VOV4.M’nông: Cil Sia Duyên (43 năm deh) mô knŭng lah nkao ntơr uĕh bah nuĭh Lạch bah kônh wa Măng Line ma hôm lah bu ur cán bộ ntoh lư bah phường 7, nkual ƀon têh Đà Lạt, n’gor Lâm Đồng.

          Lah du hê bu ur bah rnăk wâl đah nău kan khlay lah kan tâm rnăk wâl, tăch ndơ, yuh Cil Sia Duyên hôm dơn ƀư nău kan pih ủi, nkra kho ao, way n’gôn ndrănh yăng gay hun hao wăng sa rnăk wâl. Yơn mô âk nău kan mô geh mô ru, yuh Cil Sia Duyên lĕ geh rlău 10 năm pah kan nău rêh jêng ta tổ dân phố Măng Line, phường 7, nkual ƀon têh Đà Lạt, n’gor Lâm Đồng. Yuh geh rlău 10 năm dơn ƀư Chi hội phó Chi hội bu ur tổ dân phố Măng Line, Chi hội groi Chi hội Nông dân n’hanh lah chi hội trưởng Chi hội Khuyến học bah tổ dân phố. Tâm rơh srê aơ, yuh Cil Sia Duyên hôm ƀa ƀơ geh măt ta ntŭk kâp njrăng uănh nđôi srê ta tổ dân phố Măng Line.

          Mpôl hên geh măt ta jay yuh Cil Sia Duyên rnôk ăp kon se ach o ƀon lan rnoi mpôl đêt ta aơ dôl tât sŏk ndrôm săm ƀŭt nchih bah Hội khuyến học phường 7. Yuh Cil Sia Duyên an gĭt: “Gâp lah yuh têh tâm rnăk wâl geh 5 hê oh yuh. Me bơ̆ ach o ngăn jêng dơi nti tât jrô 9. Jêng aƀaơ ăp kon, ăp mon dơi nti lĕ rngôch gâp rhơn ngăn. Gâp râng kan trong nău rêh jêng du gưl gay dơi nti nsơm tay âk nău uĕh n’hanh dơi ntĭm nti oh kon, dơi kơl kônh wa ƀon lan he”.

 Cil Sia Duyên lah muh măt mô dơi mô geh tâm ăp rơh rgŏ jă oh kon tât ngih sam ƀŭt. Yuh geh măt ta lĕ rngôch ăp mir yơng ntil, mir biăp, nkao, cà phê bah kônh wa tâm tổ dân phố gay tâm nchră, mĭn joi n’hao săk geh tơm tăm. Yơn lĕ geh nău lăp jru ngăn bah Cil Sia Duyên hôm e geh 10 năm krêp dêh đah trong kan bu ur. Mô knŭng yor yuh uĕh tâm kho ao way ơm n’hanh nău mprơ uĕh kơt sĭm ndrâu ăp tơ̆ Măng Line mô lah Phường 7 geh rgum, ma nuĭh bu ur rnoi Lạch nĕ lĕ nuĭh boăt nthoi ăp nuĭh bu ur bôl rnoi mpôl đêt êng yơn rêh ndrel tâm lôk neh Măng Line. Ntŭk aơ geh rlău 200 mpông jay, yơn 130 rnăk tâm rnoh nĕ lah nuĭh rnoi mpôl đêt. Yuh Cil Sia Duyên n’hanh ăp nuĭh kan bah nơm lĕ rgŏ jă oh yuh tât râng ntrong leo bu ur, rgum, wăch, nta nău tâm rnglăp tâm chi hội. Tâm 5 năm hun hao geh 70 nuĭh, tâm nĕ geh âk nuĭh lah rnoi mpôl đêt. N’hanh ăp nuĭh bu ur ta aơ mô knŭng râng rmôt tŭr chĭng, rmôt njroh xoang, Câu lạc bộ Nău mprơ Tây Nguyên, Câu lạc bộ Pah play ka su... ma khân pơng hôm tâm kơl ndrel hun hao wăng sa.

Rmôt kan bu ur tổ dân phố Măng Line lĕ rgŏ jă nuĭh tât râng ntrong leo “5 kơl 1” đah rnoh prăk rlău 5 rkeh prăk, kơl an 5 oh yuh tâm chi hội geh prăk rwăt tay phân poh gay mât chăm cà phê. Rgŏ jă ntop kơl rwăt thẻ BHYT an 3 nuĭh, ndâk ƀư 1 mlâm jay tâm kơl an nuĭh ach o, rgŏ jă ndâk ƀư jay rgum rƀŭn nsum đah khlay dĭng lĕ 250 rkeh prăk. Ndâk ƀư ntrong leo prăk kaih mât uănh êng an oh yuh đah rnoh prăk 210 rkeh prăk, ntop kơl an oh yuh geh prăk tuch tăm n’hanh hun hao wăng sa rnăk wâl. Mbơh ƀư prăk manh Tơm prăk nkrem an manh Ƀon lan Liên Phương đah rnoh prăk 1,2 rmen prăk an 60 nuĭh manh tă bah tâm rgop. Ndâk njêng rmôt tâm pleh prăk geh 30 yuh râng đah tơm prăk 90 rkeh, tâm pleh an oh yuh tâm rmôt manh tăch rgâl jêt, rgâl nău rêh rnăk wâl ...Ƀư rgŏ jă tâm rgop ndâk ƀư tach pah play đah dĭng lĕ 30 rkeh prăk gay geh ntŭk pâl uĕh an nuĭh ƀon lan ta ntŭk...

Măng Line lah ntŭk Cil Sia Duyên dơi deh, n’hanh rlău 10 năm pah kan nău rêh jêng kon nuĭh jêng yuh gĭt na nê̆ tĭng jay, tĭng kôp ur sai, tĭng nkual tuch tăm n’hanh tĭng nuĭh kon se ta ntŭk aơ. Yor rĭ ma Groi Bí thư Đảng ủy Phường 7 Phạm Ngọc Linh mĭn lah: “Đah nău dŭt n’hâm, gơih nđơr n’hanh lĕ nău kan, yuh Cil Sia Duyên ngăn ngên lah nuĭh ntoh lư ta tổ dân phố Măng Line. Nkre, yuh lah ntung nthoi nâp nâl ƀư uĕh n’hanh tâm ban ŭch nău tâm boh đah n’gâng kan ƀon lan n’hanh nuĭh ƀon lan, ngăn lah kônh wa nkual rnoi mpôl đêt ta ntŭk aơ”.

                              Nuĭh rblang: Y Sưng Phê Ja