VOV4. M’nông: Nar 7/4, ta nâm nău ƀư tơm bah Tổng Bí thư Nguyễn Phú Trọng, Ban Bí thư hŏ hop gay uănh năl, ƀư rmal wa Tất Thành Cang n'hanh wa Lê Văn Phước. Tâm rnôk ƀư Ủy viên Trung ương Đảng, Groi Bí thư Rnâng kan Thành ủy nkual ƀon têh Hồ Chí Minh, wa Tất Thành Cang hŏ tih dŭt jru nău way rgum geh nău tâm ban, nău way pah kan n'hanh ăp quy định bah Đảng, pháp luật bah Ngih dak, lơh khuch khat, roh huach dŭt âk prăk ngân sách ngih dak, hŏ geh Nhih pah kan cảnh sát hăn ôp uănh Công an nkual ƀon têh Hồ Chí Minh n'gluh lah phong n'hanh manh nhŭp kân mpeh nău "Tih quy định mpeh mât, dŏng drăp ndơ ngih dak lơh jêng roh huach, mpŭng lir". Wa Lê Văn Phước, đah nău dơn kan tỉnh ủy viên, bí thư Ban cán sự Đảng, chánh án Nhih phat dôih ƀon lan Phú Yên hŏ tih quy định bah Đảng mpeh ăp nău đảng viên mô dơi ƀư, tih nău way mât dŏng prăk kaih, lơh roh huach âk n'hanh sa khâm, pit in drăp ndơ ngân sách ngih dak, hŏ geh Nhih phat dôih ƀon lan gưl têh ta Đà Nẵng n'glêh an rmal 12 năm 6 khay gŭ ndrung mpeh nău tih "Sa khâm drăp ndơ". Nău tih bah wa Tất Thành Cang n'hanh wa Lê Văn Phước lah dŭt jru, njêng geh nău lư djơh, nuih ăl tâm cán bộ, đảng viên n'hanh ƀon lan, ƀư khuch djơh tât nău nsing nơm bah mpôl kan Đảng. Ban Bí thư n'glêh an rmal ma trong n'gluh luh bah Đảng đah wa Tất Thành Cang n'hanh wa Lê Văn Phước.

Nuĭh rblang: Điểu Thân