Nău kan mon uk way ơm bah nuĭh Bunong ta xă Yang Tao, nkuăl Lắk, n’gor Dak Lak bah jŏ lĕ dơi âk nuĭh gĭt tât. Yơn lah, tĭng năm nău kan way ơm aơ geh roh rui. Gĭt saơ nău nĕ, rnôk bôk nău kan du xă du ntil ndơ dơi ƀư mpeh ƀon lan, n’gâng kan xă lĕ rgŏ jă kônh wa dăn râng bôk nău kan đah ndơ “Mon uk way ơm bah nuĭh Bunong” gay n’hao nău rêh geh prăk an nuĭh ƀon lan n’hanh mât ndrăy, ƀư uĕh nău kan mon uk bah ƀon lan. Wa Y Wu Sruk, Groi kruanh UBND xă Yang tao, nkuăl Lắk an gĭt:

“Mpôl hên dôl mât n’hanh rƀăy nău kan way ơm mpŏng ŭch hun hao n’hanh ndơ̆ ntŭk tăch. Aƀaơ mpôl hên lĕ dăn lăp ndơ OCOP. Aƀaơ geh dŭt âk năch tât nkuăl Lắk chop ƀon nău kan gay rlong ƀư, uănh ăp nghệ nhân ƀư ngăn. Ta ntŭk geh đŏng du đêt druh ndăm rƀŏng hun hao pâl nđaih. Tĭng nghị quyết bah Ban chấp hành Đảng bộ nkuăl mbra ndâk njêng nkuăl Lắk jêng ntŭk pâl nđaih bah n’gor Dak Lak tât lvang 2030. Ăp nghệ nhân nsrôih m’hâm ƀư ndơ̆ ăp ndơ ƀon nău kan way ơm mon uk tât lĕ rngôch ăp ntŭk êng gĭt mpeh ndơ mon uk bah he”.

Ăp ndơ râng uănh lah dăp ndơ OCOP gưl n’gor.

N’hêl an nê̆ an saơ, Bôk nău kan du xă du ndơ lĕ nta an soan dăng an âk nuĭh geh nău mĭn mhe, ăp ndơ mhe luh ta ăp ntŭk. Wa Hoàng Mạnh Cường, Giám đốc Công ty TNNH MTV Kiên Cường, ta phường Tân Tiến, nkuăl ƀon têh Buôn Ma Thuột đah ndơ “Cà phê mpĭk Kiên Cường” lĕ dơi kơp dơn ndơ geh OCOP 4 sao nkoch: Râng bôk nău kan OCOP lah dơi an ăp doanh nghiệp hun hao ndơ uĕh lơn, lôch uĕh n’ăp đah rup ntô, uĕh kah, n’hao dơi tâm rlong ta ntŭk tăch:

 “Ngăn lah đah du ntil ndơ, du ntŭk kan pơng geh nău nkoch lĕ hôm. Jêng nău bah du ntil ndơ, du nuĭh tơm pơng êng da dê. Yor nău nkoch tâm ndơ nĕ pơng kơt dơi an pơng rblang an ngih pah kan mât uănh, rblang an ntŭk tăch, an nuĭh dŏng wât kloh lơn mpeh săk pơng bah ndơ nĕ. Yor du ndơ aƀaơ bu mô knŭng joi mpeh uĕh kah nkre ndơ nĕ ngăn ngên geh khlay rnôk pơng nsĭt nău uĕh way ơm n’ăp văn hóa nkual neh bah ƀon lan nĕ. Jêng dŭt âk nău nkoch aơ pơng mô knŭng nkoch na nê̆ tay ndơ ma ta nĕ pơng lah tât n’ăp văn hóa nkual neh bah ntŭk aơ”.

Rlău 4 năm mbơh ƀư bôk nău kan du xă du ntil ndơ, tât aƀaơ, n’gor Dak Lak geh 72 ndơ OCOP gưl n’gor bah 3-4 sao. Nău geh bah ndơ OCOP na nao hao, mkra nău kan an âk nuĭh pah kan ƀon lan đah rnoh prăk khay âk. Ntơm bah bôk năp aơ, UBND n’gor Dak Lak lĕ uănh an “Bôk nău rgop an tâm nchră ndơ OCOP bah n’gor tât năm 2025 n’hanh rƀŏng tât 2030”. Tâm nĕ n’gluh an nău rƀŏng, lĕ rngôch ăp xă tâm n’gor geh ndơ OCOP. Tât năm 2025, mbra geh 200 ndơ dơi kơp dơn OCOP, tât năm 2030 lam n’gor mbra geh 300 ndơ OCOP. Ăp ndơ an n’hao uĕh, n’hao rnoh sao n’hanh gĭt âk lơn tât ntŭk tăch tâm n’hanh bah dih dak gay nsĭt tay săk rnglăy ngăn. Wa Nguyễn Hoài Dương, Kruanh N’gâng kan Tuch tăm mât rong-Hun hao ƀon lan, Chánh văn phòng điều phối Bôk nău kan ƀon lan mhe n’gor Dak lak an gĭt:

“Gay ndơ OCOP tâm di ăp nău ŭch ntŭk tăch ri ngih dak geh âk nău ntop kơl an mpeh măy mŏk gay rhŏ an nkra njêng mô lah ntop kơl mpeh ngih wâl ntung trong bah ăp ntŭk nkra njêng, ntop kơl ntĭm nti. Aơ lah ăp nkô̆ nău khlay, jêh nĕ ntop kơl ntrŭt ngăch tăch rgâl, gĭt ntŭk tăch, prăk ndâk njêng ntô lĭr, ntop kơl joi pơk hvi ntŭk tăch tâm dak n’hanh bah dih dak mpla nsơ ăp ndơ aơ. Aơ lah nău tâm bôk nău kan OCOP lvang tât lĕ mĭn lah n’hanh rgum gay ntop kơl an ăp ndơ tơm gay ƀư săk rnglăy lơn”.

Bôk nău kan du xă du ndơ dôl jêng n’hâm soan ntrŭt nsôr mât an ntrŭt ngăch, ƀư mhe wăng sa ƀon lan ta Dak Lak. Nău aơ dôl njêng soan têh dăng an ndâk njêng ƀon lan mhe tĭng trong nâp nâl bah nău mĭn lor nău dơh an ƀon lan ta ntŭk./.