Hăn tâm trong bê tông geh tăm kao meng trong, wa Kpuih Hạnh-Bí thư chi bộ nkre Kruanh ƀon Neh Xo, xã Ia Tôr, nkuăl Chư Prông mbơh, trong aơ geh ăp rnăk ƀon lan nkra tă bah năm e ndrel du gưl nau dơi bah bôk nau kan ndâk njêng ƀon lan mhe tâm nkuăl. Ndrel ma ƀon lan ueh, kloh, jêh rnôk lôch nau kan ndâk njêng ƀon lan mhe, kônh wa ƀon Neh Xo kŏ geh n’hao prêh, knŭng hôm 6 rnăk (tâm rnoh 150 rnăk) hôm ach o. Tĭng wa Kpuih Hạnh, đah du ƀon nŭih rnoi mpôl đê̆ kơt Neh Xo, gay bonh đă kônh wa nsum n’hâm, soan, ri nau leo trong bah cán bộ, đảng viên lah nau khlay:

 “Đảng viên hăn lor, ƀon lan tĭng ba kơi. Ê lor đảng viên ân ƀư lor tâm ăp nau kan kơt tăm kao, n’gar trong, kuih ntu ân ndŏk, ƀư ngih ăch chrach, ƀư tĭng ueh ăp nau ntrŭnh, ntrong kan, nau trŭnh bah đảng, pháp luật bah Ngih dak, nkoch mbơh ân kônh wa ƀư ueh, n’hao nau săk geh, rgâl nau mĭn kan, mô ân tâm gŭ ur sai vah ơm, ân kon se hăn nti tât dŭt tât lôch”.

Tâm kơt ma nê, ƀon Bang, xã Ia Tôr, 11 đảng viên tâm chi bộ bonh đă rnăk vâl, băl mpôl rgop tơm prăk, nar kan nkra trong ndrel ƀư nau kan mpeh răk ntŭk ntu, ntĭm nti, dak si. Chi bộ thôn ndrel n’gâng kan, mặt trận rmôt kan tâm xã Ia Tor bonh đă ƀon lan nsôih nau tăm tay cà phê, mô dơi koh lơi tơm tăm jŏ nar, kơt tĭng nti nau tŏ dak têm nkrem dnrel dŏng ndeh klư lăp tâm nau kan. Ntơm năm 2023, âk ntil tơm tăm geh dơi, geh rnoh, hŏ kơl an ăp rnăk tâm thôn geh ndơ sa, ndơ têm. Wa Puih Păk, nŭih ƀon lan ƀon Bang, mbơh:

‘Kăl e nơh jêr jŏt lơn, ma ƀa hun ri mbơm oi hôm, du đê̆ rnăk pah kan jan sa blau geh ngih, geh ndeh, mô geh ngih ntă ja kơt kăl e nơh ôh. Rnôk aơ nau rehe hun hao lơn ma kăl e”.

 Rnôk aơ, xã Ia Tôr, nkuăl Chư Prông geh rau 1.100 rnăk, đah 5.079 nŭih. Tâm nê, nŭih rnoi mpôl đê̆ geh bơi tât 50%. Tâm âk năm ndâk ƀon lan mhe, Đảng uỷ xã hŏ rđau, đă ntrong kan chính trị tă bah xã tât thôn, ƀon, rgâl mhe nau kan, rgum nkoch trêng, bonh đă ƀon lan nsôih râng, ƀư rgâl mhe nau kan.

Dŭt năm 2023, xã geh 19/19 nkô̆ nau ndâk njêng ƀon lan mhe. Ăp ntil tâm nau rêh ƀon lan hŏ geh nau rgâl. Rnôk aơ, rnoh rnăk ach o ndrel êp ach o tâm lam xã hôm tâm dâng 8%; nau geh du hê bôk nŭih geh 47rkeh/năm; nau kan ntĭm nti, dak si, mât chăm n’hâm soan, mât ntŭk ntu gŭ âm, kơl an, ndâk nau rêh văn hoá tâm ntŭk gŭ geh uănh khlay, nau kan mât đăp mpăn chính trị, đăp mpăn nau rêh geh mât nâp.

Wa Nguyễn Quang Phương, Groi Bí thư Rnâng kan Đảng uỷ xã Ia Tôr mbơh, Đảng bộ xã mra lŏ rđau lam ntrong kan chính trị ntơm bah xã tât thôn, ƀon gay ma mât nâp ndrel n’hao prêh nau dơi ƀon lan mhe. Tâm nê, mra lŏ ntô̆ n’ha nau kan leo trong lor bah ăp đảng viên gay hăn hăn kơl an ma ƀon lan n’hao nau săk geh văng sa:

 ‘Rnâng kan đảng uỷ xã hŏ ndâk nau nchrăp nkoch trêng ntĭm nti ăp nau ntrŭnh rđau đă tât đảng viên, cán bộ ndrel ƀon lan bah xã. Bah nau ntĭm nti ndrel pah kan tĭng nau mĭn, nau kan Hồ Chí Minh ri đảng viên tâm dăch ma ƀon lan lơn, kơl an ƀon lan lơn, djăt nau rgop, nau mĭn, nau ŭch bah ƀon lan, nkoch mbơh ân đảng uỷ, n’gâng kan bah nkuăl”.

 Đah nau tâm rnglăp tâm nau ƀư ăp nau ntrŭnh, bôk nau kan, nau nchrăp kan, đảng uỷ, n’gâng kan ndrel ƀon lan dôl ndrel ndâk njêng nau rehe nar lơn ntor ueh tâm n’har bri Gia Lai./.