VOV4. M’nông: Kêng măng 8/4, Quốc hội khóa XIV hŏ ƀư n'glôch jêh rơh hop tâl 11. Lah ta rnôk n'glôch jêh, Kruanh Quốc hội Vương Đình Huệ lah kloh: lôch 12 nar pah kan ndăn ngăch, răp jăp, dơn kan, Rơh hop tâl 11, Quốc hội khóa XIV hŏ ƀư lôch jêh lĕ rngôch nkô̆ bôk nău kan ndơ̆ luh n'hanh geh nău dơi uĕh lăng. Quốc hội hŏ n'glôch jêh jru hvi, lam lĕ rngôch pah kan năm kan 2016- 2021 bah ăp nhih pah kan tâm ngih dak, mĭn uănh, n'glêh an pah kan nchrăp nuĭh kan n'hanh du đêt nkô̆ khlay êng ƀa ƀă. Quốc hội ntêm an âk mông nar gay tâm nchră, uănh năl ăp si ƀŭt mbơh pah kan bah Quốc hội, Kruanh dak, Chính phủ, ăp nhih pah kan bah Quốc hội, Nhih phat dôih ƀon lan gưl têh, Viện Kiểm sát ƀon lan gưl têh, Kiểm toán Ngih dak.

  Tâm kêng măng nđaơ 8/4, Quốc hội lĕ uănh an dăn đă bah Kruanh dak mpeh săk Groi kruanh dak n’hanh du đêt Ủy viên Hội đồng mât njrăng bri dak n’hanh rnă njrăng đah trong ƀư nklăch phiếu mpôn, tâm nĕ, Thủ tướng Chính phủ Phạm Minh Chính ƀư Groi Kruanh hội đồng mât njrăng bri dak n’hanh rnă njrăng. Kruanh Quốc hội Vương Đình Huệ, Kruanh n’gâng kan mât njrăng bri dak Phan Văn Giang, Kruanh N’gâng kan tâm rnglăp nchră nău Bùi Thanh Sơn ƀư Ủy viên Hội đồng mât njrăng bri dak n’hanh rnă njrăng. Quốc hội lĕ uănh san tâm di đah trong ƀư nklăch phiếu săk nuĭh đă săch wa Đỗ Văn Chiến (Bí thư Trung ương Đảng, Bí thư Đảng Đoàn MTTQ VN n’hanh wa Võ Thị Ánh Xuân (Ủy viên TW Đảng, groi Kruanh dak) an ƀư Groi kruanh Hội đồng săch ngih dak, ndrel âk nuĭh Ủy viên Hội đồng săch ngih dak. Jêh nĕ, Quốc hội mbơh an Nghị quyết mpeh nău uănh an nuĭh kan mhe an du đêt Groi Kruanh dak n’hanh du đêt Ủy viên Hội đồng săch ngih dak.

Nuĭh rblang: Điểu Thân