Dak Wer lah xă thôn ƀon mhe n’hao prêh bôk năp bah n’gor Dak Nông. Njok ăp trong bê tông, nuĭh ƀon lan tăm nkao, tăm tơm si jêng uĕh măt uănh. Ta ăp nkual ƀon lan gŭ geh âk ntŭk rgum ndŏk đah bê tông, nuĭh ƀon lan gĭt wât êng mât răk kloh uĕh thôn ƀon. Yuh Thị Oanh, nuĭh Bunong, nuĭh nsing nơm bah ƀon Bu Ndoh, xă Dak Wer an gĭt, rlău 10 năm mbơh ƀư bôk nău kan ndâk njêng thôn ƀon mhe, muh măt bah ƀon lah êng, xă lah nsum lĕ rgâl dŭt âk, nău ƀư sa, nkra njêng hun hao lơn. Lơn lah, nău kan cheh tanh lĕ dơi mât uĕh, nta nău kan n’hanh n’hao âk nău geh an âk rnăk ƀon lan.

Kônh wa dŭt rhơn, ntô̆ n’hao yor nău kan cheh tanh, mô knŭng ƀư kho ao gay kônh wa nsoh tâm ăp rơh lễ hội, mât ndrăy văn hóa way ơm ma lĕ njêng ndơ gay tăch. Bah nĕ, nău kan lĕ nsĭt tay nău geh an âk oh yuh.

Ta xă Quảng Trực, nkuăl tuy Đŭcs, bôk nău kan ndâk njêng thôn ƀon mhe dôl ntơm kơl nkual n’har bri aơ rgâl mhe. Yuh Thị Nớ, nuĭh Bunong, Groi Bí thư Đảng ủy xă Quảng Trực an gĭt, bôk năp cán bộ, đảng viên, bu ranh ƀon, nuĭh dơi nsing nơm tâm ntŭk gŭ rêh hăn lor ƀư tĭng, n’hanh rblang, rgŏ jă kônh wa ƀư tĭng, bah nĕ ma mbơh ƀư săk rnglăy ăp bôk nău kan, nău nchrăp ƀư. Đah nău tâm rnglăp ntŭk gŭ rêh âk, jêng xă ƀư ndâk njêng thôn ƀon mhe, kônh wa ta ăp ƀon tâm ban ŭch da dê, ndrel ƀư tĭng.

Xă Quảng Trực aƀaơ lĕ rgâl dŭt âk. Ăp bôk nău kan, nău nchrăp ƀư ma Đảng, Ngih dak uănh mĭn ntuh kơl an xă dŭt săk rnglăy. Kônh wa ta ƀon ri tâm rnglăp, rnôk mbơh ƀư ri nău tâm ban ŭch âk mbra kơl ăp bôk nău kan, nău nchrăp ƀư dơh. Kơt nău nchrăp ƀư tăm mắc ta xă, geh trong nchrŏng, geh trong ƀư n’hanh nău tâm ban ŭch bah nuĭh ƀon lan jêng lĕ lôch uĕh, nsĭt tay nău geh âk, nău rêh, wăng sa bah kônh wa tâm xă dơi hao âk.

Kơp tât dŭt năm 2023, n’gor Dak Nông geh 36/60 xă tâm di thôn ƀon mhe, tâm nĕ geh 1 xă dơi tâm di thôn ƀon mhe n’hao prêh. Rĭng lam n’gor du xă geh 17 rnoh ndơ ƀư, mô hôm geh xă bah dâng 10 rnoh ndơ ƀư. N’gor lĕ geh du ntŭk kan gưl nkuăl lôch jêh nău kan ndâk njêng thôn ƀon mhe lah nkual ƀon têh Gia Nghĩa.

Nău rgŏ jă ăp tơm prăk gay ndâk njêng thôn ƀon mhe ta Dak Nông ăp năm bah năp dơi uănh lah. Êng bah năm 2020-2023 dĭng lĕ tơm prăk ntuh kơl an nkual thôn ƀon mhe geh bơi 73.000 rmen prăk. Tâm nĕ, prăk ntuh kơl an bôk nău kan lah 575 rmen prăk, prăk rgŏ jă ntŭk gŭ rêh lah 154 rmen prăk, hôm ƀa ƀă lah tâm rgop bah ăp bôk nău kan, nău nchrăp ƀư, tơm prăk manh tăch rgâl, prăk doanh nghiệp.

Wa Lê Trọng Yên, Groi Kruanh UBND n’gor Dak Nông an gĭt, bôk nău kan rƀŏng tĭng lam dak ndâk njêng thôn ƀon mhe dôl nsĭt tay săk rnglăy uĕh, n’hŭch ach o nâp nâl, ntrôl ngăch hun hao wăng sa rêh jêng, ntơm rgop ơm ndơ̆ n’gor Dak Nông jêng n’gor hun hao dŭt uĕh bah nkual Tây Nguyên tĭng nău rƀŏng Đại hội Đảng bộ n’gor rơh tal 12 n’gluh an. Tâm nĕ, n’gor Dak Nông uănh tât nău hun hao wăng sa nkre mât ndrăy, ƀư uĕh ăp nău khlay văn hóa way ơm ăp rnoi nuĭh.

Đah Dak Nông geh 40 rnoi nuĭh oh nô, nău ndâk njêng bôk nău kan ndâk njêng thôn ƀon mhe n’hanh lĕ 3 bôk nău kan rƀŏng tĭng lam dak ri hăn ndrel đah nău uĕh văn hóa. mât uĕh nău mĭn njêng mhe n’hanh mbơh ƀư gay ăp rnoi nuĭh oh nô tâm 40 rnoi nuĭh mât ndrăk nău uĕh văn hóa bah rnoi nuĭh nơm.

Sŏk văn hóa ƀư n’gâng tơm, lah n’hâm soan an hun hao, n’gor Dak Nông dôl ntơm rƀŏng tât ndâk njêng ăp nkual ƀon tơm, ăp ƀon lan nâp nâl wăng sa, ndrŏng uĕh, tâm rnglăp.