Nkuăl Xín Mần, n’gor Hà Giang tât rnôk aơ lĕ jêh geh rlău 80% rnoh ndơ ƀư mpeh ntop kơl jay gŭ an rnăk rnoi mpôl đêt, nkual yôk. Mô knŭng ndrĭ, ƀon lan nsrôih tâm nău joi ăp ntrong kan joi nău rêh an kônh wa hun hao tơm tăm. Ăp rơh rƀŭn nchră geh na nao. Ăp cán bộ kơt Kruanh jrô kan Lao động Thương binh Xã hội nkuăl Xín Mần wa Đặng Thu Chang an mbơh trong nchrăp ƀư tĭng. Ngăch ndơ̆ pă tơm prăk n’hanh ton du pơh du tơ̆:

Nkuăl ƀư dŭt n’hâm. Ăp xă an đăp mpăn n’hanh geh nău mbơh, an geh ton, ntrŭnh lĕ nău kan bah nuĭh djôt bôk dơn trok lĕ nău kan tâm lĕ rngôch ntil ndơ ƀư tĭng bôk nău kan rƀŏng tĭng lam dak. Tâm nĕ gĭt na nê\ nău kan bah săk nơm tâm rnôk ƀư, mô đăp mpăn ăp rnoh ndơ ri dơn êng rnoh uănh lah dŭt năm kơt geh dăn đă mpeh trong kan cán bộ.

          Bah n’hêl na nê̆ groi nđôi 3 bôk nău kan rƀŏng tĭng lam dak ta ăp ntŭk. Groi Kruanh Hội đồng Dân tộc bah Quốc hội Trần Thị Hoa Ry nkoch nkô| nău jêng tât nău geh ntŭk ƀư uĕh yơn geh âk ntŭk mô dơi ƀư tĭng:

          “Ăp ntŭk dơi gưl uỷ, n’gâng kan ƀon lan uănh tât ri ntĭm rđău dŭt têh, pă cán bộ tŏng soan. N’hanh bah pă cán bộ tŏng ăp soan kơt nĕ, jêng tâm ăp nău kan ntĭm rđău, ƀĭt joet, tâm rgop uĕh n’hanh tâm ôp tâm nchră an ăp sam ƀŭt mpeh dơi mkra bah dŭt ơm. Gâp saơ khân pơng mô knŭng kâp tât jêr jŏt, wăk kol mư dôh rklaih ma ntơm bah gưl ka lơ lĕ geh nău nchrăp ndâk njêng rmôt pah kan, đê̆ đŏng djôt ty ntĭm nău kan an cán bộ ta bah dâng.

          Plơ̆ tay đah nău bah nkuăl Ach o nkual prêh yôk lŭ Xín Mần, Hà Giang. Nău mât uĕh ƀư tơm, mĭn ƀư mhe bah nuĭh ƀon lan, nău ntrong leo lor bah cán bộ, đảng viên n’hanh nău lăp bah lĕ trong chính trị lah nkô̆ nău khlay gay mkra săk rnglăy bôk nău kan rƀŏng tĭng lam dak. Tĭng Kruanh Uỷ ban nhân dân tỉnh Hà Giang Nguyễn Văn Sơn, aơ lah nkô̆ nău gay Hà Giang lah ngoăy tâm 3 ntŭk bah lam dak hăn lor dăn dơi ƀư tĭng trong rlong ƀư pă gưl, jao an nău dơi:

          N’gor mô dơi ndơn ƀư an nkuăl, nkuăl mô dơi ƀư ndơn an xă n’hanh rlơ̆ tay, trung ương mô dơi ƀư ndơn. Yor ta n’gor aơ klach tih, geh rnôk hôm nsum nsum. Ndrĭ jêng ndâk njêng nău kơl êng bah Quốc hội, jêh nĕ Chính phủ na nê̆ lĕ rngôch ăp nău, tâm pă nkual. Rnôk nĕ, cán bộ ƀư mô klach tih ma cán bộ mbra dơi nchrăp lor an ƀư.

          N’hao pă gưl, jao an nău nsing nơm. N’gor mbra janh ƀư, janh rgâl mhe, janh dơn trok nău kan gay jêh 3 bôk nău kan rƀŏng tĭng lam dak. Nĕ mĭn lah bah Groi Giám đốc N’gâng kan Kế hoạch n’hanh Đầu tư n’gor Quảng Bình wa Mai Hồng Ngọc:

          Yơn lah, nău rlong ƀư pă gưl an gưl nkuăl an njrăng đŏng, n’hao uănh nđôi groi uănh bah ngih pah kan ƀư tơm ƀĭt joet ăp bôk nău kan n’hanh ngăch ntop kơl, ntĭm ăp nkuăl, xă, nuĭh tơm ntuh kơl bah nău ndâk njêng, uănh an, jao trong nchrăp prăk gay nău mbơh ƀư kơt ƀư tĭng sŏk dŏng, trok prăk bah ăp bôk nău kan nău nchrăp ƀư.

          Đah nuih n’hâm nchrăp lor “Groi uănh” an “di na nê̆”, sŏng dăng, mô dêr, ngăch gĭt năl ăp jêr jŏt, wăk kol, Quốc hôị hăn ndrel tay đah Chính phủ gay joi ăp trong mkra tâm di lơn, ngăn lah rnôk ƀư tĭng 3 bôk nbău kan rƀŏng tĭng lam dak lvang 2021-2025 knŭng hôm 2 năm tay lah sĭt lôch. Nar 29/11/2023, Rơh rƀŭn tal 6 Quốc hội khoá 15 lĕ mbơh an Nghị quyết khlay mpeh nkô̆ nău aơ. Aơ lah rơh bôk năp du chuyên đề groi nđôi bah Quốc hội dơi ƀư n’gul rơh, “kơp uănh” tâm ban đah rnôk mbơh ƀư. Rơh bôk năp, du chuyên đề groi nđôi gưl prêh rgum lĕ 3 bôk nău kan rƀŏng tĭng lam dak têh khlay bah neh dak. Groi nđôi đah nuih n’hâm na nao lah ndâk njêng n’hanh njrăng n’gang, tâm nĕ ndâk njêng lah nău bôk năp gay ăp nău nar lơ uĕh lơn. Kruanh Quốc hội Vương Đình Huệ lĕ lah rjăp kơt nĕ tâm âk rơh rƀŭn n’hanh an gĭt:

Quốc hội ŭch gay Chính phủ ndăn ndâk njêng, mbơh an Quốc hội ta rơh rƀŭn êp ngăn Dự thảo Nghị quyết mpeh rlong ƀư du đêt trong, nău kơl êng n’hanh nău pă gưl an gưl nkuăl ntrŭnh ndơ ƀư, dăp rgâl, pă dŏng prăk ngih dak mbơh ƀư tĭng ăp bôk nău kan rƀŏng tĭng lam dak.

          Âk đại biểu Quốc hội mpŏng, nghị quyết bah Quốc hội mbra mkra jêh ăp jêr jŏt tâm rnôk mbơh ƀư 3 bôk nău kan rƀŏng tĭng lam dak, Đại biểu Rơ Châm Hphik, rmôt Gia Lai nkoch:

Nghị quyết geh nău khlay n’hanh nghị quyết, dŭt tâm di nuih n’hâm ƀon lan, bôk năp mbra dôh rơih ăp nău tơm khlay dôl kol tâm rnôk mbơh ƀư 3 bôk nău kan rƀŏng tĭng lam dak.

          Ndrel đah nău mbơh ƀư nghị quyết groi nđôi gưl prêh mpeh “nău mbơh ƀư tĭng ăp nghị quyết bah Quốc hội mpeh ăp bôk nău kan rƀŏng tĭng lam dak ndâk njêng thôn ƀon mhe lvang 2021-2025; n’hŭch ach o nâp nâl lvang 2021-2025; hun hao wăng sa-rêh jêng nkual rnoi mpôl đêt n’hanh nkual yôk lvang 2021-2030”, Quốc hội lĕ jao an Chính phủ mbơh an Quốc hội tâm rơh rƀŭn dăch aơ ngăn du Nghị quyết an êng mpeh pă gưl, pă nău dơi êng, jao an nău dơ êng, n’hŭch sam ƀŭt sam tra hành chính gay ngăch dôh rklaih jêr jŏt, wăk kol, kơl nău mbơh ƀư ăp Bôk nău kan rƀŏng tĭng lam dak geh săk rnglăy, tât ntŭk di nar, nta an nsing nơm n’hanh nău rêh uĕh lăng bah nuĭh ƀon lan.