“Yô̆ nuĭh kơt yô̆ săk nơm”, âk nuĭh, rmôt kan lŏng bôk tôr ta Nkual ƀon têh Pleiku, n’gor Gia Lai lĕ ƀư ăp nar sông piăng ân dơm gay ntop kơl nuĭh ji n’hanh rnăk wâl nuĭh ji geh nău rêh jêr jŏt. Nău ƀư têh uĕh nĕ lĕ kơl ăp nuĭh ach o bah oi jêr jŏt, nkre rêng hvi nău ƀư kơl nuĭh tâm ntŭk gŭ rêh ƀon lan ta nkual ƀon têh yôk Pleiku.

Tâm rlău 1 pơh hăn mât ur săm ji ta ngih dak si Đa khoa n’gor Gia Lai, tât di 11 mông nung nar, wa Nguyễn Thanh (75 năm deh, ta thôn 2, xă Ia Hlốp, nkuăl Chư Sê) lŏ tât ngih Thị Huy gay sông piăng. Wa an gĭt, nar sông tŏng ăp ndơ kah n’hanh duh, geh piăng, tuh neh, biăp, geh n’ăp ndơ sa play dô lah prit (mô lah gu gang, dak toh tuh) yơn khlay knŭng 2 rbăn prăk. Lah nar mô geh djôt prăk, ri mô kâp trok.

Wa Nguyễn Thanh lah, mô knŭng êng wa, ma ăp nung nar ăp nar hôm geh rhiăng rnăk wâl nuĭh ji, nuĭh săm ta ngih dak si tât sông ta jay piăng aơ.

Gâp saơ geh ntŭk sông kơt aơ kơl an nuĭh ji n’hanh rnăk wâl dŭt khlay, dơh hoach âk ngăn, piăng dơm ri kloh uĕh. Piăng rbân, duh, ŭch sông ndâng âk piăng dơi đŏng, mô geh đêt. Geh dak ngêt, nsưng gŭ kloh uĕh.  

Ndrel đah ntŭk piăng 2 rbăn, ta Paeiku hôm geh sông nung nar an dơm kơl nuĭh ji ach o yor Câu lạc bộ thiện nguyện mpeh tâm Y tế GEM pă an. Yuh Trần Thị Mỹ Hằng-chủ nhiêm câu lạc bộ an gĭt: 2 năm bah năp, 200 nuĭh lah nuĭh kan dak si rĭng ƀa ƀơ rlak prăk ăp khay tĭng rnoh ƀư “tĭng nuih n’hâm”. Bah tơm prăk nkrem aơ, câu lạc bộ an 20 rkeh prăk/khay gay rwăt ăp nuĭh sông pă an dơm kơl ăp nuĭh geh nău rêh jêr jŏt.

Mpôl hên geh du tủ bánh mì, ăp nar geh đŏng. Tâm nĕ geh bah 300 tât 400 ơ̆ bánh mì. Nuĭh tât but uănh dơi sŏk da dê. Hôm nung nar ri mpôl hên dơi ôp ntŭk piăng. Geh nar 30 tât 40 nuĭh, geh nar 50 tât 60 nuĭh gay ntop kơl ăp nuĭh gŭ nkual thôn ƀon, nkual jru ngai.

Nău ƀư lŏng bôk tôr kơl nuĭh ji ach o dôl rêng hvi têh dăng ta ăp ngih dak si ta nkual ƀon têh Pleiku, n’gor Gia Lai, wăch rgum âk nuĭh râng. Rlău ma ntŭk piăng 2 rbăn, tủ bánh mì, nklâm piăng an dơm, hôm geh âk rmôt lŏng bôk tôr pă por an nuĭh ji kon se, nuĭh ji săm leh jŏ jong... âk nuĭh rƀŏng tĭng đah trong tâm rgop phe, bôh ƀot ngot an ăp jay sông, rmôt lŏng bôk tôr. Yuh Nguyễn Thị Dung, ta phường Ia Kring, nkual ƀon têh Pleiku an gĭt:

He moh ndơ geh ri kơl ndơ nĕ, He kơl an jay sông 1 gri dak ngi 5 lít, 2 kg bột nêm n’hanh 2kg ƀôt ngot. Du hê ndrel ty tâm pă ri ăp nuĭh ji gŭ ngai, nuĭh mât rong nuĭh ji dơh oi du đêt.

Ndrel đah nsum ty bah nuĭh ƀon lan, n’gâng kan ƀon lan ăp xă phường ta Nkual ƀon têh Pleiku, Gia Lai ntop kơl, nta nơih an nău ƀư lŏng bôk tôr dơi ƀư dơh n’hanh uĕh lơn. Wa Đỗ Trung Hùng-Kruanh UBND phường Phù Đổng-Nkual ƀon têh Pleiku, ntŭk geh âk ngih dak si n’hanh ăp ntrong ƀư lŏng bôk tôr, an gĭt:

Mpôl hên lĕ gĭt tât, ntĭm ntŭk n’gôn gâm an kloh uĕh gay đăp mpăn kloh uĕh ndơ sông sa, n’hanh nglăp rwăt ndơ sông sa. Rmôt n’gôn gâm an dăn hăn tiăr nti gay geh sam ƀŭt kơp dơn đăp mpăn ndơ sông sa. Geh âk rnăk dŭt jêr jŏt. Âk nuĭh, nsum mpôl lŏng bôk tôr kơl an nuĭh ji lah dŭt uĕh da dê, dŭt uănh khlay rnê rhơn.