Tâm nklang mir cà phê ndrih ƀrâng, ngih wa Nông Văn Minh, tâm ƀon Quảng Hoà, thôn Tam Điền, xã Ea Tam, nkuăl Krông Năng nthoh ngăn đah mau chăng bah ngih mhe. Wa nkoch, ngih aơ mhe geh nkra, hoach bar pe rhiăng rkeh prăk ngăn. Ăp ndơ nkra ndrel ndơ nchrăp tâm ngih kŏ tĭng nau vay ơm bah rnoi Nùng. Rnăk wa tă bah Cao Bằng hăn Dak Lak gŭ ntơm năm 1987. Tâm nkuăl neh bri mih nar kŏ tâm di đah ăp ntil tơm tăm, nsôih oah kan văng sa ri ma nau rêh lơn ma ueh:

“Tât ta aơ pah kan jan sa kŏ geh nau ueh rlau ma ƀon ơm, gâp kŏ tăm geh âk tơm tăm jŏ năm. Saơ nau rêh bah rnăk vâl nơm ndrel kônh wa ta aơ ueh lăng âk ngăn. Săk gâp nơm mâp ăp nau vay ơm bah rnoi Nùng An, ân kon se nơm ri ndô môk, ndô đon mô lah nsoh nah ao ơm bah nơm. Tâm ngih hên aơ ri n’ik ngăn, nau ơm bah rnoi nơm mô dơi lơi ôh. Kŏ ŭch ăp rơh kon sau jêh aơ dơi mât nau aơ”.

Ngai đah ngih wa Minh geh bar pe blah mir lah ngih 2 dăp, nâp ueh bah rnăk nô Hoàng Đình Tân, Bí thư Chi bộ thôn Tam Điền. Nô mbơh: Rnăk nô geh ngih prêh mhe nkra tay ân me mbŏ gŭ, hôm nô nơm ri geh ngih aơ nkra bơi tât 2 rmen prăk gay ma gŭ êng.

Tĭng no Tân, ƀon Quảng Hoà rnôk aơ geh bơi tât 60 rnăk ri geh rlau 50 ngih jong ơm. Ăp rnăk kŏ geh bar pe héc ta neh tăm cà phê ndrel âk ngih kŏ geh âk tơm sa play kơt sầu riêng, mắc ca, bơ. Nau văng sa hun hao, nau rêh ueh, nŭih ƀon lan nsôih ƀư rgop ndâk njêng ƀon lan mhe. Ngăn lah, bol ma ngai ma ƀon tơm bah jŏ yơn kônh wa hôm mât nâm ơm nau ueh ơm bah rnoi Nùng:

‘Hôm mât nâm ơm nau ueh ơm bah rnoi nơm tâm nau ƀư njŭn sông jêh ri khĭt ôm. Tâm n’ur nau ơm, njroh mprơ ri hôm geh mât nau ơm, kơt lah lày cỏ, jêh ri bánh chưng, bánh gai. Rnôk aơ, ăp phung mom jêh ri ăp kon sau lah nsum ăp ŭih kŏ blau ngơi nau rnoi nơm. Tâm ƀon lan ri kŏ mât âk ngăn ngih ơm, lĕ ma thôn rnôk aơ knŭng geh 2 ngih xây aơ dơm, hôm e lah ngih klơ da dê”.

Wa Lê Bế Thuỷ Trang, Groi Kruanh UBND xã Ea Tam, mbơh, lam xã rnôk aơ geh 19 rnoi mpôl ndrel rêh, tâm nê rnoi Tày-Nùng geh bơi tât 90%. Rơh rlau aơ, xã mro uănh khlay nau kan văng sa, rêh jêng hăn nsum ma nau mât ăp nau vay ơm bah ăp rnoi. Ngăn lah, ƀon Quảng Hoà hôm mât ngih jong, nau tanh njuh bah rnoi Nùng ndrel dôl ndâk tay nau ơm ƀư mprơ hèo-phườn, hôm ntơ lah nau mprơ lượn, mprơ tâm n’ur. Aơ lah nau ơm ueh ngăn, njêng nau ueh gay ma nkuăl rƀŏng tât nau hun hao pâl n’aih nsum mpôl:

‘Êng nau mât ndrel ƀư ueh ăp nau ơm bah rnoi nơm ri ƀon lan tâm ƀon Quảng Hoà ri kŏ ndrel tâm kơl nsôih hun hao văng sa, jut n’huch ach o. Kơt lah mra geh nau dơi đŏng tâm ƀon Quảng Hoà ri kônh wa bu geh ngih vâl nâp nâl, đăp mpăn, geh âk rnăk lah geh nau dơi hun hao văng sa ueh ngăn, rnăk ach rnôk aơ hŏ n’huch dêh ngăn”.

Ăp ngih prêh klơ tâm nklang mir cà phê jêng n’ur tâm ƀon Quảng Hoà, xã Ea Tam, nkuăl Krông Năng, n’gor Dak Lak. Jêh 35 năm geh âk nau ntrơn, nau rgâl, ăp ngih ơm ueh nê hôm geh mât nâm ơm, geh rnoi Nùng uănh kơt lah ndơ khlay mpêt ngăn gay ma lŏ mât ndrel ƀư ân ueh nau dơi hun hao tâm nkuăl neh mhe./.