Aơ lah rơh bôk năp yuh Nguyễn Thị Ngọc Lan ndrel du đêt năch bah nkual ƀon têh Hồ Chí Minh ƀư hăn “Hao yôk joi tŭk” ta nkuăl Lak, n’gor Dak Lak. Trong mbĭr, yôk prêh, yơn bri uĕh nđĭr, sĭm nsiăng, dak nteh n’hanh nău răm hăn uănh lĕ kơl yuh n’hanh lĕ rmôt dơi hao yôk Chư Yang Lak, ngoăy tâm âk yôk uĕh ngăn bah dôr Chư Yang Sin. Yuh Nguyễn Thị Ngọc Lan nkoch, rơh hăn dŭt uĕh n’hanh dơi uănh:

“Yor êng năng mô geh mĭn lah he mbra dơi hao yôk prêh kơt aơ, yơn ma dŭt nsrôih. Hăn n’gul trong ri ji ŏk, yơn ntrŭt đă êng dơm knŭng hôm 1 mông tay lah hao tât. Hao tât ta aơ saơ trôk nar dŭt uĕh, ta bah dâng mô dơi saơ ăp ntŭk aơ. Mpôl oh ta nkual ƀon têh mô hŏ dơi saơ tơm si n’ha si âk kơt aơ”.

Gay dơi hao yôk Chư Yang Lắk, năch pâl nđaih an rlet rlău trong hăn hăn hao yôk rgăn dak

Hao yôk joi tŭk lah ngoăy tâm 2 “ndơ uĕh” bah Y Xim Ndu, bu klô nuĭh Bunong ta ƀon Yuk La 1, xă Đắk Liêng, nkuăl Lak, n’gor Dak Lak, kơp bah rnôk nô ndâk njêng nău kan tâm nău ƀư pâl nđaih. Ndơ uĕh êng bah Y Xim lah hăn ƀư ngăn nău rêh, văn hóa ăp ƀon lan wăr n’glău Lắk. Y Xim Ndu an gĭt, nô rgum lĕ soan an 2 tour hăn uănh bri dak n’hanh ƀon lan. Bôl geh âk khay khuch hô bah srê yơn tât aƀaơ, công ty TNHH pâl nđaih Chư Yang Sin yor nô ndâk njêng, lĕ dơi geh rnoh năch đăp mpăn.

“Gâp hun hao tĭng trong pâl nđaih sinh thái tâm rgop đah mât njrăng ntŭk ntô gŭ âm n’hanh mât rƀăy văn hóa bah ƀon lan ta ntŭk. Tâm rgŏ năp tay lah hun hao uĕh gâp mbra rƀŏng tât năch pâl nđaih nuĭh dak bah dih ta Việt Nam. Nău ma gâp ŭch nĕ lah nău nchrăp ƀư bah gâp mbra dơi nsing nơm, nuih n’hâm an ăp băl mom mpeh ndâk njêng nău kan, lơn lah ăp băl mom nuĭh rnoi mpôl đêt kơt gâp, mbra dơi wât nău khlay, nkô̆ nău bah nău ƀư wăng sa hăn ndrel mât ndrăy n’hanh rƀăy tay nău uĕh văn hóa rnoi nuĭh bah nơm”.

Y Xim Ndu (ta n’gul) n’hanh năch check-in ta yôk Chư Yang Lắk

 Rdâk njêng nău kan ta nkual dâng rđŭng yôk prêh Dak Lak, yơn yuh Chu Thị Lan, ta xă Ea Kly, nkuăl Krông Pắk, lŏ lôch uĕh đah nău kan ntôn lah mô têh dăng, nĕ lah mât uănh săk soan. Kôp ndơ trà thảo mộc n’hanh mỹ phẩm thiên nhiên Lanchans yor yuh hun hao lĕ dơi rlong tăch n’hanh rnôk râng tâm rlong lĕ geh giải nhất ta rơh tâm rlong rdâk njêng nău kan rgâl mhe n’gor Dak lak. Tĭng yuh Chu Thị Lan, rơh tâm rlong rdâk njêng nău kan yor n’gor ƀư lah rơh khlay an yuh ntop jêh tay ndơ ndrel nău mĭn tăch rgâl. Bah nĕ lĕ rhoăt trong hăn ndơ̆ ndơ tât nuĭh dŏng:

“Bôk nău kan ƀư ăp nar tiăr nti lah dŭt uĕh an he dơi rgâl, kơt dŏng tâm ntrong kan tăch rgâl bah nơm. Tă bah rơh tâm rlong aơ gâp dơi mâp đah âk nuĭh ntuh kơl. Ngăn lah nău geh tât săk soan aơ geh dŭt âk nuĭh ntuh kơl khân pơng uănh tât n’hanh lap tâm rơh tâm rlong aơ geh âk nuĭh ntuh kơl khân pơng uănh tât n’hanh ŭch dơi kan ndrel tâm rgŏ năp”.

Ndrel đah nău dơi joi bah ăp trong kan êng kơt nô Y Xim Ndu n’hanh yuh Chu Thị Lan, nsum mpôl rdâk njêng nău ta Dak Lak hôm tâm rgop ăp đoàn hội gay n’hao soan dăng, rhŏ an ăp nău rƀŏng têh lơn. Tĭng wa Phạm Hoài Nguyên Anh, Chủ nhiệm Câu lạc bộ ntuh kơl n’hanh rdâk njêng nău kan (Hội Doanh nhân mom n’gor Dak lak), rnôk tâm rgop ndrel, ăp Starup lĕ joi saơ âk nău geh lơn an ăp nău nchrăp ƀư rdâk njêng nău kan bah nơm:

Yuh Chu Thị Lan săch trong hăn rdâk njêng nău kan đah ăp ndơ mât uănh săk soan.

“Gay ngăn ngên n’hanh săk rnglăy lơn ri mpeh Câu lạc bộ ntuh kơl n’hanh rdâk njêng nău kan doanh nhân mom mbra du hê groi du hê, jêng lah tâm groi tĭng nuĭh. Aƀaơ dôl dơi tâm rgop du đêt ăp ndơ bah ăp băl kơt ka lăng, sầu riêng, tinh dầu. Ăp băl nĕ dôl lah druh ndăm bah câu lạc bộ Ntuh kơl n’hanh rdâk njêng nău kan doanh nhân mom, mpeh tâm trong bah câu lạc bộ Ntuh kơl n’hanh rdâk njêng nău kan Trung ương Hội Doanh nhân mom Việt Nam. Câu lạc bộ geh nău kan kơt boăt nthoi, tâm pă, nti nsơm n’hanh tâm rgâl. Rlău ma nĕ, geh ntŭk kan, geh ntŭk gŭ pah kan an dơm, geh ngih wâl ndoh ndơ gay an ăp băl rdâk njêng nău kan dơi tât ta nĕ gay ƀư ăp nău kan wăng sa ăp nar”.

Rlet rlău ăp ntŭl rlong bah srê, ntrong leo rdâk njêng nău kan ta Dak Lak hôm e geh âk nău mbơh uĕh bah nsum mpôl rdâk njêng nău kan ta ntŭk. Mô hăn tĭng trong ơm mô lah âk nuĭh, âk nuĭh mom lĕ săch trong hăn êng n’hanh dơi uănh ăp nău nchrăp dơi hao. Ăp gưl n’gâng kan ƀon lan, ăp dội doanh nhân ta n’gor geh tay âk nău geh jâng nsan hun hao an ăp nuĭh rdâk njêng nău kan, kơl trong rdâk njêng nău kan aơ nar lơ âk ntil n’hanh  jru hvi./.