rông 2, Bí thư Chi bộ thôn 2 Kon Yông K’Khiếp hŏ jang ntuh kơl tăm nsum chanh mô geh grăp, sầu riêng ndrel mắc ca tâm rlau 5 ha cag phê, leo nsĭt nau săk geh rlau du rmen prăk ăp năm. Ntơm bah nau kan aơ, âk rnăk hŏ ntrơn rgâl tuch tăm, dŏng nau kan prêh mhe. Tât rnôk aơ, lam xã geh rlau 478 ha tuch tăm prêh mhe, ƀư njêng geh 14 mrô nkuăl tăm nđrel 11 ntrong ƀư nau kan tâm rgop nsum tuch tăm, rgop nau n’hao nau săk geh văng sa ndrel njêng nau kan geh jêng rong rêh nâp nâl. Nô Kon Yông K’Khiếp, nkoch:  ‘Lah đảng viên ri ân geh ƀư tĭng lor, nsôih kơt tĭng nti gay hun hao tuch tăm, tăm cà phê tăm nsum ma sầu rêng, chanh mô geh grăp, mắc ca, hun hao văng sa rnăk vâl. Rnôk nau kan leo nsĭt nau săk geh văng sa, nŭih ƀon lan mra rnơm ndrel ƀư kơt tĭng. Nau ma rhơn ngăn lah nar lơn ma geh âk rnăk dŏng ăp nau kan tăm nsum, tăm tâm pleh, nau rêh bah ƀon lan geh rgâl âk ngăn”.

 Mra dơi lah, nŭih bu rnơm, nŭih bu rnơm pơk nau rêng mô êng ma nau ngơi ma đah ăp nau kan tuch tăm ân geh săk tam. Rnôk ƀon lan rnơm ndrel kơt tĭng ăp nau ntrŭnh, trong kan kơl an bah Ngih dak kŏ geh ƀư ân săk tam lơn đŏng. Lvang năm 2021-2026, rnoh rnăk ach o âk ding bah n’gor hŏ huch jur ntơm 9,33% jur hôm 3,33%, tâm ban ma huch bơi tât 50 rbăn rnăk ach o. Rnôk aơ, lam n’gor geh 80 xã geh tŏng dơi ƀon lan mhe. Tĭng wa Bùi Ngọc Sơn, Groi Giám đốc Sở Dân tộc ndrel Tôn giáo n’gor Lâm Đồng, lam n’gor rnôk aơ geh nklăp 880 nŭih bu rnơm tâk nkuăl rnoi mpôl đê̆ ndrel mpôl chroh. Aơ lah rmôt kan tơm khlay gay hăn nsum ndrel ma n’gâng kan gay leo ăp nau ntrŭnh, trong kan lăp ƀư nau dơi ngăn tâm nau rêh. ‘Nau dơi bah nŭih geh bu rnơm tâm rơh rlau aơ lah nau nau geh dŭt n’hâm khlay tâm nau kan rgp mô êng tâm nau hun hao văng sa, rêh jêng tâm nkuăl rnoi mpôl đê̆ ndrel gôl yôk. Khân păng mô êng lah ntung nthoi nau ntrŭnh, trong kan bah Đảng ndrel Ngih dak tât đah nŭih ƀon lan ma hôm hăn leo trong lor tâm nau kan tuch tăm hun hai, ndâk njêng ăp nau kan văng sa ân geh săk tam. Ntơm bah nau rêng bah ăp nŭih leo trong lor aơ, âk rnăk tâm ƀon lan Lâm Đồng hŏ janh ƀư tĭng ân ueh, rgop nau ƀư têh ngăn tâm nau n’hch ach o, êp ach o tâm nkuăl rnoi mpôl đê̆, nkuăl ƀon lan ndrel gôl yôk ân geh săk tam ngăn”.

Trong bê tông tâm Ka Đô nar aơ mô knŭng pơk trong lăp tât ntŭk lŏ mir, ntŭk ƀư ăp nau kan tuch tăm, ma hôm pơk luh trong văng sa mhe ân ƀon lan. Nau ntrŭnh bah Ngih dak hôm pơk nau rnơm đah ăp nau kan ƀư na nê̆, nŭih ƀon lan mra ndrel choat tĭng. Ndrel nê lah nau ntrŭnh bah nau dăng gay ăp ƀon lan nkuăl rnoi mpôl đê̆ tâm Lâm Đồng hun hao, hao rklaih ach o nâp nâl đah ăp nau nsôih nau kan bah nơm./.