Rnăk wa H’Sắk ta ƀon Mơ Nú, xă Chư Á, nkual ƀon têh Pleiku geh 7 nuĭh, rêh tâm jay cấp 4 lĕ dơi ƀư bah jŏ. Sai wa H’Sắk lĕ roh yor kop ji, săk wa mât rong tay oh sai geh koet bah ndŭl me jêng nău rêh dŭt jêr jŏt, prăk kaih knơm hăn pah kan bu. Gay kơl rnăk wâl wa H’Sắk hun hao, “Nău nchrăp ƀư âk ntil joi trong nău rêh, hun hao ntrong ƀư n’hŭch ach o” lĕ kơl 1 mlâm ndrôk me. Wa H’Sắk dŭt răm rhơn jêh 2 năm mât rong, wa lĕ saơ geh săk rnglăy.

Lah uĕh n’gâng kan ƀon lan lĕ uănh mĭn tât ăp rnăk jêr jŏt kơt mpôl hên, knơm nău kơl aơ ma mpôl hên geh ndơ hun hao tâm nău rêh, gâp lah uĕh.

 Tĭng wa Nguyễn Thu Hương, Groi Kruanh UBND xă Chư Á, rlău ma hun hao mât rong bah kon ntil ma n’gâng kan ƀon lan ntop kơl, trong kan n’hŭch ach o ta n’gor hôm e mât săk rnglăy tă bah nău an manh prăk kơl an, rgâl nău kan. 3 năm bah năp, xă lĕ pă 42 mlâm ndrôk an rnăk ach o, ntop kơl prăk rgâl nău kan an 10 rnăk n’hanh an 8 rnăk manh prăk kơl an... Wa Nguyễn Thị Thu Hương an gĭt:

Ăp năm xă kơl an mro ăp bôk nău kan, nău nchrăp ƀư, ntrong kan joi trong nău rêh yor nkual ƀon têh Pleiku n’hanh xă ntop kơl tât ăp rnăk ach o, rnăk êp ach o đah dak si, ntĭm nti, jay gŭ, manh prăk kơl an prăk kon, ntĭm nti nău kan geh săk rnglăy, bah nĕ rgop rgâl nău rêh, n’hao dơi gĭt ăp nău rhŏ kon nuĭh tât đah rnăk ach o n’hanh rnăk êp ach o.

N’hêl na nê̆ an saơ, ăp rnăk ta nkual ƀon têh Pleiku n’gor Gia Lai geh nău rêh n’hanh nău ŭch dơi kơl êng êng. Kơt wa Trần Thị Phương, 50 năm deh, ta thôn 4, xă Trà Đa, nkual ƀon têh Pleiku, jêh rnôk khar yor ăp prăk dŏng săm ji an nuĭh rnăk wâl geh ji ung thư, lơ ŭch geh âk nău kơl. N’hanh n’hêl na nê̆, bah n’gâng kan xă, rmôt bu ur, ăp nuĭh lŏng bôk tôr... lĕ ndrel ty, kơl wa rlet rlău jêr jŏt. Wa Phượng nkah gĭt kơt ơm ăp ndơ kơl khlay nĕ, bah ăp nar piăng sa tât jay gŭ:

Rnôk jêr jŏt ngăn n’gâng kan ƀon lan lĕ kơl rnăk wâl gâp geh du mlâm jay gŭ, ăp ban nău kan ntop kơl an ăp kon gâp geh ăp piăng sa ăp nar rnôk jêr jŏt nĕ. Aƀaơ ăp kon se nti gay rlaih luh ach o. Rơh sai gâp kop ji yor rnôk nĕ gâp gŭ ngih dak si an manh đă bu pĕ lêh, du mbăt rnôk ji ngot du nklâm rnôk hơm, gâp dŭt rngot.

Ƀư tĭng bôk nău kan mrô 31-Ctr/TU lơ 3/11/2021 bah Ban Chấp hành Đảng bộ nkual ƀon têh Pleiku khóa 12 “Mpeh ntrôl dăng trong kan n’hŭch ach o nâp nâl, n’hao uĕh nău rêh nuĭh ƀon lan, ngăn lah ta ăp ƀon lan rnoi mpôl đêt ta ntŭk”, bah năm 2021 tât aƀaơ, nkual ƀon têh tâm rgop đah ăp ngih pah kan, ntŭk kan, UBND ăp xă, phường rgŏ jă ăp doanh nghiệp, nuĭh lŏng bôk tôr, prăk nkrem “Yor nuĭh ach o nkual ƀon têh” n’hanh bah xă ntop kơl 95 rnăk ƀư mhe n’hanh nkra jay gŭ đah dĭng lĕ rnoh prăk rlău 4,7 rmen prăk; ntop kơl tơm tăm-mpa rong, phân poh, prăk nkra njêng 1,2 rmen prăk; kơl 252 rnăk ach o, êp ach o, mhe rklaih luh ach o manh prăk kơl an rlău 13,8 rmen prăk... Wa Trần Tấn Quang, Kruanh jrô kan Wăng sa nkual ƀon têh Pleiku, an gĭt, rnoh rnăk ach o ta nkual ƀon têh geh 0,24%, đah 149 rnăk ach o. Nkual ƀon têh dôl mĭn njêng, mbơh ƀư tay âk ntrong ƀư joi trong nău rêh tâm di gay n’hao săk rnglăy bah trong kan aơ:

Đah nău ƀư tơm lah ntŭk kan mbơh ƀư ăp ntĭm rđău bah nkual ƀon têh mpeh ntop kơl joi trong nău rêh an nuĭh ach o, ntŭk kan lĕ tâm rgop ăp ntrong ƀư ntop kơl joi trong nău rêh, năp ăp ndơ pah kan jan sa gay tâm đah nău rêh, ntơm rklaih luh ach o n’hanh rklaih ach o nâp nâl. Jrô kan wăng sa nkual ƀon têh mbra ndrel đah UBND ăp xă, phường n’hanh Ntŭk rhŏ nău kan lŏ mir mĭn njêng, mbơh ƀư âk ntrong ƀư joi trong nău rêh âk ntil, tâm di đah nău ngăn rêh jêng n’hanh nkra njêng bah nuĭh ƀon lan, rgop n’hao săk rnglăy nău rƀŏng n’hŭch ach o nâp nâl ta nkual ƀon têh tâm năm tât.

Trong kan n’hŭch ach o dơi nkual ƀon têh Pleiku n’gor Gia Lai ƀư tĭng ƀa ƀơ tâm âk năm bah năp. Tâm lvang hun hao mhe trong kan aơ lơ dơi nchrŏng trong na nê̆ tă bah nău ƀư kơl an mkra ăp nău ƀon lan gŭ, jay gŭ n’hanh uĕh nău rêh. Tă bah nĕ, n’hao nău dơi geh, nuih n’hâm hun hao bah nkual ƀon têh, ntrôl dăng hun hao nkual ƀon têh, wăng sa-rêh jêng nkual ƀon têh nâp nâl, hăn ndrel đah mât njrăng ntŭk ntô gŭ âm.