Wa H’Rưm Hmok, tâm ƀon Hra Ea Hning, xã Dray Bhăng, nkuăl Cư Kuin, Dak Lak, nkoch: năm 2020, rnôk rlau 60 năm, n’hâm mô hôm ri ma păng mô dơi pah kan jâk. Gay geh prăk rong nơm ndrel kon nơm, wa H’Rưm Hmok mĭn nau ndâk nkra tay n’gâng njuh gay ma tanh. Rnôm hôm jê̆, wa H’Rưm geh me păng ntĭm ân. Tât têh, wa H’Rưm mô geh nŭih ban ơm nau blau. Rnôk tanh tay, ăp nar khlay gơih tanh, bok bah H’Rưm mô tŏng ân bu ŭch rvăt. Yor păng blau tanh Kteh. Nau aơ bu blau ngăn mơ blau tanh cheh bah rnoi Rđe, mô âk nŭih blau ôh.

            Tâm ƀon Hra Ea Hning geh du đê̆ bu ur mô hôm dăng kan mir ri ma nau văng sa mô geh. Bu ŭch hăn tanh ân wa H’Rưm. Ndri lah năm 2021 rmôt tanh njuh bah ƀon Hra Hning ntơm njêng, geh 6 nŭih. Wa H’Rưm nơm ƀư tơm, ndrel ăp nŭih ntĭm ân nau tanh Kteh, wa H’Rưm Hmok ƀư nau leo tăch ndơ ân ăp nŭih:

            ‘Tanh njuh hŏ njêng ân gâp geh tay prăk. Yor gâp lĕ ranh mô dơi hăn kan mir ri ma tanh njuh. Rnơm tanh njuh ma oh nur geh kan pah, geh prăk đŏng. Gâp rhơn yor rnôk nơm ranh ma hôm geh nau kan gay ma ƀư. Du khay gâp geh 4 rkeh, ndri ma nau rêh gâp geh đăp mpăn lơn”.

            Yuh H’Neo, nŭih tanh nsum bah ƀon Hra Hning mboh; Yuh rânh tanh njuh nsum bơi tât 3 năm ma aơ. Rnôk bôk năp ăp yuh mô geh ntŭk ân n’gâng njuh ri ma hăn manh nâm ndjrôm ngih bu tâm ƀon:

            ‘Ntơm rnôk geh tanh njuh tât rnôk aơ ri nau rêh gâp geh âk nau nơih. Du khay ri gâp tanh geh 4 blah, geh 4 rkeh. Tâm rmôt tanh njuh ri hên jêr jŏt da dê. Tâm 6 oh nur tanh njuh nsum ri hên kŏ geh oh nur jêr ngăn đŏng”.

            Njuh lôch tanh bah rmôt tanh ƀon Hra Hning geh bu năch ŭch ngăn. Năm 2022 ntŭk kan rmôt Từ Tâm Dak Lak bonh đă rgop pă nkra du ngih jong rnoh 300 rkeh. Ngih aơ geh ndâk nâp tâm nklang ƀon, êp ngih rƀŭn ƀon. Ntơm bah nê ăp nŭih geh ntŭk pah kan nơih lơn.

            Yuh H’Tin Hmok, cán bộ ƀon Hra Hning, mô râng nau kan tanh njuh ƀa ƀơ joi gĭt nau kan gay ma kơl an ân ăp yuh, ngăn lah kơl an khân păng nau mbơh, tăch njuh. Yuh H’Tin Hmok, ngơi:

            ‘Rnoi Rđe phung hên mro uănh khlay ngăn nah ao tanh bah rnoi nơm. Bu ur rnoi rđe ŭch njroh nah ao tanh, ndri ma nah ao tanh hôm geh mât ndray ngăn. Nah ao tanh geh ntơm bah ơm kăl e ri ma kon sau rnôk aơ hôm geh mât, hôm dŏng”.

            Wa Y Xuyên Byă, Groi Kruanh UBND xã Dray Bhăng mbơh: Ƀon Hra Ea Hning geh rlau 400 rnăk, ngăn lah rnoi Rđe. Nau rêh văng sa bah kônh wa nsing tâm tuch tăm. Rnôk aơ hôm rlau 100 rnăk ach o, rlau 50 rnăk êp ach o. N’gâng kan xã rnê ngăn nau kan oh nur râm ƀon blau ndâk nau kan tanh njuh, nkre mât nau ơm, nkre geh tay prăk gay đăp mpăn nau rêh. Mpeh nau ndŏ luh rnôk aơ lah rơh mom ê ŭch ngăn ma nau kan ơm kơt lah tanh nah, tanh dônh, ê nkra ndơ ơm, tanh njuh.

Yor ân geh blau ngăn ăp nau kan aơ ri ân geh rnôk ƀư kan bah ơm, bah jŏ. Yơn nau geh jêng bah nau văng sa lŏ mô geh âk tâm ban ma nau kan êng. Wa Y Xuyên Byă ân lah: Nŭih tanh ân geh rêh dơi ma nau kan nơm ƀư, ndơ nơm, tanh, rnôk nê mơ dơi geh ƀư kơt tĭng:

            ‘Tâm ƀon Hra Ea Hning geh ntŭk tanh njuh bah oh nur bu ur. Rnơm nê ma oh nur geh nau kan đăp mpăn. Bol ma rnoh prăk geh nsĭt bah nau kan aơ ê âk, ê tâm ban ma ma n’hâm nơm. Khân păng tanh njuh gay geh kan pah mô di lah leo nsŏt nau văng sa âk, ri ma mô geh nau tâm di nuih, nau ŭch bah nŭih druh ndăm, kon se”./.