Dôl tâm yan pĕ lê̆ cà phê. Dơi săk geh, lŏ duh nar dơi khlay jêng nuĭh tăm cà phê ta ƀon Bu Nduh, xă Dak Wer, Dak Rlâp (Dak Nông) ăp nuĭh dŭt rhơn. Rnăk wâl Điểu Suynh ta ƀon Bu Ndoh geh 7 ha neh tăm tiêu, sầu riêng, mắc ca. Tâm nĕ geh 4 ha cà phê dôl tâm năm play hô ngăn. Năm e dơi geh 10 tấn cà phê rlăy, năm aơ nchrăp rlău 13 tấn. Yan bah năp, cà phê knŭng ta rnoh khlay 40 rbăn/kg, aƀaơ rnoh khlay hao rlău n’gul, bơi 60 rbăn/kg. Điểu Suynh an gĭt: Âk nar aơ ur nô geh duh rtoh luh mham rih dôl săm ta ngih dak si n’gor. Măng nô hăn ngih dak si mât ur, yơn ôi ơm lĕ geh măt ta mir gay tâm pă, mât uănh rlău 10 nuĭh dôl pĕ cà phê an rnăk wâl. Âk năm aơ, Điểu Suynh dơi kônh wa nsing nơm săch ƀư kruanh thôn Bu Ndoh jêng tâm yan pĕ cà phê, nô lơ ntop tay mô ru đah ăp nău kan: Tâm pă kônh wa kâp njrăng mir gay njrăng nuĭh ntŭng; aơ ri rgŏ jă knŭng pĕ lêh cà phê dŭm gay đăp mpăn uĕh kah. Điểu Suynh an gĭt: tâm ƀon geh tât 31 rnăk manh prăk bah ngân hàng gay ntuh kơl nkra njêng. Êng rnăk wâl nô bah năp đaơ geh rnôk manh ngân hàng rlău 1 rmen prăk. Yơn lĕ trok mbrơi mbrơi, aƀaơ knŭng rnon 400 rkeh prăk, tâm rnôk ngih wâl, mir ba bah nô khlay mô tât 15 rmen prăk.

“Ngân hàng Agribank Nhân Cơ ntă an mpôl hên manh kơl an bah năm 2012 tât aƀaơ. Rnôk bah năp âk kônh wa mô hŏ gĭt prăk manh kơl an bah Agribank, kônh wa hăn manh bah dih đah prăk kon dŭt âk. Bah rnôk geh tơm prăk bâh Agribank mpôl hên lĕ geh prăk nkra njêng, mât chăm cà phê, cao su... Bah nĕ mpôl hên dơi hun hao wăng sa rnăk wâl, rgop rgâl muh măt thôn ƀon”.

Mô knŭng ta Dak Rlâp, ma kônh wa nuĭh Bunong ta nkuăl jru ngai, n’har bri Tuy Đức bah n’gor Dak Nông gĭt tơm prăk bah Agribank du trong dơh lơn. Nău aơ mô knŭng ntrôl rŭch nău manh prăk kon khlay ma kơl kônh wa tơm prăk gay rwât dak si, phân poh mât chăm tơm tăm ngăch. Aƀaơ lĕ geh 237 rnăk nuĭh Bunong dơi manh 44 rmen 800 rkeh prăk ta Agribank Tuy Đức gay ntuh kơl nkra njêng. Nô Điểu Jâng ta ƀon Diêng Ngaih xă Dak Rtih an gĭt: Tă aơ 2 năm nô lĕ manh 500 rkeh prăk gay rwăt phân poh n’hanh ntil tơm mắc ca, sầu riêng sĭt tăm ta nkual mir 3 ha. Aƀaơ mir hun hao uĕh, mbra geh âk play:

“Bah rnôk geh prăk manh kơl an bah Ngân hàng Nông nghiệp Phát triển Nông thôn, gâp lĕ ntuh kơl tăm, mât chăm cà phê, tiêu, sầu riêng... Dŭt âk gâp rwăt phân an tiêu, cà phê, mắc ca n’hanh sầu riêng... Bah tơm prăk aơ dŭt săk rnglăy đah mpôl hên, prăk kon dŭt đêt jêng kônh wa dŭt đăp mpăn”.

Wa Thân Văn Chí, Groi Giám đốc Agribank ta Dak Nông an gĭt: Agribank Ta Dak Nông geh ntŭk kan tât lĕ rngôch ăp nkuăl tâm n’gor đah 14 ntŭk kan tăch rgâl. Cán bộ an manh prăk wât ntŭk ntô, jêng an manh di nuĭh n’hanh khân pơng dŏng prăk di nău ŭch, mât uĕh săk rnglăy. Tât aƀaơ lĕ geh 3.500 rnăk rnoi mpôl đêt ta ntŭk dơi manh prăk bah Agribank gŭ ta Dak Nông đah rnoh nkah rnon hao tât 570 rmen prăk.

“Tă bah tơm prăk bah nơm, mpôl hên kơl kônh wa n’hŭch geh nău manh prăk kon khlay ta bah dih ma mpôl hên saơ năm mhe rlău lĕ ƀư dŭt âk nău mô uĕh an ăp rnăk wâl. Bah meng nĕ nău pa ưan prăk, ri mpôl hên nchrăp ăp nău ƀư đăp mpăn nău rêh jêng kon nuĭh, ndâk ƀư ăp jay gŭ an ăp rnăk geh nău rêh jêr jŏt. Năm bah năp mpôl hên ƀư dŭt uĕh nău kơl aơ. Geh dŭt âk rnăk tât mpôl hên mbra mât uĕh săk rnglăy ăp nău ƀư gay geh tơm prăk dơi tât âk lơn đah kônh wa gay rgop kơl kônh wa geh nău rêh đah nău dơi wăng sa nar lơ uĕh lơn”.