VOV4.M’nông: Âk năm aơ, nuĭh ƀon lan ta ăp xă Ea M’nang, Quảng Tiến n’hanh nkuăl têh Quảng Phú, nkuăl Cư M’gar (Dak Lak) an ât n’hôl ƀô yor ƀô ôm luh bah ntŭk ndŏk nja Đắk Ánh, xă Quảng Tiến. Bôl nkuăl Cư M’gar lĕ pă an neh gay trơn, yơn mô geh prăk ƀư, jêng trong nchrăp ƀư ndâk njêng ntŭk ndŏk nja mhe hôm e “Gŭ jâng ta ntŭk”. Mô dơi trơn ndŏk nja, nuĭh ƀon lan hôm e rêh tâm nău n’hôl ƀô, ăp xă ri jêr đăp mpăn tŏng rnoh an ƀư ntŭk ntô an ndâk njêng ƀon lan mhe.

Trong Phan Bội Châu nthoi nklang nkuăl têh Quảng Phú đah ăp xă Ea M’nang n’hanh Quảng Tiến jong 2 km. Ta ntŭk bah nkuăl têh Quảng Phú 80 mét, geh ntŭk ndŏk nja Đắk Ánh, geh êp trong n’hanh lĕ gŭ âk năm. Yuh Nguyễn Thị Hà, gŭ xă Ea M’nang lah, du nar geh bơi 10 bôk ndeh rdêng ndŏk nja dŏng bah nkuăl têh Quảng Phú, Ea Pốk n’hanh ăp xă Quảng Tiến, Ea M’nang, Ea Mđroh... rgum sĭt. Ndŏk nja dơi nkhŭt prêh jêh nĕ mkra su đah ty bah kơi nĕ tâp bôr. Ăp nkual ƀon lan gŭ kiău ma geh n’hôl ƀô yor nsuk n’hanh ƀô ôm, khuch têh tât săk soan. Yuh Nguyễn Thị Hà ji nuih lah:

Du nar geh nklăp 40-45 tân ndŏk nja dơi rgum sĭt ntŭk nkhŭt ndŏk nja Đắk Ánh

“Gâp ƀa ƀơ hăn rgăn trong aơ, khân pơng su nja, jăng njŏk lêng lang ƀư nsuk ƀô ôm dŭt khuch. Ƀô ôm đah nsuk khuch tât săk soan bah nuĭh ƀon lan. Âk rnôk sial têh hăn rlău klôn leo n’ăp ndŏk nja tâm mir n’ăp tâm jay. Lah nsum dŭt ƀâ̆”.

Ndŏk nja Đắk Ánh gŭ ta nkual xă Quảng Tiến, hvi nklăp 1 ha, geh bah năm 1997. Aƀaơ yor Công ty ntŭk ntô gŭ âm nkuăl têh Cư M’gar mât uănh, pơk dŏng. Du nar geh nklăp 40-45 tấn ndŏk nja dŏng sĭt rgum. Ndŏk nja dơi mkra đah ty jêh nĕ tâp bŭl, mô đăp mpăn ntŭk gŭ âm. Rnoh neh mkra tâp bŭl kơt lah lĕ hôm, ndŏk nja rdêng sĭt mô geh ntŭk n’gâr, âk tơ̆ li lêng luh ta trong, khuch ntŭk ntô gŭ âm bah nuĭh ƀon lan.

Wa Nguyễn Thị Thanh Vân, Groi kruanh UBND xă Quảng Tiến an gĭt, ndŏk nja aơ lĕ mô hôm tâm di đah dăp rgum nsum bah nkuăl, du gâl dơi dăp rgum jêng neh gŭ. Lah mô dơi trơn ơm, nuĭh ƀon lan an ât nău ƀô ôm, ma rnoh ndơ ƀư đah ntŭk ntô ndâk njêng ƀon lan mhe n’hao prêh bah xă jêr dơi jêh.

“Xă Quảng Tiến lĕ âk tơ̆ ƀư sam ƀŭt dăn đă tât UBND nkuăl dăn nău ntrŭnh an trơn ntŭk ndŏk nja tât ntŭk tâm di, n’hanh nkuăl lĕ ŭch an pă ntŭk êng gay trơn, tât aƀaơ mô hŏ dơi ƀư. Bah năp, xă lĕ dăn đă UBND nkuăl ntĭm rđău Công ty ntŭk ntô nkual têh Cư M’gar rgum, mkra ndŏk nja rgum uĕh gay đăp mpăn ntŭk ntô gŭ rêh an nuĭh ƀon lan”.

Ndŏk nja ta ntŭk Đắk Ánh, xă Quảng Tiến, nkuăl Cư M’gar.

Wa Lê Nam Cao-Kruanh UBND nkuăl Cư M’gar an gĭt, nău ntŭk ndŏk nja Đắk Ánh ta xă Quảng Tiến âk năm ƀư n’hôl ƀô ntŭk ntô khuch tât nău rêh bah nuĭh ƀon lan, nkuăl lĕ dơi gĭt nău mbơh. Nkre, lĕ dơi dơn nău dăn đă bah UBND xă Quảng Tiến mpeh nău trơn ntŭk ndŏk nja luh nkual ƀon lan gŭ tât ntŭk tâm di. Nkuăl lĕ dăp rgum ntŭk mhe hvi 10,5 ha ta xă Ea M’droh gay trơn. Yơn lah, tâm trong nchrăp dŏng prăk đêt năm bah nkuăl ri mô dơi pă, nău ndâk ƀư mô dơi ƀư.

“Tâm trong nchrăp đêt năm bah aƀaơ tât năm 2025 ri mô dơi pă prăk ntuh kơl trơn tât ntŭk ndŏk nja mhe. Jêng nău rƀŏng aƀaơ an mkra chuk rli, su, tâp bŭl n’hŭch n’hôl ƀô; ăp khay ri đă ntŭk kan răk ntŭk ntô gŭ âm răk rao kiău ma gay đăp mpăn trong hăn uĕh ntŭk ntô gŭ âm. Nkuăl geh nău ntrŭnh kon nuĭh tâm rgop gay kuăl jă ntuh kơl, n’hanh lĕ kuăl jă yơn nău kan aơ jêr yor mô geh nsĭt săk rnglăy dâl, đêt doanh nghiệp janh ntuh kơl. Aƀaơ kâp prăk bah ngih dak dơm”.

Ndŏk nja lêng lir lar ta trong hăn ƀư n’hôl ƀô ntŭk ntô gŭ âm.

Mô gĭt ndâng tât mư geh prăk gay trơn ntŭk ndŏk nja Đắk Ánh ta xă Quảng Tiến, nkuăl Cư M’gar tât ntŭk mhe gay đăp mpăn ntŭk gŭ âm. Gay n’hŭch nău n’hôl ƀô, ntŭk kan mât uănh an geh ăp trong kơl lor tâm nău rgum, mkra ndŏk nja; nkre ntrôl dăng nkoch trêng, rgŏ jă ƀon lan nkhŭt ndŏk nja di ntŭk ntrŭnh./.

          Nuĭh rblang: Y Sưng Phê Ja