Tâm lvang 2021-2024, n’gor Dak Lak lĕ an 35,7% dĭng lĕ tơm prăk n’gor an ntĭm, ntĭm nău kan đah rlău 28.300 rmen prăk. Yơn lah, rnoh nuĭh pah kan jêh ntĭm nti geh sam ƀŭt jêh ntĭm nti n’hanh nuĭh kan gĭt blău âk hôm e đêt. Wa Nguyễn Bá Thành, Kruanh HĐQT nkre ƀư Tổng giám đốc Công ty cổ phần Tao sĭk 333 Dak Lak nkoch, aƀaơ Công ty dôl ntrôl dăng rgâl ƀĭt êng ăp ntil nkra njêng, yơn lŏ mô tŏng hô phung pah kan kỹ thuật ƀon nău kan đă ntŭk kan an ntĭm nti tâm ntŭk kan tĭng trong “djôt ty ntĭm kan”. Bôl 75% phung pah kan tâm công ty lĕ geh ntĭm nti, yơn nuĭh kan kỹ thuật jru, ngăn lah ăp ntŭk đă nău blău mhe n’hanh nău mĭn rgâl mhe... ri dŭt mô tŏng. Wa Nguyễn Bá Thành nkoch:

Công nghệ mhe kơt lah mô geh bôk nău ntĭm nti mpeh nău kan tao sĭk ma mpôl hên nchrăp lor ntĭm nti ta ntŭk, ty kan prêh ntĭm nti an ty kan đêt. Nuĭh ơm ntĭm nti an nuĭh mhe gay ƀit dŏng. Lah ngih măy njuăl ntĭm nti ta du ntŭk kan êng mô di nău pah kan ri mô geh nkô̆, mô mkra nău tâm nău kan bah mpôl hên.

Tĭng Tiến sĩ Nguyễn Thanh Trúc, Hiệu trưởng Ngih sam ƀŭt Đại học Tây Nguyên, nău mô tŏng nuĭh kan gĭt blău âk an Tây Nguyên aƀaơ, geh âk wăk kol mô geh nău rblang dâl bah ntĭm nti. Na nê̆, tâm rnoh 35 nău kan ntĭm nti đại học bah ngih sam ƀŭt, geh âk nău kan dŭt tâm di êng bah n’gor, geh mpŏng hao đah nău kan n’hanh nău geh jêh lôch nti, lŏ mô di kon hŏk dăn săch nti.

Rmôt nău kan nông lâm săch dŭt đêt, kơt năm 2024 knŭng geh rlău 50%. Yơn lah tâm nău mbơh geh nău geh nău kan bah sinh viên jêh lôch nti uănh nsum sinh viên rmôt nău kan tuch tăm lŏ geh rnoh rĭng âk lơn kơt rmôt nău kan êng yơn ăp oh lŏ mô săch nău kan aơ gay tĭng nti. Yor nĕ dôl geh nău wet mpeh nău ŭch kon nuĭh.

Ta nkual Tây Nguyên, Dak Lak lah n’gor âk nuĭh ƀon lan, đah rlău 2 rkeh nuĭh, yơn uĕh blău nuĭh pah kan dôl lah đêt. Tĭng wa Nguyễn Thiên Văn, Groi Kruanh UBND n’gor Dak Lak, rnoh pah kan jêh ntĭm nti geh bằng cấp, sam ƀŭt kơp dơn ta n’gor mhe geh nklăp 1/5. Dôl uănh, n’gor mô geh nuĭh kan uĕh blău âk ta ăp nkual ŭch geh công nghệ mhe, ƀĭt joet mrô, nkra njêng luh êng. Nău aơ khuch tât săk rnglăy pah kan n’hanh dơi tâm rlong bah wăng sa ƀon lan.

N’gor Dak Lak aƀaơ mô geh âk doanh nghiệp têh pah kan têh, lĕ rngôch jêt n’hanh dŭt jêt, jêng geh tât rnôk ntĭm nti. Jêng lah ta aơ geh âk nău way kan hăn ndrel đah nău ƀư ngăn yơn dơi doanh nghiệp nĕ an pơk hvi n’hanh hun hao têh ri mư wơt dơn nuĭh pah kan.

Tĭng mpôl uănh nđôi bah Ủy ban Văn hóa-Xã hội bah Quốc hội, Dak Lak geh nău dơi têh yơn n’gor ŭch du trong jŏ jong, tâm ban n’hanh ngăn ngên lơn mpeh hun hao nuĭh kan, lơn lah nău kơl wăch rgum nuĭh blău, ngăn lah nuĭh ƀon lan rnoi mpôl đêt. Nkre an n’hao tâm rgop đah ngih sam ƀŭt, doanh nghiệp n’hanh n’gâng kan ƀon lan gay ndâk njêng phung pah kan, ntĭm nti hăn ndrel đah dŏng, kơl nuĭh nti dơi ndâk njêng nău kan ta ƀon tơm nơm dâl.

Wa Đinh Công Sỹ, Groi Chủ nhiệm Ủy ban Văn hóa xã hội bah Quốc hội an gĭt, nău aơ lơ jêng rhoăt ndăn lơn, rnôk nău nglăp nsum n’gor, xă, jăng lơi gưl nkuăl lĕ hăn lvang n’glêh dŭt. Du n’gor Dak Lak mhe hvi lơn đah rhiăng xă mpeh tâm n’gor, lơ ŭch âk nuĭh kan tâm di:

Êp tât n’gor pơk hvi kơt nĕ, ndrĭ he an geh âk nău rgâl mpeh trong rƀŏng ăp nău kan ntĭm nti, têh nkual n’hanh n’hanh n’gor an geh nchrăp lor gay geh trong mkra tâm khay tât. Tal 2 lah uănh tât mpeh trong kan mbơh ntĭm nău kan gay wăch rgum tâm ăp nău kan doanh nghiệp dôl geh ŭch âk kơt lŏ mir, mât tăm bri.

Hun hao nuĭh kan, lơn lah nuĭh gĭt blău âk, mô knŭng nău ŭch bah năp măt ma hôm n’gâng tơm an nău hun hao nâp nâl bah Dak Lak tâm rgŏ năp. Rnôk nuĭh kan dơi hun hao di trong, n’gor mư dơi dŏng dŭt n’hâm nău dơi, dơh ơm n’hanh hao têh dăng tâm rnôk rgâl mhe n’hanh rgum lăp./.