VOV4.M’nông: Nghị quyết mrô 05 bah Ƀan chấp hành Đảng bộ nkuăl Lăk, n’gor Dak Lak mpeh “kruanh ƀư rgâl ntil tơm tăm, mpa rong lvang 2021-2025”, jêh bơi du năm ƀư tĭng lĕ geh n’hâm rêng lam hvi, pơk trong n’hŭch ach o nâp nâl an kônh wa ƀon lan rnoi mpôl đêt ta nkual dŭt jêr jŏt aơ.

          Nău ntoh lư bah Nghị quyết 05 bah Đảng bộ nkuăl Lăk, n’gor Dak Lak rgŏ jă lĕ trong chính trị bah nkuăl tât thôn, ƀon lăp ndrel. Cán bộ, đảng viên ntrong leo tât râng lor, đah nuih n’hâm lĕ nău kan “êp ƀon lan, yor ƀon lan, mât uănh an ƀon lan”. Mô dŏng tơm prăk, lam nkuăl rgŏ jă rgop bah cán bộ, đảng viên; ăp ngih pah kan, ntŭk kan, doanh nghiệp njêng oh nô đah ƀon lan rnoi mpôl đêt rgop prăk rwăng hang rhiăng rbăn tơm tăm an ăp rnăk ach o; ntĭm kỹ thuật tăm, mât chăm. Tâm năm bôk năp ƀư tĭng, nkuăl Lăk rgâl mhe têh dăng rgâl ntil tơm tăm, nkŭm nđĭr neh soih hil.

          Ta ƀon Dơ Tu, xă ƀon Triết, nkuăl Lăk, n’gor Dak Lak, ăp mir soih hil, ăp yôk ntlơi săr aơ lĕ dơi nkŭm nđĭr yor ăp jay lĕ dơi ăn tơm tăm, ntĭm kỹ thuật tăm mât chăm tâm di. Nô Y Jony Byă, ta ƀon Dơ Tu, xă Ƀuôn Triết, nkuăl Lăk, rhơn yor lĕ ngăch tăm srah âk tơm play đŭr thái bah năp yan mih aơ lĕ uĕh jêng rlău 4 sào mir.

Bí thư Nkuăl ủy Võ Ngọc Tuyên an tơm ntil kônh wa xă Ƀon Triết

          “Rnăk wâl gâp dŭt lah uĕh nkuăl, xă lĕ an ntil tơm sa play gay rgâl tơm tăm ta neh mir bah gâp tĭng trong tâm srah. Rnăk wâl mbra nsrôih mât chăm gay hun hao tay wăng sa đah tơm sa play, mbrơi mbrơi bah nĕ rklaih ach o”.

          Ta xă Yang Tao, nkuăl Lăk, mir tơm play đŭr thái tăm srah bah wa Y Gham Triết, ta ƀon Phốk lĕ chăt reh hun hao uĕh jêh khay jŭr ntil. Y Gham an gĭt, mô knŭng dơi an âk tơm ntil, cán bộ nkuăl, xă hôm tât mir ntĭm tăm n’hanh mât chăm jêng tơm hun hao uĕh. Dơi wât nkô̆ nău rgâl tơm tăm tâm di, wa Y Gham Triết nchrăp yan mih aơ mbra tăm tay lam mir ntlơih soih âk năm:

          “Rnăk wâl gâp dơi xă an tơm tăm. Gâp dŭt lah uĕh Ngih dak lĕ kơl. Gâp mpŏng Ngih dak an tay tơm tăm gay gâp tăm tay tâm mir aơ, nsrôih hun hao wăng sa”.

          Wa Nguyễn Văn Huyên, Bí thư Đảng ủy xă Yang Tao, nkuăl Lăk, an gĭt, aƀaơ hin lam xă lĕ pă rlău 7.000 tơm sa play geh play đŭr thái, play đung xiêm, mẵng cầu an 1.473 rnăk ach o. Ndrel đah nĕ, ƀon lan lĕ ndâk ƀư 22 ntrong kan tăm play đŭr thái ta 11 ƀon bah xă gay kônh wa nti; rgŏ jă tay ăp ntŭk kan njêng oh nô, nuĭh lŏng bôk tôr rwăt tay tơm ntil gay ntop kơl kônh wa:

Ăp tơm ntil mô sok prăk ntop kơl rnăk ach o

          “Mpôl hên lĕ hăn uănh lĕ rngôch neh ta nkual bah năp đaơ nuĭh ƀon lan đêt rgâl. Mpôl hên đă kônh wa nuĭh ƀon lan lor lah nkra dăp rgum tay mir bah nơm, gay nchrăp an rgâl mpa rong, tơm tăm tĭng Nghị quyết 05. Jêh rnôk ƀư nkoch trêng, mpôl hên lĕ rgŏ jă kon nuĭh tâm rgop lĕ rngôch ăp rmôt kan, doanh nghiệp, kơt êng nuĭh cán bộ, đảng viên ta nkual rgop. Đah xă mpôl hên lĕ rgŏ jă, rgop rlău 10 rkeh prăk gay rwăt ntil play đŭr thái. Tơm play đŭr lah tơm geh âk nău ŭch n’hanh gay jŭt jăng ach o an kônh wa tâm lvang tât”.

          Lăk lah nkuăl geh rnoh rnăk ach o âk tal 2 bah n’gor Dak Lak đah rlău 27%. Tâm nĕ, ta 90 ƀon rnoi mpôl đêt, rnoph rnăk ach o hôm 60%. Âk năm bah năp, dŭt âk rnăk ach o hôm e an “mir dơm, jay nsoih”, neh ntu săr, jêng tât trong kan jŭt n’hŭch ach o hôm e âk trong rblang. Wa Võ Ngọc Tuyên, Bí thư Nkuăl ủy Lăk an gĭt: Jêh bơi du năm mbơh ƀư cán bộ, đảng viên ăp gưl lĕ rgŏ jă, an geh rlău 100 rbăn tơm sa play ăp ntil, tâm nĕ lah play đŭr thái, sầu riêng, cam, play bung, play rba, play khoăr, play đung khlay rlău 2 rmen prăk. Bơi 10.000 rnăk ach o lĕ dơi dơn ntop kơl n’hanh kônh wa lĕ rgâl tơm tăm, nkŭm nđĭr geh rlău 200 ha neh nsoih, neh săr.

Kônh wa tăm tơm ntil sa play

          “Nghị quyết an dŭt ngăn ngên săk rnglăy n’hanh geh soan rêng lam hvi dŭt âk. Tât aƀaơ hin nkuăl Lăk mô hŏ dŏng tơm prăk, tât aƀaơ mpôl hên lĕ rgŏ jă ăp ntŭk kan njêng oh nô an tơm ntil an ăp ƀon dơi njêng. Tâm đêt khay bah 5/3 tât aƀaơ lĕ tăm geh rlău 100 rbăn tơm ntil ăp ntil. Dơi saơ nău tâm rŏng, lĕ nău kan bah Đảng, Ngih dak đah ƀon lan, lơn lah ƀon lan rnoi mpôl đêt”.

Nghị quyết mrô 5 bah Ƀan Chấp hàng Đảng bộ nkuăl Lăk, n’gor Dak Lak dơi ƀư lĕ n’hanh dôl dơi dơn geh nău tâm ban ŭch kơl âk bah cán bộ, đảng viên n’hanh nuĭh ƀon lan. Bah nĕ rgop an nău rgâl tâm nău mĭn trong ƀư bah kônh wa ta ăp thôn, ƀon, nkre ntrôl nkra njêng, pơk trong n’hŭch ach o nâp nâl ta ntŭk aơ.

          Nuĭh rblang: Y Sưng Phê Ja