Lôch âk năm hŭch mbro lĕ mpeh rnoh hvi n’hanh săk jêng bri, nău sĭt jêng tay, hun hao bri Dak Lak lah êng n’hanh Tây Nguyên lah nsum, dôl lah nău ŭch geh khlay. Nghị quyết 23 năm 2022 bah Bộ Chính trị hŏ ndơ̆ luh ăp rnoh tât kan, nău dơn kan na nê̆ an ăp n’gor Tây Nguyên tâm pah kan dja. Yơn lah, nău sĭt jêng tay, hun hao bri tâm nkual nha hôm dŭt jêr jŏt đŏng tă bah mô hŏ geh trong n’găp, trong kơl n’hanh tơm  ndơ tâm di gay njêng suan ntrôl wăch rgum nuĭh ƀon lan, doanh nghiệp râng. Gay nkra bah du gâl ăp jêr jŏt, n’gor Dak Lak dôl ntêr ntop tơm ndơ bah he an nău kan khlay dja.  

  Hơi wa, Dak Lak dôl lah n’gor geh rnoh nkŭm n’hâm bri dŭt đêt Tây Nguyên n’hanh đêt rlău rĭng geh nsum lam dak. Aơ lah tă bah pah kan hun hao bri mô hŏ dơi mât uănh khlay di đŏng wa?

Wa Nguyễn Quốc Hưng: Dak Lak rnoh nkŭm n’hâm bri đêt yor ăp rnoh neh uĕh lâng bah Dak  Lak dŭt hvi ta nkual Tây Nguyên. Kơp lĕ ma ta nkuâl Ea Súp mô di neh guh bazan, yơn dŭt lâng n’hanh tuch tăm dơh uĕh đŏng. Bah meng nê, nuĭh ƀon lan dah rŏng ntrơn du lăp tâm Dak Lak, aƀaơ khân păng dôl dŭt jêr jŏt. Gay joi nău rêh ri neh luh tơm bah bri đŏng. Tâl bar lah tơm  ndơ tăm bri aƀaơ ntuh kơl bah ngih dak kơt lah mô geh. Dơn geh tơm prăk kơi trok tăm tay bri ta neh rgâl dŏng tăm bri dơm, rnoh neh dja dŭt huêt đê̆. Ntuh kơl ngih dak mô geh, ăp trong nchrăp kan ODA mô geh, ntuh kơl tăm bri tơm prăk FDI mô geh đŏng. Ŭch hun hao bri dŭt jêr jŏt đŏng.

- Dak Lak geh bar pe jât công ty nông lâm nghiệp, mât dŏng tơm neh dŭt hvi (bơi 220.000ha). Nô nău hun hao bri mhâm mêh hơi wa?

Wa Nguyễn Quốc Hưng: Tăm bri aƀaơ dơn kâp nơm tâm ăp công ty lâm nghiệp n’hanh nuĭh ƀon lan dơm yơn ăp trong kơl mô ăp kôp. Ăp lâm trường aƀaơ tơm prăk rvai lor kơt lah mô geh, mô dơi hun hao bri.

- Tâm rnôk âk jêr jŏt kơt nê̆, Dak Lak mhâm nkra n’hanh nău dơi ntŭk tât tâm bar pe năm mhe aơ mêh hơi wa?

Wa Nguyễn Quốc Hưng: UBND n’gor Dak Lak hŏ geh n’glêh an 1237 nar 24/5/2021 mpeh trong nchrăp tăm bri n’hanh tăm tơm si lvang năm 2021-2025 lah 7.268 ha. Tât aƀaơ mhe khay 9/2024 dơm ri hŏ tăm geh 12.582 ha hôm. Năm 2024 dja, mbra tăm rlău trong nchrăp, nău dơi tăm nklăp 2.500-3.000 ha rđĭl đah trong nchrăp 1.817 ha. Aơ mhe lah tăm bri dơm, hôm tăm chrai tơm ăp năm rĭng geh tăm 200.000 tơm. Ăp năm mpôl hên tăm geh n’hanh rlău trong nchrăp da dê.

-Rnoh bri geh lơh n’hang, rŭn in ntơm nơh dŭt têh (kơt Dak Lak nchih rgum geh nklăp 128.000ha), n’gor moh geh trong ƀư an sĭt jêng tay, hun hao tay neh bri mêh hơi wa?  

Wa Nguyễn Quốc Hưng: 128.000ha dja ntoch dŭt jŏ hôm, nklăp 20 năm hôm, mô di lah mhe dơm ôh, mpôl hên mô dơi ƀư an sĭt jêng tay lam lĕ rngôch. Lah he rôih mât neh an tăm bri yơn tâm rnôk nuĭh ƀon lan ji ngot ri mô geh nău dơi. Mpôl hên mbra tor luh mpơl tay săk, dăp rgum tay n’har neh bri. Nsing tâm dăp rgum bah n’gor hŏ dơi Chính phủ uănh an dŏng n’hanh dăp rgum dŏng neh bah tĭng nkuâl, ntơm bah nê dăp rgum tâm pă neh tuch tăm, neh gŭ an ƀon lan. Moh neh I dăp rgum an tăm bri, geh bri ri mpôl hên mât njrăng ngăn bri. Ntŭk neh roh lĕ bri ri mpôl hên ƀư tăm bri, tăm bri si jê̆, tăm bri si têh, tăm bri nkre đah tuch tăm.

- Nghị quyết 23 năm 2022 bah Bộ chính trị mpeh trong rƀŏng hun hao nkual Tây Nguyên đă ân n’hao rnoh âk nkŭm n’hâm bri tâm nkual, uănh khlay sĭt jêng tay n’hanh hun hao bri. Dak Lak hŏ geh moh trong nkra an nkô̆ nău dja mêh hơi wa?

Wa Nguyễn Quốc Hưng: Tâm rnôk aƀaơ dŭt jêr jŏt rgum tơm prăk gay tăm bri, yơn lah, mpôl hên ân ndăn dŏng n’hanh geh trong rƀŏng an ăp công ty lâm nghiệp tâm ban kơt ăp hợp tác xã n’hanh nuĭh ƀon lan n’hao âk tăm bri. Mpôl hên dôl ntrŭt ntrôl ngăch an ăp doanh nghiệp kơl tơm prăk an ƀon  lan ƀư siƀŭt kơp dơn tăm bri FSC (Siƀŭt kơp dơn tăm bri jŏ jong- PV). N’hanh rnôk bri geh siƀŭt kơp dơn kơt nê ri nuĭh ƀon lan mbra geh dŏng, mô lah doanh nghiệp tăm bri mbra nsĭt nău geh âk lơn, rnoh tăch hao khlay lơn rlău 10%. Bah meng nê, mpeh siƀŭt mpôl hên ntop kơl lĕ n’hâm suan he nơm gay nta trong dơh gay ăp doanh nghiệp, nuĭh ƀon lan tăm bri đŏng.

Nghị định 58 bah Chính phủ mhe n’gluh an dŏng khay 5 năm 2024 hŏ geh du đêt trong kan gay ntop kơl. Mpôl hên dôl rdâk njêng trong nchrăp n’hanh ntĭm nti ăp doanh nghiệp, nuĭh ƀon lan mhâm ƀư rdâk njêng ăp trong nchrăp kan, ăp trong nkra gay dơi Ngih dak ntop kơl tĭng trong mhe.

-Ơ, dăn lah uĕh wa Nguyễn Quốc Hưng, Kruanh Chi cục Kiểm lâm n’gor Dak Lak!