Ôi 3/10, N’gâng kan Văn hóa Thể thao n’hanh Pâl nđaih Dak Nông tâm rgop đah Câu lạc bộ ndeh địa hình Sài Gòn ƀư giải tâm rlong ndeh ntŭl rlong địa hình tâm bri. Giải tâm rlong geh 79 rmôt tâm rlong đah 158 nuĭh tâm dak, du rmôt tâm rlong dak bah dih, râng đah âk ntil ndeh n’hanh hãng ndeh. Đah dĭng lĕ prăk nkhôm rlău 500 rkeh prăk, giải tâm rlong pă jêng âk ntil tâm rlong, geh: mạo hiểm, nâp cấp n’hanh chuyên nghiệp.

Giải tâm rlong ƀư ta Nkual ƀon têh Gia Nghĩa n’hanh nkual bri Nâm Nung, xă Nâm Njang, nkuăl Dak Song. Mpôl rdâk ƀư lĕ nkra 25 trong tâm rlong n’hanh ăp ntŭk an nuĭh uănh. Wa Hồ Anh Tuấn, Groi kruanh Câu lạc bộ ndeh hao sop nkăp Sài Gòn, Kruanh mpôl rdâk ƀư an gĭt, giải tâm rlong gay ndâk njêng ntrong leo thể thao ô tô hao sop nkăp uĕh lăng tâm dak. Giải tâm rlong mô knŭng djôt tât ăp nău ƀư joi ngăn n’hanh n’gŭr răm an ăp nuĭh ŭch ncho ndeh ngăch, aơ lah di an kuăl tay nău geh pâl nđaih bah nkual neh Dak Nông.