Ta rơh hop djăt nău mbơh lôch ôp uănh ăp ntŭk nchrăp ƀư trong cao tốc, Thủ tướng Phạm Minh Chính lah kloh: lah ntrŭt ntrôl ƀư ngăch, năm aơ lam dak nklăp ƀư lôch jêh 3.300 km trong cao tốc, rlău 10% rđĭl đah rnoh ndơ̆ luh. Tĭng nău mbơh, tâm rnôk 30/4 năm aơ mbra mbluh 228km trong cao tốc; kơt nê̆, lam dak mbra geh 2.250 km trong cao tốc dơi ƀư lôch jêh; tât kêng dŭt năm mbra geh 2.920 km.

Lah ƀư lôch jêh tay ăp njăr trong bah ăp n’gor ri mbra geh nklăp 3.210 km. Rlău ma nê, hôm 2 njăr trong Đồng Đăng - Trà Lĩnh n’hanh Hữu Nghị - Chi Lăng, lah ƀư lôch jêh tay tâm 2025 ri lĕ rngôch rnoh km trong cao tốc mbluh bah Bắc tât Nam lah 3.345 km. Thủ tướng đă tahen, công an ra uănh tay nău kan ta ăp njăr trong cao tốc, lơn lah njăr trong cao tốc Lạng Sơn- Cao Bằng. Thủ tướng lah rjăp lah ntrôl ngăch ƀư n’hanh lĕ rngôch  ăp tơm mpôl geh tât nsrôih lăp kan ri mô dơn 3.000 km dơm ma mbra lah ƀư lôch jêh 3.300 km trong, rlău 10% rđĭl đah rnoh tât kan ndơ̆ luh.