Rnăk wâl tâm rnăk ach o, mô tŏng neh tuch tăm, sai roh tă aơ 3 năm yor kop ji, yuh H Rung Mlô (amí Trâm) ta ƀon Ea Kjoh A, xă Ea Drông, nkuăl têh Buôn Hồ du hê mbak mât 2 hê kon dôl hăn nti. Ta năp nău rêh nĕ, yuh lĕ dơi ntop kơl du mlâm ndrôk me n’hanh du kôp bê ntil gay mât. Ndrel đah nĕ, tă bah nău nchrăp ƀư “Rŭn hao soan nơm” yuh dơi ntĭm kỹ thuật mât chăm gay mpa rong hun hao uĕh.

“Gâp dơi ntop kơl mât ndrôk n’hanh bê tĭng rnăk ach o, nău rêh dŭt jêr jŏt, mô geh trong gay hun hao wăng sa. Ri mpŏng ngăch săk soan gay ƀư sa, hun hao mât rong gay geh prăk mât rong an oh kon ngêt sa hăn nti jêng nuĭh”.

“Rŭn hao soan nơm” lah nău nchrăp ƀư tă bah rmôt kơl nuĭh njrăng n’gang ji ngot ach o lam ntŭr neh n’hanh ntop kơl ndal (CARE lam ntŭr neh) ta Việt Nam tâm rgop đah Ntŭk hun hao nsum mpôl n’hanh ăp ntŭk kan ntop kơl dôl ƀư ta Dak Lak. Tĭng nĕ, tâm 2 năm 2023-2024, nău nchrăp ƀư rƀŏng tât nău ntrôl hun hao wăng sa an rnăk wâl, ngăn lah bu ur rnoi mpôl đêt ta 2 xă Ea Drông n’hanh Cư Bao, nkual têh Buôn Hồ. Tĭng wa Vũ Lan Hương, Mât uănh nău nchrăp ƀư bah rmôt kan CARE lam ntŭr neh ta Việt Nam, nău nchrăp ƀư mbra hăn ndrel đah 4.000 nuĭh ƀon lan tĭng trong ƀư “djôt ti ntĭm kan”, bah trong ƀư ndrung wang, tâm pot ndơ sa, njrăng n’gang nuh srê an mpa rong; tât ăp nău blău tâm pă dŏng, ntêm nkrem prăk. Ntĭm ndâk njêng n’hanh mât ăp ntrong kan ntêm nkrem, rgŏ jă tơm prăk ntŭk gŭ rêh gay geh prăk manh an kônh wa. Rmôt kan ăp nău ƀư tâm mâp, gĭt ăp ntŭk kan rwăt, nkret njêng jru gay n’hao khlay ndơ. Ngai lơn tay lah ntĭm ndâk njêng ăp ndơ OCOP. Ưa Vũ Lan Hương an gĭt, tâm 2 năm, nău nchrăp ƀư geh nău rƀŏng an rgâl nău rêh an nklăp 15.000 nuĭh n’hanh rêng nău khlay âk lơn an ntŭk gŭ rêh, đah nuĭh kơl an lah bu ur rnoi mpôl đêt.

“Tâm nău nchrăp ƀư ri mpôl hên mbra geh 3 gưl nău kan khlay, bôk năp lah ăp nău ƀư geh tât n’hao dơi hun hao joi nău rêh, geh n’ăp nău geh tât kỹ thuật nkra njêng, tuch tăm, mât rong. Ntop kơl gay kônh wa dơi n’hao gĭt blău geh tât mât uănh prăk kaih n’hanh gĭt ăp tơm prăk gay rhŏ an nău nkra njêng bah khân pơng. N’hanh nău dŭt khlay gay dơi hun hao joi nău rêh nâp nâl, nĕ lah an gĭt ntŭk tăch, an dơi tăch ndơ n’hanh lôch tâm 3 nău nĕ mbra ăp nău tâm ban hăn ndrel đah ntŭk gŭ rêh gay m’hâm ƀư n’hao dơi tâm rgop đah ăp nuĭh tâm ntŭk gŭ rêh n’hanh ntrôl nău ngơi n’hanh nău ƀư tơm bah bu ur uĕh lơn tâm lĕ rngôch bah nkra njêng an tât tăch”.

Cư Bao n’hanh Ea Drông lah 2 xă pah kan lŏ mir, đah rlău 80% rnoh nuĭh ƀon lan rnoi mpôl đêt, nău rêh bah kônh wa dŭt jêr jŏt. Wa Võ Văn Sự, Kruanh jrô kan wăng sa nkual têh Buôn Hồ an gĭt, jêh hăn uănh an saơ 2 xă geh dơi mât rong ndrôk n’hanh bê. Tă bah nĕ, nău mbơh ƀư nău nchrăp kan dơi pơk luh an nuĭh ƀon lan hun hao wăng sa săk rnglăy lơn.

“Nău geh neh ntu bah Buôn Hồ lah nsum n’hanh 2 xă aơ lah êng mpeh đah trôk nar ri dŭt dơh an hun hao 2 ntil mpa aơ, Lơn lah poăch bê aƀaơ ntŭk rwăt khlay dŭt uĕh đŏng, ntŭk tăch đăp mpăn. Jêng mbơh ƀư nău kan aơ tâm di đah 2 xă aơ. Nsing nơm bôk năp mbra rgâl nău wât mpeh nău kan mât rong bah kônh wa rnoi mpôl đêt, rgop jŭt n’hŭch ach o, n’hao uĕh nău rêh bah nuĭh ƀon lan. N’hanh bah nău nchrăp ƀư aơ mbra rêng hvi ta ntŭk gŭ rêh âk lơn.