Bar pe nar aơ, wa Võ Đình Việt, ta thôn Lạc Nghiệp, xã Tu Tra, nkuăl Đơn Dương, n’gor Lâm Đồng kơt lah gŭ ta ŭnh rnga yor mô dơi joi prăk trok rnon ngân hàng. Lôch geh chuh Vacine pŭn ntô Navet - LpVac bâh công ty Navetco, mpôl ndrôk sŏk dak toh 80 mblâm bâh rnăk vâl lĕ geh ji ndul djroh da dê. Tâm nĕ, 11 mblâm lĕ khĭt, 12 mblâm rlih bŭn, 5 mblâm dôl kâp khĭt, ăp rnoh hôm e geh nău ji hô, mô hôm dơi geh dak toh kơt ntơm. Rlău ma nĕ, gay ma mât săm ndrôk, rnăk vâl wa lĕ sŏk rlău 1 rmen prăk rvăt dak si. Tĭng wa Võ Đình Việt, nău khuch khat mpeh wăng sa đah mpôl ndrôk sŏk dak toh lah dŭt têh yơn Công ty Navetco ndơ̆ rnoh tâm trok hôm nha đê̆ lơn đah rnoh ndrôk rêh ta ntŭk tăch rgâl bah dih.

“Gâp geh ndơ̆ nău tâm rgop lah tâm trok 50 rkeh du mblâm ndrôk khĭt, hôm ndrôk rlih bŭn rĭ trok an hên geh 30 rkeh prăk. Yor ndrôk lĕ rlih bŭn rĭ mô hôm dơi sŏk dak toh tay, đă trok 30 rkeh prăk lah let năp tay đăp mpăn rĭ gâp tăch ndrôk nĕ geh 10-15 rkeh prăk, ndrel đah prăk trok an 30 rkeh prăk tay rĭ gâp mơ dơi njêng tay nău kan mât rong. Lah mô geh trok 30 rkeh prăk ma kơt rnoh geh mbơh rĭ mpôl hên kanŭng nklơi nău mât rong ndrôk, mhâm ma dơi rong tay,  ntŭk hôm ndrôk ma rong”.

Rnoh trok mhe ngăn ma Công ty Navetco ndơ̆ mbơh, đah ndrôk sŏk dak toh geh khĭt rnoh trok an 60 rkeh prăk/kg ndrôk rêh, 70 rkeh prăk/kg ndrôk geh bŭn, 80 rkeh prăk/kg ndrôk deh kon mô hŏ bŭn n’hanh 85 rbăn prăk.ndrôk deh kon geh bŭn...Tĭng nău mbơh bâh wa Trần Quang Huy, nuĭh mât rong ndrôk sŏk dak toh ta thôn Lạc nghiệp, xã Tu Tra, nkuăl Đơn Dương, rnoh tâm trok aơ bâh Công ty Navetco kanŭng dah 1/3 rnoh khuch khat bâh ƀon lan.

 “Nău khuch khat rlău ma nău ŭch bâh nuĭh ƀon lan n’hanh công ty, yơn mpeh đah công ty an geh uănh n’hêl, kơl an gay ma nuĭh ƀon lan njêng tay nău mât rong bâh 70-80%, ăp nuĭh geh tâm rdâng đah nău khuch khat du đê̆. Lah aƀaơ nuĭh ƀon lan geh nău roh khuch âk, công ty trok đê̆ ir, prăk tăch lĕ ndrôk, ndrel đah prăk kơl an mô tŏng trok ngân hàng rĭ ntŭk ma sŏk ndrôk mât tay, mât rŏng pah kan tay”.

Tĭng nău mbơh bâh wa Trần văn Hiếu, Kruanh Hội nông dân thôn Bồng Lao, xã Hiệp Thạnh, nkuăl Đức Trọng, Công ty Navetco mbơh êng rnoh trok khuch khat mô geh knơm uănh ôp đah ăp ding. Kanŭng kơp êng ndrôk sŏk dak toh ntil ta ntŭk tăch rgâl aƀaơ geh rlău 70 rkeh prăk/mblâm, tâm rnôk rnoh trok ê hŏ tŏng du n’gul rnoh khlay ndrôk rĭ ƀon lan mô dơi ndâk nsơm tay nău mât rong tay. Ntop ta nĕ, Công ty Navetco kanŭng kơp êng ta rơh tâm trok kơl an bâh nar ntoh geh nău ji bôk năp ta ndrôk an tât nar 26/9/2024 lah mô tâm di, yor tât aƀaơ ndrôk hôm nha geh nău ji tay n’hanh geh khĭt. Wa Trần Văn Hiếu ngơi.

 “Ntrong kan tâm trok way công ty geh ndơ̆ mbơh mô geh ôp uănh du ntŭk kan tâm di khoa học. Công ty mbơh lĕ geh djăt ăp ntŭk kan pă ntil ndrôk rĭ nuĭh ƀon lan đă lah an geh mbơh na nê̆ lah mơh ntŭk kan gay ma geh tâm rđil, yor rnoh rvăt ndrôk sŏk dak toh aƀaơ mô geh thuk. Ntĭt lah ta Dalat Milk geh rnoh geh bâh 70-85 rkeh prăk/mblâm ndrôk, hôm công ty ndrôk sŏk dak toh Châu Á Thái Bình Dươwng rnoh khlăy 85-86 rkeh prăk/mblâm. Nđâp ma ăp nău nchrăp kan bâh ngih dak kơt nău kan hun hao ndrôk mhe nơh bâh nkuăl Cát Tiên n’gor Lâm Đồng rĭ du mblâm ndrôk geh rnoh khlăy bâh 75-85 rkeh prăk hôm mô geh ndrôk i thuk kơt công ty mbơh”.

Kơp tât rnôk aơ, ntŭk kan têh ta Lâm Đồng kơp dơn geh rlău 6.800 mblâm ndrôk sŏk dak toh geh ji ndrul drjoh lôch chuh vacxin pŭn ntô săk Navet-LpVac yor công ty Navetco nkra ƀư, tâm nĕ geh bơi tât 500 mblâm ndrôk lĕ khĭt. Gay ma kơl an ƀon lan mât rong, nar 20/8 mhe nơh, UBND n’gor Lâm Đồng lĕ ntrŭnh nău ntrŭnh njêng rmôt kan kơl tâm trok nău khuch khat ta ndrôk sok dak toh geh nău ji ndul djroh yor chuh vacxin pŭn ntô ta săk. Yơn lah, bâh nĕ tât aƀaơ, rmôt kan aơ ê hŏ geh nău kan tâm nău kơl tâm trok nău khuch khat an ƀon lan kan lŏ mir.

Quang Sáng.