Nkual Tây Nguyên hŏ lăp tâm khay mih. Ta ntŭk ƀư Nhih nti nội trú rep gưl ta xã n’har bri Thuận An, n’gor Lâm Đồng nuih n’hâm kan dôl ndăn ngăch. Wa Nguyễn Thành Long, Kruanh rđău đă du ntŭk ndranh ƀư an gĭt, aƀaơ geh nklăp 270 công nhân, kỹ sư ndrel rlău 20 ndơ dŏng, ndeh rklư tâm pă jêng âk rmôt ndăn ngăch ntưm chor, mon mpir nking jrô, nhuĭh lâng neh nkual gŭ, tâm rlong đah mông nar gay đăp mpăn rnoh ngăch ƀư. Bol ât rdâng đah mô tŏng âk nuĭh kan, rnoh khlay lŭ loih choih xi măng hao 20–30%, nuĭh tơm ndranh nha hôm tâm pă nuĭh kan, đăp mpăn tơm ndơ gay ƀư ngăch, nsrôih ndơ̆ nhih nti tât di nar ton đŏng.

“Nar mih ti mpôl hên mbra tâm pă ƀư tâm trôm n’hanh sơn tâm trôm jay; hôm ăp nar mô mih ri tâm pă nuĭh ƀư bah dih nar, ntưm chor gay đăp mpăn rnoh ngăch. Na nê̆, jay S1 hŏ lôch jêh 70%, S7 hŏ mon lôch jêh n’hanh bôk pơh bah kơi tay mbra ntưm chor, hôm S10 dôl mon tay dăp 2, 3; êng mpeh mpêr n’gar hŏ mon lôch jêh. Mpôl hên dôl nsrôih tât nar 30/7 aơ tay mbra jao nhih nti.”

Wa Hà Sỹ Sơn, Giám đốc Ban Mât uănh trong nchrăp ntuh kơl n’hanh Rdâk njêng mbrô 3 n’gor Lâm Đồng, nuĭh tơm ntuh kơl an gĭt, lam n’gor geh 5 Nhih nti nội trú rep gưl. Tâm nê, geh bar nhih nti ta xã n’har bri Thuận An n’hanh Quảng Trực ntơm rdâk ƀư kêng dŭt năm 2025 dôl rgum lĕ nuĭh kan, ƀư “3 tơh, 4 mpôl” gay đăp mpăn rnoh ngăch. Bah năp nô nău rnoh khlay ndơ mon ƀư hao khlay, nuĭh kan mô tŏng geh, trôk nar tât ndal, Mpôl mât uănh kơp dơn tĭng khay, mô dơn nê kơp dơn tĭng pơh, nkre rgâl rnoh khlay ndơ n’gluh tơm prăk gay ntop kơl nuĭh tơm ƀư ndranh, nsrôih wat jêh rdâk njêng tâm nar 30/7.

“Mpôl tơm mât uănh trong nchrăp kan ndrel ăp nuĭh tơm rdâk ƀư nchih na nê̆ tĭng ndơ ƀư gay mât uănh ăp nar, ăp pơh joi trong nkra ƀư ngăch, nsrôih tât lôch ăp rnoh ndơ̆ luh. Đah ăp ndơ dŏng ntĭm n’hanh nti ndrel ăp ndơ rvăt năp êng ƀa ƀă, mpôl hên hŏ ký ton rvăt năp đah ăp nuĭh tơm tăch; khân păng mbra dôl tâm rlong gay ƀư njêng, rvăt n’glăp ndơ dŏng gay rnôk ƀư lôch jêh rdâk mon mbra ntrŭp. Nău ŭch lah ăp ntil ƀư lôch jêh lor bah năp lăp năm nti mhe.”

Ndrel đah nhih nti dôl tâm rlong rnoh ngăch, pah kan nchrăp nuĭh kan n’hanh sơch lăp kon se nti dơi an ƀư ndăn ngăch đŏng. Gay đăp mpăn nău ntĭm nti rnôk nhih nti n’glăp dŏng, Sở Giáo dục n’hanh Đào tạo n’gor Lâm Đồng kan nsum đah ăp xã tâm pă nai ntĭm. Nkre ăp xã lor nchrăp sơch kon se lăp nti di rnoh âk, di nuĭh n’hanh rdâk njêng trong sơch lăp nuĭh kan, nuĭh mât bôk kan, nuĭh ndrăp kơl dơi UBND n’gor Lâm Đồng uănh an trong nchrăp ntuh kơl.

Wa Hồ Sĩ Hải, Kruanh Jrô kan Văn hoá – Xã hội xã Quảng Trực an gĭt, Nhih nti nội trú rep gưl ta xã lôch ƀư jêh mbra wơt nklăp 900 kon se nti, đah 18 jrô nti tiểu học n’hanh 12 jrô nti trung học cơ sở. Aƀaơ xã hŏ rgâl 32 biên chế nai ntĭm; 19 nuĭh hôm ƀa ƀă mbra sơch lăp tâm ton kan, ndrel rlău 10 nuĭh mât uănh bôk nău kan, siƀŭt, ndrăp kơl, kỹ thuật …mbra dơi sơch lăp tâm let năp tay đŏng.

“Gay dăp rgum, tâm pă kon se nti di rnoh lăp tâm nhih nti nội trú, mpôl hên tĭng ƀư pah kan sơch lăp nti ma trong ƀư phiếu ôp uănh njuăl tât lĕ rngôch ăp rnăk geh oh kon dôl năm hăn nti, tĭng nti ta ăp nhih nti ta xã. Nsing ta nău dja, lah geh nău ŭch, ăp kon se mbra lăp nti tâm nhih nti nội trú. Mpôl hên nsing ta ăp quy định, nău way gay sơch di nuĭh. Aƀaơ hŏ geh rlău 90% me bơ̆ tŏng nău dơi gay njuăl tay phiếu ôp uănh, mpŏng oh kon lăp tâm nhih nti nội trú.”

Ntơm bah trong nchrăp rŏng nuĭh bah Đảng, Ngih dak ndrel nău ntop kơl bah nuĭh tơm ntuh kơl, nuĭh ndranh ƀư n’hanh n’gâng kan ta ntŭk, nklăp 1.800 kon se nti nkual n’har bri Lâm Đồng mbra ơm dơi kơt nti, gŭ sa tâm ăp nhih nti têh uĕh, ăp tŏng geh ndơ dŏng rêh. Ăp nhih nti mhe mô dơn chăt nar mpăr wơl geh an kon se nkual n’har bri, ma hôm rgop ntĭm nti tơm nuĭh kan let năp tay đŏng, nsum ti rdâk njêng n’har bri Lâm Đồng nar lơn ma geh ndrŏng, srăch uĕh, nâp dăng ntŭk mpêr n’har bah neh dak./.