Bơi 70 năm, wa Nguyễn Thị Anh ta nkual ƀon têh Buôn Ma Thuột, n’gor Dak Lak aƀaơ dôl dơn ƀư âk nău kan kơt Kruanh Hội bu ur doanh nhân n’gor, Groi Kruanh Hiệp hội Pâl nđaih n’gor n’hanh ủy viên chấp hành bah âk rmôt ta n’gor n’hanh nkual ƀon têh. Năm âk, nău kan mô ru yơn wa dăp mông nar n’hanh nău kan, lôch uĕh ăp nău kan dơi jao, nsrôih râng ăp nău kan rêh jêng, lŏng bôk tôr.

Wa Ngọc Anh hôm lah kruanh hội đồng quản trị nkre ƀư giám đốc Công ty Cổ phần pâl nđaih Ko Tam, du ntŭk pâl nđaih âk nău uĕh, nsĭt âk văn hóa bah nuĭh Êđê. Ntŭk aơ geh âk nuĭh pah kan, lĕ rngôch lah nuĭh rnoi mpôl đêt dôl râng rhŏ an pâl nđaih. Wa Nguyễn Thị Ngọc Anh nkoch, ndrel đah jêng du ntŭk pâl nđaih geh nău uĕh ntĭt mpơl êng đah văn hóa, ntŭk aơ hôm rƀŏng tât ntĭm nti n’hanh trêng tay nău ŭch văn hóa an oh kon nuĭh rnoi mpôl đêt ta ntŭk.

Aƀaơ mpôl hên rgum an tơm si, nkao, tâm rgop kan ndrel đah ngih sam ƀŭt Đại học Tây Nguyên gay mât njrăng ntil lan bri mpet khlay. Nkre mpeh văn hóa ri rgum an ăp oh nti nsơm ăp rmôt chĭng gông, ăp rnăk kiău ma ri wăch rgum tât ta aơ njroh mprơ, ƀư jêng ntŭk ntô lễ hội nsĭt rup gui Tây Nguyên, yor nău ŭch bah mpôl hên lah ntĭm nti ăp oh gay ăp oh mât rƀăy văn hóa bah nơm.

Ntrong leo ntoh lư nuĭh âk năm deh ƀư sa blău, wa Lê Thị Bơ, ta tổ dân phố 8, nkuăl têh Pơng Drang, nkuăl Krông Buk, n’gor Dak Lak, bôl lĕ 70 năm hôm e gơih pah kan jan sa, tĭng đah mir, du năm geh hang rhiăng rkeh prăk. Wa Bơ an gĭt, aƀaơ, ăp kon lĕ têh da dê, prăk geh bah rnăk wâl mbơm oi bah năp đaơ yơn wa hôm e ŭch pah kan jan sa gay ntĭm nti kon sau geh nău mât êng săk nơm n’hanh ŭch pah kan.

U che bôl săk ranh hôm yơn ma ntop pah kan jan sa, geh 7 sào neh tăm âk ntil tơm kơt tiêu, sầu riêng, cà phê, mắc ca. Moh nar rlu lah sông piăng mô kah, djăt hăn kan ri saơ ngăch dăng, nkre ndơ̆ wăng sa an rnăk wâl, nkre tiăr nti săk soan bah nơm. Hôm kon sau gơih blău djăt nău u che, rnăk wâl rêh tâm rnglăp tâm rgum.

Hôm đah wa Huỳnh Thị Ba Lan, 62 năm deh, ta Tổ dân phố 3, phường An Lạc, nkual têh Buôn Hồ, nău răm săk ranh dơi nsơr soan, mât uĕh nău ƀư bah nuĭh ranh tâm ăp nău kan nsum mpôl. Wa lĕ nsrôih râng n’hanh mât uĕh nău ƀư tơm bah câu lạc bộ nuĭh âk năm deh ta ntŭk, rgŏ jă rgop prăk nkrem kơl nuĭh gay mât uĕh ăp nău kan kơt chop khâl kop ji, an ndơ kon se ach o, bu ur jêr jŏt, nta an prăk nkra njêng ntop kơl nuĭh jêr jŏt...

Phường An Lạc mpôl hên ri ƀư câu lạc bộ dưỡng sinh dân vũ, dôl rêng hvi n’hanh kuăl jă lĕ rngôch oh yuh râng ntrong leo gay nsĭt tay nău răm đah nuih n’hâm n’hanh săk soan. Ndâk njêng du câu lạc bộ ăp rơh ri ndrel rgop prăk gay kơl ăp oh yuh geh nău rêh jêr jŏt hao lơn.

Tĭng wa Triệu Thị Ngoan, Kruanh Rmôt nuĭh âk năm deh n’gor Dak Lak, n’gor aƀaơ geh rlău 216.000 nuĭh âk năm deh, geh 11,3% rnoh nuĭh. Mât uĕh nău ƀư tâm ăp nău kan, ntrong leo, bah năm 2022 tât aƀaơ nuĭh âk năm deh lam n’gor lĕ rgŏ jă rnăk wâl, kon sau an âk ha neh, rgop rlău 18.000 nar luh n’hanh rlău 24 rmen prăk gay ƀư trong thôn ƀon n’hanh ăp ndơ ƀư ntŭk gŭ rêh êng. Đah rlău 70% nuĭh âk năm deh lah bu ur, ăp u, ăp mê̆ lĕ nsrôih râng n’hanh ntrôl dăng ntrong leo “Săk ranh-nuih n’hâm uĕh ang”, “U che, me bơ̆ leo lor, kon sau gơih blău”, pơk hvi ntrong ƀư “Rnăk wâl nuĭh âk năm deh mô geh kon sa ƀư tih phạm luật”, “Rnăk wâl ntrong leo lor”... trêng nău gơih nđơr, nta an rêng hvi ntrong leo nuĭh âk năm deh ndâk njêng rnăk wâl văn hóa, uĕh lăng, hơm răm.

 Lĕ rngôch ăp nău kan bah Rmôt nuĭh âk năm deh lah bu ur âk năm deh râng dŭt n’hâm. Câu lạc bộ dưỡng sinh, văn hóa, njroh mprơ, thể dục thể thao, câu lạc bộ ăp rơh tâm kơl bu ur geh rlău 70%. Bu ur âk năm deh mât uĕh mro nuih n’hâm hăn lor, ntrong leo tâm rnăk wâl n’hanh tă bah nău rêh jêng, hăn lor tâm nău rgŏ jă kon sau mô geh ăp nău rmanh rêh jêng, ndâk njêng rnăk wâl hơm răm, uĕh lăng, rgŏ jă kon sai, rnăk wâl an neh, an soan gay rgop tâm bôk nău kan ndâk njêng thôn ƀon mhe, nkual ƀon têh uĕh lăng.

Bôl săk ranh yơn âk nuĭh âk năm deh ta Dak Lak, ngăn lah bu ur hôm e dŭt n’hâm râng ăp nău ƀư tâm rnăk wâl mô lah tâm nău rêh jêng, rgop soan nơm gay ndrel hun hao wăng sa, ntrôl dăng ntrong leo. Aơ lah ăp nuĭh ntoh ang hăn lor, ntrong leo, saơ rup ndah bah nuĭh bu ur Việt Nam bôl ta moh năm deh hôm e “Gĭt blău nău kan ngih dak, gơih blău nău kan rnăk wâl”.