Tâm trôm rơh khâl Gưl Ngih dak tât Indonesia, kêng măng 9/3 ta Thủ đô Jakarta, Tổng Bí thư Tô Lâm lĕ wơt kruanh du đêt Tập đoàn doanh nghiệp bôk năp bah Indonesia n’hanh râng ƀư mbơh joi trong mpăr sŏng bah Vietnam Airlines đah nkual ƀon têh Hồ Chí Minh n’hanh Denpasar. Ta nar wơt, Tổng Bí thư lah rjăp rơh khâl aơ gay ntrôl tâm boh kan ndrel lĕ rngôch ăp ntil nău, lơn lah kan ndrel wăng sa đah Indonesia. Việt Nam ntrŭt nsôr ăp doanh nghiệp Indonesia ntuh kơl ta Việt Nam n’hanh mpŏng ŭch Indonesia nta an ăp doanh nghiệp Việt Nam ntuh kơl, pơk hvi ntŭk tăch ta Indonesia.

Mĭn lah nău ntrŭnh kơl an ăp nău nchrăp ƀư ma Tập đoàn Ciputra dôl mbơh ƀư ta Việt nam, Tổng Bí thư đă Tập đoàn tâm rgop đah UBND nkual ƀon têh Hà Nội n’hanh ăp ngih pah kan geh tât gay mbơh ƀư; nkre ntrŭt nsôr tập đoàn mĭn njêng tay mbơh ƀư ăp nău nchrăp ƀư mhe ta Việt Nam, mât uĕh lơn tay ăp ntil nău têh dăng tâm kan ndrel ntuh kơl, rgop an Việt Nam geh ăp nău rƀŏng hao jêng lĕ n’gluh an.

Tâm kêng măng nđaơ đŏng, Tổng Bí thư Tô Lâm lĕ tât râng mbơh ƀư trong mpăr sŏng bah Vietnam Airlines đah nkual ƀon têh Hồ Chí Minh n’hanh Denpasar, nkual têh Bali bah khay 6 năm aơ, jêng trong mpăr tal 2 bah Vietnam Airlines nthoi đah Việt Nam-Indonesia, n’hao rnoh rơh mpăr bah ndeh păr đah 2 dak hao 14 rơh mpăr du pơh.