Ăp nar êp tết năm mhe 2023, ur sai yuh Trần Ngọc Vũ tâm thôn 10, xã Tâm Thắng, nkuăl Cư Jút mro mô ru pah kan mir hvi 5 ha bah rnăk nơm gay ma ngăch ntrơn leo lơi n’gâng n’gar, koh lơi tơm cà phê, tiêu gay ma pă ân neh ân bu uih nkra trong. Nô Trần Ngọc Vũ nkoch, geh nkoch trêng, bonh đă ri ma ur sai nô pă rlau 11 rbăn m2 neh, koh lơi 300 tơm cà phê, 250 n’gâng tiêu dôl ma klih play gay ma nkra trong hăn. Rnoh neh ndrel drăp ndơ hao bơi tât 2 rmen prăk. Aơ lah drăp ndơ têh. Bol ma bôk năp saơ nghoach đŏng, yơn lah mĭn jru, nau pă neh nkra trong lah nau ueh bah Ngih dak, ăp nau rvê ân jăng lơi. Nô Trần Ngọc Vũ, ngơi:

            ‘Rnăk hên geh N’gâng kan kŏ kơt lah ntoh măt bah rmôt bu nkoch mbơh gay ma pă ân neh ân bu nkra trong, bu hăn tât ta ngih gay ma bonh đă nơm. Ur sai hên saơ geh nau dơi mpeh jŏ jong bah nau pă ân neh, lah jêh pă mra geh trong hăn ân kônh wa nơih ueh hăn ro, nchuăn rdeng ndơ tuch tăm kŏ nơih, ntrong gung ƀon lan mra geh âk nau ueh mhe. Saơ ăp nau ueh kơt nê ri rnăk hên kŏ tâm ban nau ân đŏng”.

            Kŏ kơt tĭng nau kan pă ân neh nkra trong bah xã Tâm Thắng, nô Lê Anh Tuấn tâm thôn 8 hŏ pă rlau 2000 m2 neh ndrel ma 50 tơm cà phê, 70 n’gâng tiêu. Rnoh neh ndrel drăp ndơ pă jao hao tât 700 rmen. Nô Lê Anh Tuấn mbơh, ntoh măt bah UBND xã mbơh nau kan Ngih dak knŭng đăp mpăn nau pă tŏng tơm prăk gay ma nkra trong, hôm neh geh ma nkra trong ri mô geh tơm prăk. Ndri ma, lah nŭih ƀon lan mô ân dơm neh ri jêr ngăn ƀư jêh. Ntơm bah nau jêr aơ, rnăk vâl hŏ ŭch nau pă neh gay ma nkra trong:

            ‘Rmôt kan nkoch trêng bonh đă, mbơh ăp nau geh dơi bah nau kan pă neh nkra trong ndrel n’hao nau dơi ân nkuăl, săk gâp ndrel ma rnakư vala kŏ geh nau ndơn đŏng ri kŏ ŭch Trong ngih nơm ntơm nơh jê̆, dak bŏk âk ngăn tâm yan mih, rnôk aơ geh Ngih dak ntuh kơl prăk nkra trong têh ri ƀon lan hăn ri nơih ŭch ngăn. Geh trong têh hăn rlet ri ăp nau khuch bah băp măt mô rvê ôh, jêh aơ mra geh dơi joi, săk gâp nơm mra pă êng neh, nau dơi geh nsum ma âk nŭih ngăn”.

            Ƀư tĭng nau ntrŭnh bah HĐND nkuăl Cư Jút, UBND nkuăl pă tơm prăk nkra trong hăn tât xã jong 7,5 km, nthoi xã Tâm Thắng, nkuăl têh Ea Tling ndrel xã Trúc Sơn. Trong geh nkra ntơm khay 10/2022 ndrel nchrăp mra jêh tâm nklang năm 2024 ri jêh ndrel geh lăp dŏng. Tâm nau ntrŭnh bah HĐND nkuăl lah kloh, yor jêr mpeh tơm prăk, UBND nkuăl mra pă tŏng tơm prăk ndâk nkra dơm, hôm lah pă êng neh gay ma ntrơn ntŭk ân nkra trong ri jao ân ăp xã, nkuăl têh nchrăp ƀư nkoch trêng ndrel bonh đă ƀon lan pă ân neh gay ma ƀư.

            Wa Trần Thế Quang-Bí thư Đảng uỷ xã Tâm Thắng mbơh, trong hăn rlet xã jong 3,2 km. Gay bôk nau kan geh ntrŭnh ƀư tĭng nau nchrăp, Đảng uỷ xã ndâk rmôt ƀư kơl nau kan nkoch trêng bonh đă ăp rnăk geh neh tâm nkuăl pă êng neh gay ma nkra trong. Tât rnôk aơ, geh 57/67 rnăk ndơn pă êng neh gay ma nkra trong. 65% rnoh neh geh ntrơn jao pă, hôm 35% đŏng mra geh ƀư tâm rơh tât. Trong hăn xã Tâm Thắng mra geh nthoi trong hăn sŏng bah năp lơ 3/2. Rnoh neh geh pă kơl an bah ƀon lan bơi tât 12 rmen prăk. Nau pă êng neh, tơm tăm, drăp ndơ gay ma nkra trong ân ƀon lan nsing tâm nau ŭch êng. Wa Trần Thế Quang, ngơi:

            “Phung hên mbơh ân ƀon lan saơ rnôk ăp trong hăn geh pơk mhe geh hăn rlet ri jêh rnôk jêh nkra trong rnoh neh tâm nê mra hao khlay ngăn. Nau ntrŭnh UBND nkuăl kŏ geh nau pă kơl an ndrel mra leo lăp mbrơi tâm ăp nau dŏng neh gŭ lah saơ geh tâm di, ndrel mô kâp ndŏ ân ăp ntil tơm prăk ƀư rgâl săm ƀŭt kơp dơn dŏng neh. Nau aơ der dơi nau kan ƀon lan hŏ pă ân dơm geh gay ma nkra trong ri mô kâp ndŏ ăp ntil tơm prăk mô lah ƀư nau kan ân geh ndŏ tơm prăk gay ma nkra tay săm ƀŭt kơp dơn nau dơi dŏng neh”.

            Tĭng wa Nguyễn Anh Tú, Kruanh UBND nkuăl Cư Jút, nau kan pă êng neh, tơm tăm tuh mbo ndrel drăp ndơ gay ma nkra trong hăn tâm ăp năm rlau aơ mô knŭng geh mro tâm xã Tâm Thắng, ma tâm dĭng lĕ ăp xã, nkuăl têh tâm lam nkuăl đŏng. Nau kan ƀon lan pă êng neh âk jêt met vuông geh rnoh khlay âk jêt rmen prăk ƀư nkra trong hăn hŏ ndrel ma dôl rgop nau ueh tâm nkô̆ nau ân jêh lôch nau kơp dơn ƀon lan mhe bah nkuăl Cư Jút tâm năm 2025./.