Aƀaơ hin, nkual ƀon lan rnoi mpôl đêt n’hanh nkual yôk lĕ n’hanh dôl lah “gôl tơm ach o bah lam dak”. Na nê̆, nău geh rĭng tâm ban bah rnăk rnoi mpôl đêt ta âk ntŭk knŭng geh 40-50% rĭng geh tâm nkual; rnoh nuĭh rnoi mpôl đêt geh 14,7% yơn rnoh rnăk ach o geh bơi 60% dĭng lĕ rnoh rnăk ach o bah lam dak. Đah nău ŭch “Rgum jêt tâm ƀah đah rnoh rêh, nău geh bah nkual rnoi mpôl đêt n’hanh nkual yôk nkôp đah rĭng geh nsum bah lam dak; tât năm 2025 hŭch 50% rnoh xă, thôn, lơn lah jêr jŏt; tât năm 2030 ntơm mô hôm geh xă, thôn, ƀon dŭt jêr jŏt”, Quốc hội lĕ uănh an dĭng lĕ tơm prăk rlău 137 rbăn rmen gay ƀư tĭng bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk lvang 2021-2030, đah 10 nău nchrăp ƀư, 14 nău nchrăp ƀư jêt n’hanh 36 nkô̆ nău ntuh kơl, ntop kơl na nê̆ tâm lvang 1 bah aƀaơ tât lĕ năm 2025.

Rŭn hao rklaih luh ach o bah tơm prăk manh bah rnăk wa Sùng A Khua (rnoi Mông) ta xă Lao Chải, nkuăl Mù Cang Chải (Yên Bái)

Ntŭk ang tâm nău ƀư nkra njêng bah bôk nău kan khlay lah rgâl yor ntop kơl nanê̆, ntop kơl nta an ƀon lan, Bôk nău kan rgum mĭn njêng n’hanh pơk hvi ăp ntrong kan hun hao nkra njêng tĭng trong khlay, ndâk njêng nkual tăm gay ƀư tĭng nău geh tĭng trong rgâl tơm tăm, mpa rong geh săk rnglăy, nta an nău kan, n’hao nău geh an rnăk ƀon lan, n’hŭch ach o nâp nâl. Nkre, ntrôl nuih n’hâm ndâk njêng nău kan tâm nkual rnoi mpôl đêt nsĭng tâm nău geh, nău dăng n’hanh neh ntu ơm geh ta ntŭk. Tĭng TS Hà Việt Quân, Rmôt ndâk njênh nău rgop an tâm nchră lĕ rngôch n’hanh bôk nău kan lam dak hun hao wăng sa rêh jêng nkual rnoi mpôl đêt n’hanh nkual yôk lvang 2021-2030.

“Dơi lah rơh bôk năp tâm lịch sử nău kan rnoi mpôl đêt lĕ saơ Đảng n’hanh Ngih dak nsrôih rgum ntuh kơl an nkual aơ, gay nta an rgâl du trong lĕ rngôch. Ndrĭ nău khlay ngăn dŏng tơm prăk aơ, geh tât nău ôp an rgâl trong gĭt tât hun hao wăng sa rêh jêng nkual rnoi mpôl đêt, nĕ lah rơh bôk năp he uănh nkual aơ lah ntŭk hun hao gay geh nău kơl ntuh kơl, mô di rwăch ta trong nău kơl geh trong ntop kơl kơt lvang bah năp”.

 Đah nău rƀŏng têh uĕh n’hanh rgâl trong pah kan, Bôk nău kan ndơ̆ nkô̆ nău hun hao ntĭm nti nău kan n’hanh mkra nău kan an nuĭh pah kan nkual rnoi mpôl đêt n’hanh nkual yôk gay đăp mpăn n’hanh hun hao wăng sa mô geh lŏ mir. Bôk nău kan l ndâk ƀư êng naư nchrăp ƀư đah hun hao ntĭm nti, hun hao văn hóa n’hanh hun hao trong dak si ta nkual rnoi mpôl đêt n’hanh nkual yôk, tâm nĕ rgum ăp nkô̆ nău kơt: N’hao nău wât, nău kan mpeh trong kan ntĭm nuĭh mô gĭt rplay sam ƀŭt, mât n’hanh n’hao săk rnglăy trong kan mô gĭt rplay sam ƀŭt; ntop kơl ntŭk ntô, năp ndơ văn hóa an nkual rnoi mpôl đêt n’hanh nkual yôk gay n’hao nău geh đah văn hóa an rnoi mpôl đêt, hăn ndrel hun hao pâl nđaih ntŭk gŭ rêh... Wa Vũ Dương Châu, Kruanh Ban Dân tộc, Ủy ban Trung ương MTTQ Việt Nam mĭn lah:

“He an rgum mkra ăp nău ji nuih, jêr jŏt têh bah ƀon lan aƀaơ, jŏ jong âk năm, tâm du đêt rnoi mpôl dơm, kơt nău hay jŭp hât, gŭ ur ơm, êp dak mham, lơn lah n’hŭch ach o, ndâk njêng ngih wâl, rgum rkŭm xă, ƀư hăn lor ăp nkual êng, lơn lah an dăp rgum ntŭk ƀon lan gŭ rgum an geh bah 40 rnăk let lơ, gay dêr pĭch rlâm dak klôn rdu. Tal 3 lah ntuh kơl ăp renoi mpôl đêt hun hao nkra njêng ndoh ndơ, ntrôl dăng ntĭm nău kan, nta an nău mô hôm ƀư lŏ mir, ntrŭt ăp doanh nghiệp râng, rgâl mhe nău kơl mât uănh njrăng bri. Đah ntĭm nti he geh hun hao tay ntĭm nti, n’hao nău wât, ntĭm nti nuih kan, đăp mpăn uĕh nâp an rnôk 4.0, gay ƀon lan ngăch tĭng rnôk 4.0 aơ”.

Tât rnôk aơ, tơm prăk bah bôk nău kan lĕ dơi tâm pă. Ăp gưl ăp nău kan ăp ntŭk bah bôk nău kan ndrel soan, ntrôl ngăch mbơh ƀư ăp nkô̆ nău, nău ƀư bah bôk nău kan, tâm nĕ rlong ƀư n’hanh ntrôl dăng mbơh ƀư ăp ntrong kan hun hao nkra njêng săk rnglăy; ơm jêh n’hanh ndơ̆ an dŏng ntung trong an joi, dŏng, nta an rgâl nău wât, n’hao uĕh nău rêh, n’hao nău geh an ƀon lan bah bôk năm mbơh ƀư bôk nău kan. Nău rgop bah wa Trần Đức Anh, Bí thư Đảng ủy xă Hương Liên, nkuăl Hương Khê, Hà Tĩnh:

“Năm bah năp, ƀư tĭng bôk nău rgop tâm nchră mât ndrăy rnoi Chứt, nău rêh ƀon lan geh âk rgâl, bôl ndrĭ năm tât, Đảng ủy n’gâng kan dŭt ŭch n’gor, Trung ương ơm geh nău ntrŭnh jao an neh bri an ƀon lan rnoi đêt geh ndơ nkra njêng”.

Bah meng nău nâp nâl ntung trong ri hun hao wăng sa rêh jêng ta ăp ntŭk ƀon lan rnoi đêt an uănh mĭn ntrôl dăng nkra njêng ndoh ndơ trong khlay, mât uănh nău rêh nuih n’hâm bah nuĭh ƀon lan hăn ndrel đah ntop kơl ndâk njêng nău kan, ndâk njêng tăch rgâl an ƀon lan hao sâm geh. Lah năm bôk năp ƀư tĭng bôk nău kan rƀŏng tĭng lam dak, bôk nău kan rdâk hao wăng sa jêh srê Covid-19... mpŏng aơ lah trong mkra rgop ntrôl hun hao wăng sa, nkre đăp mpăn nău rêh jêng.