Đah nkô̆ “mpar tâm nkuăl yôk prêh” nar hội Khinh khí cầu Dak Lak 2025 geh ƀư ntơm lơ 1/5 tât 3/5 tâm xã Krông Na, nkuăl Buôn Đôn. Nar rgum geh 10 khinh khí cầu mpar rhŏ ân năch uănh tâm Buôn Đôn ndrel 2 khinh khí cầu mpla tâm Quảng trường 10/3, nkuăl ƀon têh Buôn Ma Thuột.

            Rnoh vé mpar Buôn Đôn tâm khinh khí cầu ntơm 140 rbăn tât 800 rbăn. Jŏ mpar ntơm 5-10 mnĭt. Ndrel ma nê, bu năch rlong uănh nau tâm n’ur njroh mprơ, nau ơm yau ueh ơm, sa ăp ndơ sa kah ndrel nau ueh, nau kah ngăn bah nkual.

            Wa Phạm Trung Nghĩa, Kruanh UBND nkuăl Buôn Đôn mbơh, bôk nau kan geh âk trong mpar ueh gay năch săch ƀư. Nau kan yor rmôt kan geh nau dơi tâm nau kan aơ rnôk mpar khinh khí cầu ƀư gay đăp mpăn ăp nau dơi mpeh nau dơi kan, đăp mpăn ndrel nâp nâl ngăn đah bu năch:

            “Aơ lah rơh bôk năp du nau kan têh đah âk nau geh rlong uănh ƀư ueh ma khinh khí cầu geh ƀư tâm nkuăl. Nau kan aơ mô êng geh tât nau ueh ngăn ma hôm lah ntung jŏ gay ma mbơh nau ơm, nau geh dăng dơi pâl n’aih, ngăn lah nau ueh ơm bah ăp rnoi Tây Nguyên đah băl bên puăn nkuăl neh. Hên rnơm lah, đah nau kơt tĭng ŭch bah nŭih ƀon lan ndrel bu năch, nar rgum ƀư Khinh khí cầu nkuăl Buôn Đôn mra jêng nau nkah ueh, rgop nau leo Buôn Đôn jêng ntŭk tât ueh tâm bản đồ pâl n’aih Việt Nam”.

            Êng nê, bu năch tât ma Dak Lak tâm rnôk ƀư nkah 30/4 ndrel 1/5 năm aơ hôm geh uănh ăp nau pala ơm, thể thao âk ntil geh ƀư tam nkuăl, kơl tur chŏng, âm nhạc trong hăn, mpla rup, ngêt sa ăp rnoi mpôl...Wa Trần Hồng Tiến, Giám đốc N’gâng kan Văn hoá, Thể thao ndrel pâl n’aih n’gor Dak Lak mbơh:

            ‘Trong kan nê geh tâm 4 nar gay bu năch tât ndrel rlong uănh. Êng nau hăn uănh pala dĭng nar, mra dơi tât tâm Buôn Đôn, Lắk mô lah du đê̆ ntŭk pâl n’aih êng, rlong uănh khinh khí cầu ri mpar măng mô lah ăp nar hôm e ndrel dơi geh uănh ăp nau ueh, ngêt cà phê, djăt nau njroh mprơ Tây Nguyên ndrel râng uănh ăp ntŭk, nau ueh tâm nkuăl. Ăp ntil ndơ nê ri nơm hŏ tâm rgop nsum đah ăp ntŭk kan gay ma ntrŭnh ƀư”./.