Ôi 14/4 ta Nhih pah kan Trung ương Đảng, Tổng Bí thư Tô Lâm, Kruanh Ban rđău đă ƀư tơm rơh hop tâl 3 Ban rđău đă Trung ương mpeh n’glôch jêh Nghị quyết 18 nar 25/10/2017 bah Ban Chấp hành Trung ương khoá 12 du đêt nkô̆ nău mpeh rgâl mhe, dăp rgum nuĭh kan bah lam trong kan chính trị glêh tam, nău kan geh nău tam, yach ngăch gay tâm nchră, uănh an dŏng trong nchrăp bah Ban rđău đă mpeh tĭng ƀư dăp rgum, n’glăp nhih pah kan gưl n’gor, gưl xã n’hanh rdâk njêng lam trong kan chính trị 2 gưl tâm dâng. N’glôch jêh rơh hop, Tổng Bí thư Tô Lâm lah rjăp tât rnôk dja rơh cách mạng mpeh glêh tam lam trong kan chính trị dơi âk mpưm rơh kơn ƀon lan  n’hanh băl mpôl lam ntŭr neh nchih nkah rnê âk n’hanh aơ lah nău tă ơm gĭt kan khlay gay he an ƀư jru hvi lơn rơh cách mạng mpeh glêh tam nuĭh  kan tĭng di nuih n’hâm tâm nchră Trung ương tâl 11 mhe aơ. Mpeh nău dơn kan let năp tay, Tổng Bí thư lah rjăp nău kan hôm dŭt âk, dŭt dĭ hvi bah trung ương tât tâm dâng n’hanh geh nău tâm boh êt lhăt nsum jêng Tổng Bí thư an lah nău lor nchrăp kan nsum yor ma nuih n’hâm nsum lah nău dŭt khlay; tâm nê geh rmôt nău kan wat jêh siƀŭt quy phạm pháp luật, mpeh nău rgâl nkra Hiến pháp, nău rgâl nkra ƀư wat jêh trong tĭng pháp luật, wat jêh ăp quy định bah Đảng ân hăn lor du njuat gay njêng trong soih aih tâm di nâp dăng an nău tĭng ƀư mbluh rhong n’hanh geh nău tam.