Âk năm bah năp, ntrong kan tăm chè, cà phê bah rnăk wa K’Kras, ta nkual têh Lộc Thắng, nkuăl Bảo Lâm (Lâm Đồng) geh năch dăch ngai tât uănh, mĭn joi n’hanh nti nău blău tuch tăm. Wa lah nuĭh rnoi mpôl đêt rlău 10 năm mro dơi săch lah ƀon lan tuch tăm blău. Knơm janh rgâl nău mĭn tâm tuch tăm, tĭng gưl ndơ̆ ăp ntil mhe an tuch tăm gay rgâl mbrơi mbrơi ăp ntil ơm săk geh mô âk, ntop đah kơt tĭng trong mât chăm, dŏng dak si tĭng nău ntĭm bah cán bộ ntrŭt nsôr lŏ mir, mir chè n’hanh cà phê hvi bơi 4 ha bah rnăk wâl wa hao jêng n’hanh hun hao uĕh, nsĭt tay nău geh đăp mpăn rhiăng rkeh prăk/năm. Nău rêh, wăng sa bah rnăk wâl mô rlu hun hao sâm geh.

“Dơi nău uănh mĭn bah Đảng n’hanh Ngih dak, nău ntop kơl bah nău kan lŏ mir, n’gâng kan ƀon lan nkuăl Bảo Lâm.... an gâp râng âk bôk nău kan tiăr nti, rgum nchră, rwăt phân poh trok mbrơi.... Gâp lĕ nsrôih ntuh kơl, nkra njêng, kơt dŏng khoa học kỹ thuật an tăm tăm mir chè, mir cà phê jêng nsĭt tay săk geh âk, nsĭt tay nău geh đăp mpăn an rnăk wâl nơm”.

Mô knŭng êng wa K’Kras ma dŭt âk kônh wa nuĭh rnoi mpôl đêt bah n’gor Lâm Đồng lĕ hun hao rklaih luh ach o, ndâk njêng nău rêh hơm răm, uĕh lăng. Lah 10 năm bah năp, bơi 100 rnăk nuĭh rnoi mpôl K’ho ta thôn 4, xă Đạ Ploa, nkuăl Đạ Huoai (Lâm Đồng) geh rlău 60% tâm rnăk ach o, ri aƀaơ mô hôm rnăk ach o n’hanh dŭt âk lĕ jêng sâm geh. Tĭng wa Ka Rom, Kruanh thôn 4, xă Đạ Ploa, săk rnglăy aơ lah knơm Đảng n’hanh Ngih dak lĕ kơl an rgum mbơh ƀư âk trong tâm ban bôk nău kan, nău nchrăp an ntuh kơl, ntop kơl an nuĭh ƀon lan rnoi mpôl đêt ta ntŭk. Ngăn lah ăp bôk nău kan ntuh kơl ntung trong, n’hŭch ach o nâp nâl, ntop kơl prăk tơm ntil, mpa rong, jao an kỹ thuật tuch tăm... lĕ mât uĕh săk rnglăy. Knơm nĕ ƀon lan lĕ geh nău rgâl na nê̆, nău rêh drăp ndơ n’hanh nuih n’hâm bah nuĭh ƀon lan lĕ rgâl dŭt âk nkôp đah bah năp. Wa Ka Rom, lah:

“Dơi Đảng n’hanh Ngih dak uănh mĭn ntuh kơl, ntop kơl kon ntil, tơm tăm mpa rong, pơk âk jrô tiăr nti jao an khoa học kỹ thuật, trong mât chăm tơm tăm n’hanh kônh wa kơt dŏng ƀư tĭng. Bah nĕ nău rêh kônh wa ntŭk aơ rgâl dŭt âk, nău wât bah kônh wa rgâl uĕh, ăp nău rluk mâl ơm dơi ntrôl rŭch, jut jăng ji ngot ach o hôm. Nău nti nsơm bah oh kon dơi uănh khlay, ƀon lan ndrel ndâk njêng nău rêh mhe n’hanh hun hao.

Bah năm 2016 tât năm 2020, n’gor Lâm Đồng lĕ ntuh kơl bơi 630 rmen prăk an ăp xă thôn dŭt jêr jŏt. Wa K’Bát, Bí thư chi bộ thôn Băng Dung, xă Đạ K’Nàng, nkuăl Đam Rông an gĭt, bah ăp tơm prăk ntuh kơl aơ, nău rêh bah nuĭh ƀon lan ta ăp nkual nuĭh rnoi mpôl đêt lĕ geh nău rgâl na nê̆, mô hôm nău mĭn kâp knơm nău kơl an bah Đảng n’hanh Ngih dak, nsrôih hao êng nkra njêng, mô knŭng ntrôl rŭch ji ngot ach o ma âk rnăk lĕ hao ƀư ndrŏng, ndâk njêng ƀon lan hun hao.

“Bah rnôk mbơh ƀư âk trong kơl ntuh kơl bah Đảng n’hanh Ngih dak, ngăn lah ăp bôk nău kan na nê̆ bah ƀon lan ƀư tĭng ta lam nkual lĕ nsĭt tay săk rnglăy uĕh. Kônh wa ntŭk aơ kơl tĭng dŭt n’hâm, râng ndâk njêng, tâm rgop nar luh, an neh ƀư trong, tâm rgop nkra njêng ƀư sa, n’hao nkra njêng. Bah nĕ, muh măt ƀon lan lĕ geh hun hao, rgâl dŭt âk nkôp đah bah năp.

N’gor Lâm Đồng geh 1,3 rkeh nuĭh ƀon lan, tâm nĕ nuĭh rnoi mpôl đêt geh rlău 25%. Âk năm bah năp, knơm dơi geh nău uănh mĭn ntuh kơl bah Đảng n’hanh Ngih dak mpeh ăp ntil, nău rêh bah nuĭh ƀon lan ta nkual jru ngai, nkual rnoi mpôl đêt tâm n’gor lĕ ntơm hun hao mhe, lĕ rngôch ăp ntil. Tâm lvang 2022 tât 2025, n’gor Lâm Đồng lĕ geh nău ntrŭnh ntuh kơl bơi 1.700 rmen prăk gay ƀư tĭng bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt. Aơ lah nău uănh mĭn ntuh kơl têh bah Đảng n’hanh Ngih dak gay kơl ăp nkual rnoi mpôl đêt bah n’gor Lâm Đồng geh tay n’hâm soan gay mô rlu hun hao sâm geh.