VOV4.M’nông: Xă N’thol Hạ, nkuăl Đức Trọng, n’gor Lâm Đồng geh rlău 80% nuĭh ƀon lan lah rnoi K’ho. Bah nar rƀŏng tĭng dŭt n’hâm ntrong leo nsum ty ndâk njêng ƀon lan mhe, janh rgâl nău mĭn tuch tăm, ntop đah nău uănh mĭn ntuh kơl bah Đảng n’hanh Ngih dak mpeh ăp ntil, nău rêh bah nuĭh ƀon lan ntŭk aơ lĕ rgâl mhe tĭng nar. Mô rlu ta nĕ nău mât ăp rnoh ndơ ƀư thôn ƀon mhe, nuĭh ƀon lan ta ăp ƀon ntŭk aơ hôm rgum soan ndâk njêng ntrong kan nkual ƀon lan gŭ mhe, nkual ƀon lan gŭ ntoh lư, nsrôih ơm jêh xă thôn ƀon mhe hao prêh.

Bâh nar dơi kơp dơn lah xă tâm di ƀon lan mhe tâm năm 2016, muh măt ƀon lan bah ăp ƀon ta xă N’Thol Hạ, nkuăl Đức Trọng, n’gor Lâm Đồng lĕ mô rlu rgâl mhe, hun hao tĭng nar. Tâm nĕ, ƀon Sre Đăng, ntŭk geh âk nuĭh rnoi đêt K’ho gŭ rêh dơi uănh lah nkual ƀon lan mhe đah nău rgâl lĕ rngôch mpeh nău rêh n’hâm nuih n’hâm.

Ƀon Sre Đăng, xă N’Thol Hạ dơi kơp dơn lah nkual ƀon lan gŭ mhe.

Tĭng nô Liêng Hót Ha Thao, nuĭh K’ho ta ƀon Sre Đăng, knơm nău rgâl trong tuch tăm bah way ơm an nkra njêng lŏ mir mât rong tĭng công nghệ mhe, nău geh wăng sa bah kônh wa lĕ rgâl nanê̆ n’hanh trong hăn kloh uĕh, ăp nău rluk mâl lĕ ntrôl rŭch, kônh wa ndrel soan ndâk njêng ƀon lan mhe tĭng nkual ƀon têh uĕh lăng. Dơi geh săk rnglăy aơ knơm Đảng, Ngih dak lĕ uănh mĭn ntuh kơl đah ăp ntil.

“Nău kơl bah Đảng n’hanh Ngih dak lĕ dơi rgâl na nê̆ tât nuĭh ƀon lan kơt jŭt n’hŭch ach o, ndâk njêng ƀon lan mhe, nkual ƀon lan gŭ mhe... nuĭh ƀon lan ntŭk aơ wât n’hanh râng dŭt n’hâm ăp ntrong leo yor ƀon lan rgŏ jă. bah nĕ, muh măt ƀon lan lĕ rgâl, trong hăn kloh uĕh, nuĭh ƀon lan nsrôih kơt tĭng khoa học kỹ thuật an nkra njêng tĭng trong lŏ mir mât rong công nghệ mhe, n’hao nău geh. Nău rêh wăng sa lĕ rgâl, hun hao dŭt âk nkôp đah bah năp”.

Trong ƀon kloh uĕh.

An saơ na nê̆ nău hun hai aơ, nĕ lah rnoh rnăk ach o ƀon Sre Đăng aƀaơ knŭng hôm 1%, 2/3 rnoh neh tuch tăm dơi kơt tĭng công nghệ mhe, 100% kon se tât năm dơi hăn nti. Tĭng wa K’Hai ta ƀon Sre Đăng, nău rêh hao ƀư nău nkoch trêng, rgŏ jă nuĭh ƀon lan ƀư tĭng ăp nău ntrŭnh, trong hăn, nău kơl bayh Đảng n’hanh pháp luật bah Ngih dak dơi dơh lơn. Ăp nuĭh ăp nŭn wât n’hanh lĕ đah nău kan lơn yor nău nsum bah ntŭk gŭ rêh. Yor nê ndâk njêng nkual ƀon lan gŭ mhe dơi ƀư uĕh n’hanh di tĭng trong nchrăp bah ƀon lan jao an.

Băng: “Gap lah bu ranh ƀon, nuĭh têh tâm ƀon ri an rgum soan rgŏ jă kon sau n’hao pah kan jan sa, mô knŭng đăp mpăn wăng sa rnăk wâl ma hôm nău geh sa âk gay kon sau nti nsơm. Ŭch rgŏ jă nuĭh ƀon lan djăt ri lor săk he nơm rnăk wâl nơm, kon sau bah he an hăn lỏ, ntrong leo ƀư tĭng ăp ntrong kan. Mpŏng ŭch âk ngăn lah dơi Ngih dak ntuh kơl ndâk njêng ƀư dak bât sĭt ƀon, geh dak sĭt dơh lơn tâm nău ƀư lŏ, hun hao tuch tăm. Knơm nĕ nău ndâk njêng ƀon lan mhe, ndâk njêng nkual ƀon lan gŭ mhe nsĭt tay âk săk rnglăy, ƀon lan mbra hun hao dŭt âk”.

Nău rêh bah nuĭh ƀon lan ƀon Srê Đăng lah êng n’hanh xă N’Thol Hạ lah nsum dôl mô rlu hun hao.

Tĭng wa Lê Bá Dương, Groi kruanh UBND xă N’thol Hạ, nkuăl Đức Trọng, rlău ma ƀon Sre Đăng dơi UBMTTQ VIệt Nam n’gor Lâm Đồng kơp dơn lah nkual ƀon lan gŭ mhe, ntŭk dôl nsrôih ƀư ntrong kan aơ ta 5 thôn hôm ƀa ƀă bah xă. Đah nău ndrel n’hâm soan bah nuĭh ƀon lan ƀư rĭng ăp ntrong leo “Ƀon lan tâm rlong pah kan jan sa-tăch rgâl blău”, “Tâm rnglăp ndrel ƀư ndrŏng n’hanh n’hŭch ach o nâp nâl”, “Druh ndăm ndrel soan ndâk njêng ƀon lan mhe”, lơn lah rgŏ jă “Lam ƀon lan ndâk njêng ƀon lan mhe, nkual ƀon têh uĕh lăng”, nsing nơm xă N’Thol Hạ mbra dơi geh rnoh ndơ ƀư ƀon lan mhe hao prêh tâm năm 2023. wa Lê Bá Dương, lah:

“Ndâk njêng ƀon lan mhe lĕ rgop nsrôih hun hao muh măt bah ƀon lan kơt nău rêh wăng sa bah nuĭh ƀon lan ta xă. Tâm năm tât, ƀon lan xă N’Thol Hạ ndâk njêng tay ăp thôn ƀa ƀă ƀư tĭng ăp thôn mhe, thôn ntoh lư, ƀư tĭng uĕh năi rnoh ndơ ƀư ƀon lan mhe hao prêh”.

Ntoh bah du xă jêr jŏt, đah ƀon lan rnoi mpôl đêt gŭ rêh, yơn knơm geh nău rgâl têh nău wât tâm nău mĭn trong ƀư, ăp ƀon lan bah xă N’Thol Hạ, nkuăl Đức Trọng, n’gor Lâm Đồng mông nar rklaih luh nău ji ngot ach o, hao ndâk njêng nău rêh tŏng ăp n’hanh hơm răm, ntơm hao ndâk njêng rup gui bah du nkual ƀon têh uĕh lăng./.

          Nuĭh rblang: Y Sưng Phê Ja