Nar 30/10, Bộ Nông nghiệp n’hanh Phát triển Nông thôn hŏ ƀư Tâm nchră ntrŭt ntrôl ngăch ntuh kơl tuch tăm mât rong, thôn ƀon nkual Tây Nguyên ƀư ta n'gor Gia Lai.

Đah ăp nău dơh uĕh mpeh ntŭk gŭ,  neh ntu, trôk nar n’hâm sial, bri dak âk mpưm, âk ntil, Tây Nguyên hŏ hun hao jêng nkual tuch tăm mât rong geh ndơ tăch têh bah lam dak. Cà phê jêng tơm tăm jong nar khlay bah Tây Nguyên đah  bơi 668.000ha. aơ lah nkual  tăm cao su têh tâl 2 bah kơi Đông Nam Bộ đah rlău 250.000ha. Ndrel đah nê, nkual Tây Nguyên geh rlău 4 rkeh sŭr ndrôk, rpu, 30 rkeh mblâm kik  djăr…Tâm nchră hŏ n’gluh ăp trong nkra gay mât dŏng geh nău tam ăp săk geh, dơh uĕh mpeh hun hao tuch tăm bah nkual Tây Nguyên. Tâm nê, rgum tâm ăp trong nkra gay droh rklaih ăp kŏ kol jêr jŏt, kô̆ yơn gay ntrŭt ntrôl  ngăch ntuh kơl tâm trong kan tuch tăm mât rong, nkah pơk trong rƀŏng hun hao tuch tăm mât rong ăp n’gor nkual Tây Nguyên tâm nô nău mhe, rơh mhe.