UBND n’gor Lâm Đồng mhe ƀư tâm nchră uănh năl jêh geh tĭng ƀư n’hanh ăp jêr jŏt, kŏ kol tâm nău hun hao pâl nđaih tuch tăm. Âk nkô̆ nău khoah dôl dơi n’gor ndăn ngăch droh rklaih gay ntrŭt ntrôl ntil trong pâl nđaih gay rlong saơ uĕh dja hun hao tâm di đah săk geh dôl geh aƀaơ bah n’gor.

Lôch rnôk UBND n’gor Lâm Đồng geh nău n’glêh n’glêh an đề án rlong rdâk njêng ăp trong ntĭt leo pâl nđaih tuch tăm ta nkual tâm kêng dŭt năm 2015, tât năm 2018, n’gâng kan pâl nđaih n’gor Lâm Đồng hŏ kan nsum đah ăp đơn vị geh  tât ƀư uănh năl di n’hanh kơp dơn 33 ntŭk pâl nđaih tuch tăm. Ntơm bah nê, ndơ geh ƀư an pâl nđaih tuch tăm ta n’gor Lâm Đồng hŏ tĭng kơn ntik n’hao suan dăng, wăch rgum rlău 7 rkeh năch tât hăn uănh pâl n’hanh rlong saơ, nsĭt tơm geh wăng sa âk an nuĭh ƀon lan ta ntŭk.

Yơn lah, tă bah mâp âk mpêr n’gar nking kol ăp quy định bah pháp luật dôl dŏng aƀaơ, tâm ban kơt mô hŏ geh ăp trong ntĭm nti na nê̆ bah ăp n’gâng kan Trung ương geh tât jêng nău hun hao pâl nđaih tuch tăm ta n’gor Lâm Đồng mâp âk jêr jŏt. Lơn lah ăp quy định mpeh rnoh tât rdâk njêng ta neh tuch tăm, rgâl neh tuch tăm jêng dŏng ndơ êng ƀa ƀă, dăp rgum dŏng neh, rnoh srêt rdâk njêng geh chor ntưm v.v… Tĭng wa Lê Thị Quỳnh Như, Tuch tăm mât so mƀrô ta phường 7, nkual ƀon têh Đà Lạt, ăp nău khoah dja jêng tât nău hun hao pâl nđaih tuch tăm ta ntŭk kơt lah tŭp tâm trong dŭt.

“Ntŭk tuch tăm geh mât so mƀrô, nkre geh ăp ndơ ƀư ntĭt êng bah Đà Lạt kơt dâu tây, blân srat, si lat tăm ma dak… ri dơi geh âk năch pâl nđaih weh chop khâl gay uănh pâl, rlong saơ. Yơn lah, ân geh ntŭk nsrŭng ndeh, geh nkual tuch tăm, geh ntŭk pla ndơ, wơt năch, nkual ăch chrach, ntŭk  tăch dak v.v… ăp ntil ndơ dja ân geh gay  ma wơt năch yơn rnôk ƀư ri mâp kol tâm nău tih rĭng grep rdâk njêng”.

Lah n’glôch jêh tâm nchră, wa Phạm S, Groi kruanh UBND n’gor Lâm Đồng lah rjăp, săk geh hun hao pâl nđaih tuch tăm  bah n’gor lah dŭt têh yơn tâm rnôk an tĭng ƀư hŏ mâp âk mpêr n’gar nking kol, tâm nê dŭt jêr jŏt lah  ăp wăk kol Luật pâl nđaih, Luật neh ntu n’hanh Luật rdâk njêng. Gay ntrŭt ntrôl pâl nđaih tuch tăm hun hao dăng, geh nău dơi đăt ndal tâm let năp tay, n’gor dôl rđău đă ăp nhih pah kan dơi kan rdâk njêng trong nkra dŏng neh âk ntil ndơ ƀư an pâl nđaih tuch tăm nkre đah ăp quy định kloh rvah, na nê̆ hao rblang dăn gưl geh nău dơi kan uănh an ƀư. nău tĭng ƀư dja nsing tâm Luật neh ntu năm 2024 n’hanh ăp siƀŭt quy định na nê̆ an dŏng geh tât. Wa Phạm S, an gĭt:

“Ăp trong nchrăp  kan pâl nđaih tuch tăm geh neh rdâk njêng mô lah du trong nchrăp kan êng ri dăn đă lah rdâk njêng tĭng du trong nchrăp kan ntuh kơl n’hanh njuăl Sở Kế hoạch n’hanh Đầu tư uănh năl di rêng. Rmôt tâl bar lah neh tuch tăm êng du ntil ma he dŏng âk ntil tă bah du rnăk nuĭh ƀư êng ri njuăl na nê̆ an Phòng Tài nguyên n’hanh Môi trường, UBND gưl nkuâl uănh an dŏng. Đah neh tuch tăm dŏng âk ntil ndơ tă bah mpôl dŏng ri rdâk njêng lĕ rngôch nkô̆ njuăl Sở Tài nguyên n’hanh Môi trường uănh năl di ngăn đŏng, hao rblang dăn nhih pah kan geh nău dơi n’glêh an. Bar nkô̆ dja êng êng, du ntil lah trong nchrăp kan geh rgâl neh rdâk njêng, hôm  du ntil lah neh dŏng âk ntil ndơ ri rdâk njêng tĭng trong droh, ntrŭp, mô kâp rgâl dŏng neh yor păng ơm lah neh tuch tăm”.

Wa Phạm S jao sở, n’gâng kan, nkuâl geh tât, ra tay ăp ntŭk pâl nđaih tuch tăm hŏ dơi kơp dơn, ntĭm nti ăp đơn vị leo ăp đơn vị kơi ntop, ƀư wat jêh ăp ndơ nchrăp gay dăn đă uănh năl di tay n’hanh kơp dơn trong ntĭt leo pâl nđaih tuch tăm; rgum ăp nău rgop, dăn đă bah đại biểu gay ntop, wat jêh ăp nkô̆, rnoh tât kan n’hanh mbơh Ủy ban nhân dân n’gor mĭn uănh, kơi ntop, rgâl nkra nău way đă tĭng tâm di đah nô nău ngăn ngăn, gay ntik n’hao ăp săk geh, dơh uĕh dôl geh aƀaơ, hun hao pâl nđaih tuch tăm tĭng di trong rƀŏng hŏ ndơ̆ luh.