VOV4.M'nông: Đăk Bu So lah xã n'har bri mpeh nkuâl Tuy Đức, ngoăy tâm 2 nkuâl dŭt ach o n'gor Dak Nông geh kơl bôk nău kan 30a bah Chính phủ. Aƀaơ kônh wa ăp rnoi nuĭh ta nkual n'har bri dja dôl nsum suan du nuih n'hâm hun hao wăng sa rêh jêng kon nuĭh, nsrôih gay Đăk Bu So jêng xã lor bôk năp bah nkuâl tât rnoh rdâk njêng ƀon lan mhe.

Tâm trôm jay têh hvi, bu ranh ƀon Điểu Gay, ta ƀon Bu Ndrung, xã Đăk Bu So, nkuâl Tuy Đức, rah rơch rhơn wơt năch. Lah nuĭh dâk leo hăn lor bôk năp tâm nău kan wăng sa ta nkual n'har bri, păng nkoch, aƀaơ săk hŏ ranh, suan hŏ djôr gay hăn luh mir jan ba, jêng păng hŏ tâm pă lĕ rngôch rnoh hvi neh tăm cà phê an ăp oh kon, rĭng ăp nuĭh 2ha. Aƀaơ păng kan nsum đah ăp n'gâng kan  nsum mpôl ta ntŭk nkoch trêng rgŏ jă kônh wa mô an mpôl mhĭk djơh nde, nsŭk nsôr, mô tăch neh ntu ma ân ôp joi trong tăm cà phê, tiêu an săk geh âk, nsrôih wăng sa gay klaih rlău ach o.

Ngăn ma lah nău rêh bah kônh wa Bu nong ta ƀon Bu Ndrung dja hôm jêr jŏt ngăn, nău gĭt blău bah kônh wa hôm đêt, hun hao wăng sa dŭt jêr jŏt ngăn đŏng. Tĭng gâp mĭn lĕ rngôch oh nô kônh wa Bu nong ta ƀon Bu Ndrung, Bu Boong mpôl hên ta aơ geh nsum 1 nău mĭn dơm, ntơm bah cán bộ lĕ rngôch ăp gưl ndrel rgŏ jă kônh wa mơ dơi, lah êng du hê bu ranh ƀon he rgŏ jă, têk ndrêng, nkoch trêng dơm ri mô tŏng nău dơi kônh wa djăt tĭng. Rgŏ jă kônh ân ngơi hăn ndrel đah ƀư, kônh wa saơ dơi nău tam ri mbra djăt tĭng ƀư nkre.

Tĭng nô Điểu Lim, Kruanh ƀon Bu Boong, nău jêr bah nuĭh ƀon lan lah nău kan tuch tăm kơt ƀư cà phê, tiêu nsing tâm rnoh khlay bu rvăt. Bol ma kơt nê̆, đah nău ntuh kơl bah ngih dak n'hanh nsum suan du nuih n'hâm bah ƀon lan, ntŭk ntô ntung trong n'har bri dja hŏ ăp tŏng hôm, jêng nău rêh bah nuĭh Bu nong lơn ma săk ntơr uĕh:

Nău rdâk njêng ntung trong tâm ƀon lan, jut jăng ji ngot n'hŭch ach o an kônh wa lah ngoăy tâm ăp rnoh ŭch tât rdâk njêng ƀon lan mhe, ntơm bah nê nău rêh bah kônh wa dơi hun hao lơn. Gay dơi tât rnoh nê he ân tâm rnglăp, tâm kơl nsum tâm nău rêh, ntơm bah nău pơk trong n'har bri, nău pơk trong mbluh tât thôn ƀon, tât nău hun hao tuch tăm, tăm tiêu cà phê, ntop kơl ăp rnăk ach o jêr jŏt...

Ntŭk ntoh lư tâm rdâk njêng ƀon lan mhe ta Đăk Bu So lah kônh wa hŏ gĭt tĭng kơn ntĭk uĕh suan dăng mpeh săk tơm văn hóa ăp rnoi nuĭh gay pơk trong rƀŏng wăng sa, rhŏ dŏng an năch pâl nđaih. Wa Phạm Thị Dung, Kruanh ƀon Bu Ndrung, an gĭt, ƀon hŏ njêng dơi rmôt tâm boh nău kan way ơm, mô dơn nta joi nău kan rnôk mông nar ru mir ba, ma hôm kơi ntop geh tay wăng sa an kônh wa đŏng.

Tâm ăp năm rlău aơ mpôl hên hôm mât dơi rmôt chĭng gong, n'hanh njêng dơi rmôt tâm boh gay n'gon ndrănh yăng, nta joi nău kan an oh yuh bu ur tâm ƀon, hôm ăp che ri tanh ăp sah khiău, nĭr rang dŏng, ăp u me ri cheh tanh bok brai. Nsrôih gay mât ndray n'hanh mpư n'hao dơi ăp rnoh khlay văn hoá way ơm n'hanh nău kan way ơm bah ƀon lan Bu nong đŏng.

Wa Ngô Văn Thương, nuĭh dơi manh ƀư kruanh UBND xã Đăk Bu So, an gĭt, tât aƀaơ, xã hŏ dơi tât 16/19 rnoh rdâk njêng ƀon lan mhe. Nău rêh bah nuĭh ƀon lan lơn ma dơi rgâl geh, rĭng nsĭt geh năm 2021 tât 40 rkeh prăk/nuĭh. Ntrôl dăng tĭng ƀư ăp rnoh tât kan gưl neh dak, rgum an lor ăp thôn ƀon nuĭh rnoi mpôl đê̆, kơl kônh wa n'hao nău dơi pah kan jan sa lah trong rƀŏng gay Đăk Bu So nsrôih lah xã lor bôk năp ta nkual n'har bri Tuy Đức mpeh tât rnoh bôk nău kan rdâk njêng ƀon lan mhe tâm 3 năm tât.

Xã geh 2 ƀon n'hanh 1 thôn mpeh săk dŭt jêr jŏt. Tâm nău n'hŭch ach o ri ndrel đah nău nkoch trêng rgŏ jă kônh wa, tơm ndơ bah ngih dak ntơm bah ăp bôk nău kan nsĭt ri an lor âk lơn an ăp ƀon dja gay kơl kônh wa hun hao wăng sa. Bôk năp lah kơi năp nti kỹ thuật mât chăm, tâl bar lah lor ntuh kơl ntŭk ntô ndơ dŏng, tâl pe lah ntuh kơl ăp trong ntĭt leo wăng sa  pơk hvi, n'hao nău gĭt dơn êng nău kan n'hanh tĭng kơl n'hao nău rêh an kônh wa, lơn lah ta ăp ƀon rgum tơm n'hŭch ach o  bah nkuâl.

Nsing nơm đah nău ntuh kơl geh rgum tơm geh nkô̆ khlay bah ngih dak, nău nsrôih nsan hao bah kônh wa ăp rnoi mpôl đê̆, xã Đăk Bu So mbra ơm geh tât 19 rnoh nău kan rdâk njêng ƀon lan mhe, lah xã lor bôk năp bah nkuâl Tuy Đức tât di rnoh rdâk njêng ƀon lan mhe./.

Nuĭh rblang: Điểu Thân