Lah ngoai tâm ăp ntŭk ƀư tâm boh leo trong lor tâm nau kan pâl n’aih, tŭch tăm-sinh thái ƀon lan. Ntŭk tâm boh nau kan tuch tăm ndrel pâl n’aih Phú Nông-Buôn Đôn, nkuăl Buôn Đôn, n’gor Dak Lak hŏ nsôih tâm rgop ma ăp ntŭk kan gay ma njêng nau kan pâl n’aih nsum mpôl tâm nkuăl neh ƀon lan nơm. Đah nau geh dơi, nau dăng ndrel ntŭk ntu gŭ âm ueh, kơt: Trong pâl n’aih bri tơm rlong tâm Vườn Quốc gia Yok Đôn, dak krong Sê-rê-pôk, trong dak me, dak jăng, nglau dak, leng dak, yôk âk ntil, ndrel nau ơm ueh, ndơ sa kah bah ăp rnoi...ntŭk tâm boh nau kan nsum ndăn nau aơ gay ma hun hao pâl n’aih. Tât rnôk aơ, âk nau kan bah ăp ntŭk ƀư tâm boh hŏ geh jă bu năch tât. Yơn lah, gay ndâk ndơ pâl n’aih tĭng nau kan OCOP, ntŭk tâm boh tuch tăm ndrel pâl n’aih Phú Nông-Buôn Đôn hôm mâp âk nau jêr ơm, tâm nê nau rgum kan. Wa Trần Văn Toàn, Kruanh Hội đồng quản trị tâm boh nau kan mbơh:

            ‘Nau jêr ngăn rnôk aơ lah nau nkol tâm rnôk ntuh kơl ndrel hun hao, yor mbrơi nau rgum ăp nkuăl ƀư pâl n’aih. Kơt lah ntrơn du gưl neh tuch tăm jêng ƀư nau kan pâl n’aih mô lah ntĭm mbơh gay dŏng neh tuch tăm ƀư âk nau kan, ndri ma păng ntoch jong mông nar ri ƀư mbrơi tâm nau kan ntuh kơl ndrel hun hao nau pâl n’aih ƀon lan”.

            Tĭng nau ntrŭnh 148/QĐ-TTg năm 2023 bah Thủ tướng Chính phủ, nau kan bah rmôt ntil ndơ OCOP pâl n’aih geh ƀư kloh, rjăp, yơn mô geh nơih gay ma ndâk. Tĭng Groi Giáo sư, Tiến sĩ Trần Văn Ơn, nŭih kơl mbơh nau kan OCOP neh dak, nau jêr lah ăp ndơ aơ ân geh tâm rgop ntŭk kan. Ndri ma, bol ma Dak Lak geh âk ntŭk gay ma hun hao yơn jêr geh nau dơi, lah mô geh nau tâm rgop nsum ndrel ngăn đah ăp ntŭk kan geh tât:

            ‘Bôk nau kan du xã du ntil ndơ yor ntŭk kan tuch tăm hun hao ƀon lan ndơn nau kan, yơn ăp ntil ndơ bah păng mô knŭng lah bah ntŭk kan tuch tăm hun hao ƀon lan ma păng geh n’ăp ma ăp ntil ndơ pâl n’aih. Ndri ma mra geh dơi êng păng dơm ri ma nơm ƀư ri jêr ngăn. Ăp năm, ntŭk kan pâl n’aih kŏ ƀư âk ngăn. Lah nơm tâm boh ueh nsum ri ntil ndơ pâl n’aih ta aơ mra hun hao. Yor tâm nau ngăn hŏ geh âk đŏng ndơ ƀư nau kan pâl n’aih ma dŏng rnoh geh dơi bah ntŭk tâm Dak Lak aơ, yơn nơm uănh ndơn ê geh kloh ri ma jêr geh nau tâm boh. Lah geh nau tâm boh ri mra hun hao nkre”.

            Wa Nguyễn Hoài Dương, Giám đốc N’gâng kan tuch tăm ndrel Hun hao ƀon lan n’gor Dak Lak mbơh, lam n’gor geh 17 ƀon geh nau dơi dŏng ƀư ăp nau geh dơi nsum ma nau hun hao pâl n’aih OCOP. Yơn lah, n’gor ê geh ndâk dơi ăp ntil ndơ OCOP pâl n’aih, yor nau kan aơ knŭng geh êng dơm, mô nâp, mô âk, ngăn lah dŏng ăp ntil ndơ tă geh ơm, ê geh nau dơi ueh nâp mpeh nau ơm yau ndrel rnoh khlay bah ndơ. Dak Lak dôl nsôih bonh đă ăp nau kan, nau ntrŭnh kơl gay hun hao ntil ndơ OCOP pâl n’aih geh tâm di ma nau hun hao pâl n’aih geh dơi bah nkuăl:

            ‘Ăp ntŭk kan ân geh âk nau ƀư mbơh ntĭm gay ma ăp ntŭk kan, rmôt kan tâm boh ndrel kônh wa tâm nkuăl, ngăn lah ăp nkuăl geh nau dơi pâl n’aih saơ dơi ăp nau geh dăng ndrel ndâk ăp ntil ndơ pâl n’aih lah ndơ OCOP gay hun hao ân geh săk tam lơn ăp ntŭk geh nau dơi dăng tâm aơ”.

            Nau kan Dak Lak hun hao pâl n’aih geh nsum ma bôk nau kan OCOP mra rgop nau n’hao nau dơi pâl n’aih, leo nsĭt nau săk geh văng sa, n’hao nau geh jêng ân ƀon lan. Ntơm bah nê, kơl an ƀon lan nơm gĭt kloh lơn tâm nau mât, ndray ăp nau khlay vay ơm bah nơm./.