Đại hội mĭn lah, nău rêh bah kônh wa ăp rnoi mpôl đêt n’gor Lâm Đồng lĕ dơi hao lĕ rngôch. Nău gĭt n’hanh kơt dŏng ngăch ăp khoa học kỹ thuật mhe an nkra njêng lĕ kơl nău geh rĭng geh 50 rkeh prăk/du hê/năm, hao 12,5% nkôp đah năm 2019; rnoh rnăk ach o hŭch hôm 3,24%. Lơn lah, aƀaơ lam n’gor geh 353 doanh nghiệp yor nuĭh rnoi mpôl đêt ƀư tơm, đah dĭng lĕ prăk hao tât 2.773 rmen prăk; 13 ndơ geh OCOP hạng 3 sao.

Du hê nuĭh ƀư tơm ntŭk tuch tăm mât rong rdâk njêng nău kan bah năm 2017, đại biểu K’Hoàng, nuĭh K’Ho ta xă Phú Hội, nkuăl Đức Trọng an gĭt, knơm ntuh kơl di trong an lŏ mir công nghệ mhe, nô lĕ lôch jêng n’hanh ngăch hao têh hvi nkra njêng hao rlău 7 tơ̆, nkra njêng âk ntil biăp, bum, play geh tâm di Global GAP.

Tâm trong rdâk njêng nău kan bah gâp bôk năp rdâk ƀư 1.000m2 jay bil lor; mbrơi mbrơi tĭng năm khay nkra njêng pơk hvinkra njêng jay bil hao 7.000m2. Tâm Farm bah gâp, dŭt âk lah nkra njêng tĭng sam ƀŭt nchăm ndơ.

Mĭn lor cà phê lah ngoăy tâm âk tơm tăm khlay, ntoh lư cà phê Arabica Lạc Dương geh âk, dơh an hun hao, rlău ma rgŏ jă nuĭh ƀon lan tăm tĭng trong hữu cơ geh ntŭk joi tu tơm n’hanh tâm rgop tĭng trong khlay, n’gâng kan ƀon lan ta ntŭk aơ hôm ntrôl tăm cà phê tĭng trong ndơ lŏ mir lam ntŭr neh. Wa Y Cường-du rnăk tăm cà phê jŏ năm ta xă Lát, nkuăl Lạc Dương an gĭt, bah rnôk dơi râng ăp jrô nti mư dơi wât tăm m’hâm ƀư grăp cà phê mư dơi tăch rnoh khlay.

Tăm cà phê nâp nâl bôk năp mhe djăt bu dŭt mô gĭt. Jêh rnôk dơi n’gâng kan nkoch mbơh kloh, kônh wa mbrơi mbrơi gĭt nâp n’hanh wât nău roh bri mbra jêng tât roh hŭch cà phê, khuch tât rnoh khlay cà phê. Tâm ăp năm mhe rlău kônh wa dơi tiăr nti, djăt nău mbơh mpeh châu Âu mbra mô rwăt cà phê ta ntŭk roh bri, yor nê kônh wa klach n’hanh dŭt wât n’hanh rgâl. Aƀaơ kônh wa rgum nkra săk geh kơt rnoh ndơ n’hanh uĕh kah cà phê.

Ta xă Lát, nkuăl Lạc Dương đŏng, wa Rolan Cơ Liêng (nuĭh K’ho) lĕ an nuih n’hâm gay ndâk ƀư ndơ moh cà phê geh tâm văn hóa bah rnoi nuĭh nơm đah săk kuăl “K’ho coffee”. Bah âk năm bah năp, “K’ho Coffee” lĕ jêng ntoh măt an ƀô kah cà phê bah yôk prêh Langbiang n’hanh lah ntrong kan ntoh lư mpeh ndơ cà phê kloh uĕh bah nuĭh K’ho.

Nuih n’hâm bah nơm ŭch geh ndơ moh êng bah nuĭh Việt djôt tât an dak bah dih wât n’hanh ryơk. Gâp nsrôih gay dơi geh rnoh khlay bah kônh wa ta aơ. Lah gâp mô nsrôih ăp nău khlay nĕ mô dơi mât uĕh. Đah kônh wa lĕ geh ơm văn hóa, nău way ơm, gâp ŭch tâm rgop tay. Nău khlay tơm lah gâp dôl nsrôih gay ndâk njêng ndơ geh trong nâp nâl jŏ jong.

Tât râng n’hanh ntoh ngơi ta đại hội đại biểu ăp rnoi mpôl đêt n’gor Lâm Đồng rơh tal 4, wa Y Vinh Tơr, Ủy viên dự khuyết Trung ương Đảng, Groi kruanh n’gâng kan, Groi chủ nhiệm Ủy ban Dân tộc djôt dơn, bôk nău kan hun hao wăng sa rêh jêng nkual rnoi mpôl đêt bah n’gor Lâm Đồng geh săk rnglăy lĕ rngôch. Wăng sa, văn hóa, dak si, ntĭm nti, đăp mpăn nău rêh, rnă njrăng bri dak nsum bah nkual Tây Nguyên. Gay mât uĕh tay ăp săk rnglăy dơi geh, wa Y Vinh Tơr an lah, Lâm Đồng an uănh tât tay âk ntil ăp tơm prăk an nkual ƀon lan rnoi mpôl đêt, ntrôl dăng ăp bôk nău kan rƀŏng tĭng lam dak mpeh ndâk njêng thôn ƀon mhe n’hanh n’hŭch ach o nâp nâl.

 Tâm rgop tay, mât uĕh nău geh, nău dơh êng đah neh ntu, trôk nar, bri, di tích, ntŭk ntô pâl nđaih n’hanh nău uĕh văn hóa way ơm bah tĭng nsum mpôl. Gay tĭng nĕ geh nău rêh, nău kan, nău geh prăk đăp mpăn an ƀon lan. Ƀư tĭng nău kơl an rdâk njêng nău kan, gĭt tât ntŭk tăch, mkra pă nău kan an ƀon lan rnoi mpôl đêt.

Đại hội n’gluh an nău rƀŏng tât năm 2030, rĭng geh bôk nuĭh nkual rnoi mpôl đêt geh bah 84 tât 87 rkeh prăk/hê/năm; n’hanh rnoh rnăk ach o hŭch bah 2-3%/năm... Rêng hvi têh dăng ăp ntrong leo rdâk njêng nău kan, tâm rlong pah kan jan sa; uănh tât ntuh kơl mpeh ăp ntil gay hun hao wăng sa rnăk wâl, doanh nghiệp, HTX ta ăp ƀon lan tâm n’gor.