VOV4.M’nông: Jêh âk năm nsrŭng yor geh nau khuch bah srê Covid-19, rnôk aơ ăp ntŭk kan tăch rgâl ƀư pâl n’aih tâm Dak Lak hŏ pơk mpông gay ăp nhoat ndâk tay nau kan. Ndrel ma ƀư mhe, nkra ueh ăp ntil ndơ dôl ma ơm geh, âk ntŭk kan dôl ma joi trong hun hun hao tay ăp ntil ndơ mhe gay ma ƀư n’hao pâl n’aih tâm n’gor.

            Jêh bơi tât 8 khay nsrŭng nau kan yor nau khuch bah srê ji, ntơm bah rnôk tết năm mhe tât rnôk aơ, nau pâl n’aih nsum mpôl Ko Tam tâm nkuăl ƀon têh Buôn Ma Thuột n’gor Dak Lak hŏ pơk mpông ân năch pâl. Bah năp nê, bol ma nsrŭng vơt năch tâm 8 khay, yơn lah hôm trok prăk khay ân 20 nŭih kan ƀư nau mât chăm ka, mât njrăng ndoh ndơ, nkra ân nâp ndrel ƀư ueh ăp ngih gŭ. Ntơm rnôk pơk mpông vơt năch plơ̆ tay, ndrel nau kan ơm geh, rmôt kan lŏ ntrŭnh ƀư du đê̆ ntil ndơ mhe, ntrŭnh ƀư nau pâl n’aih ndrel kơl năch tĭng nau ŭch. Wa Nguyễn Thị Ngọc Anh, Kruanh hội đồng quản trị Công ty Cổ phần pâl n’aih sinh thái Ko Tam, mbơh:

  ‘Ko Tam ri geh âk nau mhe ngăn kơt lah mât rong, tuch tăm, cà phê, rong ka, re dak lah nsum lah âk nau kan gay ma nơm ƀư. Nau nơm rlong uănh mpeh nau ơm yau năm aơ phung hên ƀư mô geh ân ngêt ndrănh yăng, ma knŭng tur chĭng ndrel ma hyơt dơm tĭng rmôt, ntŭk rgum ƀư. Ăp nau kan ma phung hên leo tĭng nau đă bah năch, ân geh ŭch moh ndơ ri hên mra đă nŭih ƀư ân nau nê, yơn lah ân geh mang nar, mbơh lor ndrel pă ƀư yơn phung hên mô geh ƀư âk ôh”.

            Kŏ rƀŏng tât ăp ntil ndơ mhe gay ma rgum năch, Công ty TNHH ntuh kơl pâl n’ơaih ndrel tăch rgâl Đam San tâm nkuăl ƀon têh Buôn Ma Thuột lŏ săch nau pâl n’aih ndrih gay ma hun hao. Wa Lê Hoàng Cơ, Tổng Giám đốc công ty mbơh, ntơm bah ăp nau geh ơm êng ndrel ăp nau geh mhe êng mpeh neh ntu, rmôt kan dôl ma ndâk ndrel rƀŏng tât nau pâl n’aih ƀư tuch tăm, rlu n’aih đah ăp nau ueh mhe, nkre uănh pâl nkre mât chăm n’hâm soan. Nkre lah, công ty tâm rgop nsum đah ăp rmôt kan bah n’gor Dak Nông, Khánh Hoà gay ma tâm rgop nsum ăp nau kan pâl n’aih nsum kơt lah uănh tât lŏ tăm bam ŭm dak bok ueh, rlu n’aih. Wa Lê Hoàng Cơ, lah rjăp:

            ‘Ntŭk kan dôl ma rƀŏng tât nau kan pâl n’aih hun hao ndri ndrel ngăn lah ân geh nau hun hao pâl n’aih geh nsum ma lŏ mir ndrel rƀŏng trong ân năch tât aơ lah nau rlu n’aih. Rnôk aơ ndơ ơm geh bah nơm kơl an âk ngăn, kơt lah ăp ntŭk ƀư nau kan nsum ta aơ ri âk ndrel rnôk ƀư nau aơ tâm di ma rnôk ma păng lŏ geh nau tât nơih tâm nau kan ndâk nkra ndel ƀư ăp nau kan geh tât ndơ ơm bah nơm kơt lah cà phê, nơm leo năch tât ăp ntŭk ƀư tăm cà phê gay ma uănh kloh lơn mpeh cà phê kŏ kơt lah ntŭk ma păng geh ntŭk gŭ rêh ueh gay ma rlu n’aih ân geh ueh ndrel đăp mpăn lơn. Đam San dôl tâm rgop nsum tă bah Dak Nông yor lah Đam san dôl ma rƀŏng tât Buôn choá, nkuăl Krông Nô lah nkuăl tăm ba geh âk ngăn neh bazan ri păng geh nau êng ngăn rđil ma nkuăl rđŭng êng ndrel nkuăl neh êng êng”.

Tĭng nau kơp bah Sở Văn hoá-Thể Thao-pâl n’aih Dak Lak, tâm rnôk tết năm mhe mhe rlau hŏ geh nklăp 144 rbăn tơ̆ năch tât Dak Lak râng uănh, pâl m’ak, tâm 21 ntŭk pâl n’aih, hao rlau bar tơ̆ rđil rơh aơ năm e. Tĭng wa Nguyễn Thuỵ Phương Hiếu, Groi Giám đốc sở Văn hoá-Thể thao-Pâl n’aih n’gor Dak Lak, aơ lah nau ueh yor rlau 2 năm ma aơ, ntŭk kan pâl n’aih hŏ geh âk nau khuch ngăn ƀư nau kan geh jêng ndrel nau pah kan mâp âk nau jêr.

Kŏ tĭng wa Hiếu, rnôk aơ, ntŭk kan pâl n’aih dôl ma geh ăp nau ndâk tay, nkre n’hao nau kan tâm nthoi, tâm boh đah nkuăl nkre tâm rgop gay ma hun hao pâl n’aih, nkre ƀư mhe ăp nau kan pâl n’aih bah nkuăl nơm gay ma rgum năch. Ndrel ma nau kan mêt uănh nau kan đăp mpăn njrăng rdâng srê tâm ăp ntŭk ƀư nau kan pâl n’aih, ri ntŭk kan dôl ma nsôih tâm nthoi, mbơh tăch ăp ntil ndơ pla n’aih ueh geh ƀư tă bah ăp nau dăng bah nkuăl:

‘Ƀư nau kan tâm nthoi, ndâk ăp nau kan pâl n’aih mhe, geh nsum tâm puăn nkuăl ma hăn tât n’ăp ma nkuăl pâl n’aih. Tâm rnôk aơ mra ƀư ndrel đah ăp nkuăl ƀư nau kan ndâk nkra ăp nau kan pâl n’aih mhe. Mhe aơ đŏng ri phung hên geh ăp nau kan kơp uănh mpeh nau ndâk ăp ntil ndơ kan tâm nkuăl ƀon têh Buôn Ma Thuột geh tât cà phê, tuch tăm ndrel ƀon lan. Nsing tâm nau ơm geh bah ăp nkuăl gay ma tâm rnôk srê ri nsing tâm nau dôl geh ma nơm ƀư ân ăp ntŭk kan mra geh nau kan mhe kŏ kơt lah ƀư mhe nau kan bah nơm”.

Jêh âk khay uănh ndrel ndâk, du đê̆ nau kan kơt tour “Famtrip Caraval-Tây Nguyên ueh ơm”, Bôk nau kan ƀư njroh mprơ “Nau mpŏng ŭch Đam San”, ăp nau kan njroh mprơ, thể thao geh nau rlong ƀư tâm lam dak geh ntơm ƀư tâm Dak Lak geh ŭch lah mra leo jêng ngpoai tâm ăp nau ueh ndrle nau rgâl gay ma ndâk ndrel ma hun hao pâl n’aih bah n’gor. Ngăn lah, đah nau pơk luh nau kan pâl n’aih dôl ma geh ntrŭnh rnôk aơ, Dak Lak ŭch nau kan pâl n’aih mra geh ndâk ndrel geh ƀư ueh dơi leo ăp nau dăng, nau geh ơm, rƀŏng tât nkô̆ nau vơt 900 rbăn tơ năch tât Dak Lak tâm năm aơ./.

Nŭih rblang: H’Thi