Tâm jay jêt bah rnăk wâl ta ƀon Phơng, xă Ea Tul, nkuăl Cư M’gar, n’gor Dak lak ăp nar yuh H’Hương Niê (rnoi Êđê) hôm e mât cheh tanh ăp ao, nah bŭt, nah tanh. Đah yuh H’Hương Niê, ăp nar dơi gŭ tâm rpăi tanh mô knŭng lah nău kan  geh tay prăk an rnăk wâl năp tâm nău rêh, ma khlay lơn lah nău ŭch n’hanh rgop mât ndrăy nău uĕh bah rnoi nơm. Yuh H’Hương Niê an gĭt:

“Gâp saơ tâm ƀon lan nuĭh Êđê geh âk nuĭh bu ur ranh mư dơi tanh mbân ao, nah tanh, hôm ăp nuĭh mom ri mô dơi tanh. Yor nê, nău kan cheh tanh bah nuĭhg Êđê nar lơ roh. Jêh rnôk tốt nghiệp gưl 3 gâp ntrŭnh tĭng nti tanh ngih sam ƀŭt Cao đẳng nghêd ta nkual ƀon têh n’hanh jêh nti gâp sĭt nti tay bah ăp nghệ nhân cheh tanh ranh tâm ƀon”.

Yuh H’Hương Niê lah nuĭh trêng tay nău ŭch đah ndơ cheh tanh an âk oh yuh ta ntŭk. Oh yuh tâm rmôt kan ndrel nung nar tĭng đah nău rêh mir ba, tât măng n’hanh ăp nar dŭt pơh lŏ ndăn gŭ ta rpăi tanh. Ăp ndơ yor oh yuh ƀư geh lah ndơ dŏng tâm nău rêh ăp nar kơt nah bă oh bê, nah mbân, dŭng... Yuh H’Hương Niê lah nuĭh ngăch prăl gĭt nău ŭch bah nuĭh dŏng. Bâh nĕ, yuh ê nkra ăp ntil ndơ, yơn hôm e mât rup gui way ơm nah tanh bah nuĭh Êđê, đah brai tơm lah ônh, chăng. Ntĭt nsa kơt ê nkra tay ăp jâng aơ, jâng nah mbân ăp rup gui 3 jônh, rup n’gâng, mô lah rup gui bah tơm si, nkao, khay, măt nar.

Knơm nău mĭn ƀư mhe n’hanh ăp mpang tay blău, nău gĭt tĭng tâm rup ndrang bah ăp nuĭh tâm rmôt nar lơ ăp oh yuh kơp dơn âk ntŭk nchăm. Rĭng du khay rmôt kan ndrel tăch geh nklăp 200 ndơ đah rnoh khlay geh bah 50.000 prăk tât 1,2 rkeh prăk du ntil ndơ, du hê geh đăp mpăn bah 3-4 rkeh prăk du khay. Jêh 5 năm râng tâm rgop, geh 6 nuĭh lĕ rklaih luh ach o. Yuh H’Hương Niê nkoch:

“Năm 2018 gâp dâk ndâk njêng rmôt kan ndrel cheh tanh, rnôk bôk năp knŭng geh 11 nuĭh, aƀaơ lĕ geh 15 nuĭh. Ăp yuh pah kan geh prăk tĭng ndơ. Rlău ma ăp ndơ way ơm, gâp ƀư ăp ndơ tâm di đah nău ngăn, rnoh tăch n’hanh nău ŭch dŏng ăp nar. Rmôt tâm rgop bah mpôl hên cheh tanh ăp ndơ kơt nah mbân, ao, nah ntơ̆k, dŭng... Ntŭk rwăt nchrăp ndơ lah oh yuh tanh jêh ndơ nĕ”.

Đah nău ƀư lah Groi Kruanh Hội liên hiệp bu ur xă Ea Tul, nkuăl Cư M’gar, yuh H’Hương Niê nkoch trêng mpeh nău khlay văn hóa uĕh bah mbân ao ăp rnoi mpôl Tây nguyên, tâm nĕ geh kho ao Êđê. Yuh rgŏ jă oh yuh dŏng kho ao tanh bah nơm tâm ăp nar hội, nsông nsao...

Mô knŭng tât tanh, trêng ntĭm an kônh wa nău kan way ơm, yuh H’Hương Niê hôm joi ăp ndơ, tă bah nău nkoch ndơ ta ăp trang mạng xã hội. Mô knŭng kơl oh yuh tâm rmôt geh tay prăk đăp mpăn, đah nuih n’hâm ŭch rŏng, yuh H’Hương Niê hôm e geh âk nău mĭn kơl ăp oh yuh, kon se jêr jŏt, koet nte n’hanh râng âk jrô ntĭm cheh tanh an druh ndăm ta ntŭk:

“Tâm rmôt geh ăp oh yuh jêr jŏt jêng rmôt geh nău mĭn kơt dŏng tay bok ơm jêh rnôk kachoh ao, nah an kachoh ăp ndơ jêt nkre mât njrăng ntŭk ntô gŭ âm n’hanh tăch ƀư prăk nkrem ntop kơl oh yuh bu ur, kon se jêr jŏt, geh koet nte gay khân pơng dơi wât nău rêh kon nuĭh mô geh ntlơi he. Ăp ndơ aơ kơt kăt sŏk, ăp dŭng jêt. Gâp mpŏng ăp oh bah kơi mbra gĭt mât ndrăy nău kan cheh tanh way ơm, nău uĕh bah rnoi mpôl nơm. Tal 2 lah nar lơ geh âk ntŭk tăch an ndơ cheh tanh bah oh yuh”.

Tâm ăp năm bah năp, Liên hiệp bu ur nkuăl Cư M’gar, n’gor Dak Lak lĕ tâm rgop đah ntŭk ntĭm nău kan rgŏ jă oh yuh rnoi mpôl đêt ta ntŭk râng ăp jrô nti nău kan cheh tanh. Rmôt lĕ rgŏ jă ăp yuh râng tâm rmôt kan ndrel cheh tanh ta ƀon Brăh xă Ea Tul, nkuăl Cư M’gar đah âk nuĭh râng. Rmôt lĕ ntop kơl an rmôt kan ndrel manh 35 rkeh prăk bah prăk nkrem bu ur ntơm rdâk njêng nău kan, nkre tâm rgop đah Ngân hàng CSXH nkuăl nta an oh yuh tâm rmôt kan ndrel geh tay prăk manh gay rwăt brai, ndơ dŏng nkra njêng... Đah tơm ndơ dơh joi kơt brai sut, brai ngăn... ăp yuh dơi ndăm geh mông nar ru gay geh tay prăk rgâl an nău rêh rnăk wâl. Tâm ăp năm bah năp, rmôt kan ndrel cheh tanh dơi oh yuh mât n’hanh hun hao, rgop jŭt jăng ach o, râng ndâk njêng thôn ƀon mhe.