VOV4.M'nông: Nga mbra geh rơh tâm nchră đah Mỹ n'hanh NATO tâm nar 10/1 n'hanh 12/1 năm tât, rgum tâm nkô̆ nău mât kân ndrak nsiu, tâm ban kơt nô nău ta n'har bri Nga- Ukraine. Thứ trưởng Ngoại giao Nga Sergey Ryabkov an gĭt, ta ăp rơh tâm nchră bơi tât, Nga mô dơn rlăch dun ma mbra ton dŭt bah lĕ rngôch ăp nău kan pơk hvi mpeh luh nar bah mpôl tâm ton tahen NATO tă bah Mỹ mât bôk. Rlău ma nê, ăp nău dăn đă bah Nga hôm đă phương Tây ntlơi kho ndrak nsiu hạt nhân bah Mỹ luh bah châu Âu, rhuăt sĭt lĕ tahen n'hanh ndrak nsiu bah mpôl tahen NATO luh bah n'har bri kâng đah Nga. Mỹ năl lah bơi tât mbra geh rơh tâm nchră đah Nga mpeh nkô̆ Ukraine. N'hanh NATO dôl kâp du rơh tâm nchră đah Nga bơi tât n'hanh mpŏng tâm nchră mbra geh nău dơi uĕh./.

Nuĭh rblang: Điểu Thân