Ntơm bah ôi ơm, kônh wa bah 3 ƀon lah ƀon Pa, ƀon Năng n’hanh ƀon Hoang lĕ nchrăp ăp blah kho ao tanh rgum sĭt jay văn hóa cộng đồng ƀon Pa-ntŭk ƀư Nar tâm rnglăp têh rnoi mpôl bah ăp nkual ƀon lan gŭ xă Cư Prao, nkuăl M’Đrăk, n’gor Dak Lak. 2 đah trong hăn lah ăp n’ha cờ chăng mănh êr dôl mpăr tâm sial, nteh chĭng, nteh đơn n’gŭr răm lơ ƀư nuih n’hanh nuĭh rhơn tay. Geh măt ta jay văn hóa ƀon Pa bah ôi ơm, nô Y Li Niê, kruanh ƀon Hoang nkoch:

“Nar aơ răm hôm, 3 ƀon rgum du ntŭk saơ răm m’ak, nkre uănh njroh mprơ, chĭng gông, geh ndrănh yăng, nkre lah oh nô tâm mâp ngêt ndrănh yăng ndrel”.

Ăp nghệ nhân ƀon Pa tŭr chĭng ta nar rgum

Mhe jêh nău njroh, yuh H’Nhuyn Ksơr ta ƀon Năng, xă Cư Prao an gĭt, nar aơ rmôt njroh bah ƀon dŭt răm yor dơi njroh rhŏ an kônh wa. Uănh saơ kônh wa tŏng ăp, uănh nđôi tĭng nău njroh bah rmôt, nău răm dơi ntop tay:

“Nar aơ mpôl oh njroh nău oh uĕh kơt nkao blang, mpŏng jêh njroh bai aơ gay he nkah gĭt tât nău way ơm bah nuĭh Ê đê bah he gay nkoch mro let bah kơt tay”.

 Tĭng nô Y Linh Niê, Groi Kruanh Mặt trận Tổ quốc Việt Nam xă Cư Prao, ƀon Pa, ƀon Năng n’hanh ƀon Hoang geh 346 rnăk đah 1.440 nuĭh. 3 ƀon geh 5 rnoi mpôl tâm rnăk wâl ăp rnoi mpôl Việt Nam gŭ rêh ndrel, tâm nĕ rnoi Ê đê geh 90%. Ăp năm, tâm Nar tâm rnglăp têh rnoi mpôl, n’gâng kan xă ƀư nău kan mbah rhơn ta ăp ƀon, yơn lah, năm aơ Ủy ban xă lĕ an ƀư ăp nkual ƀon lan gŭ gay rdâk hao nuih n’hâm tâm rnglăp bah ăp rnoi mpôl ta ntŭk. Nkre nta an kônh wa dơi tâm nđŭr văn hóa:

“Nar 18/11 ăp năm way ƀư gưl lễ, gưl hội ta ăp nkual ƀon lan gŭ. Ăp năm tĭng nău way tŭr chĭng jêh nĕ ngêt ndrănh yăng, njroh mprơ. Nkual ƀon lan gŭ dŭt rhơn, răm m’ak”.

Râng Nar rgum tâm rnglăp têh lam rnoi mpôl ta ăp nkual bah xă Cư Prao, nkuăl M’Đrăk, wa Y Biêr Niê, Groi Bí thư n’gor ủy Dak Lak an gĭt, aƀaơ, ta âk ƀon lan ta lam n’gor Dak Lak dôl ƀư âk nău kan văn hóa, njroh mprơ mbah rhơn 92 năm Nar tâm rnglăp têh lam rnoi mpôl (18/11/1930-18/11/2022). Nău ƀư aơ lĕ jêng Nar rgum têh bah nsum mpôl ƀon lan đah âk nău ƀư uĕh, âk ntil văn hóa way ơm bah rnăk wâl nsum ăp rnoi mpôl Việt Nam rgop n’hao ndâk njêng tâm rnglăp lĕ rnoi mpôl:

“Nău rƀŏng bah nar rgum gay kônh wa mât uănh ăp nău uĕh bah rnoi mpôl n’hanh tâm rgâl, nti nsơm ăp nău uĕh. Tĭng nkô̆ nău nĕ dơi tâm rgop du đêt nău kơl, nău ntrŭnh mhe gay nkoch trêng ntĭm nti an kônh wa wât tay, bah nĕ khân pơng tĭng nău rêh bah nsum mpôl đah pháp luật bah ngih dak gay ndâk njêng ƀon tơm nar lơ uĕh lơn”.

Nuĭh ƀon lan 3 ƀon n’hanh ăp đại biểu hăn râng Nar rgum ngêt ndrănh yăng ndrel.

Tâm ăp nar bah năp, lĕ rngôch ăp ƀon lan bah n’gor Dak Lak lĕ ƀư Nar rgum tâm rnglăp têh rnoi mpôl, đah tât râng bah kruanh gưl ủy, n’gâng kan ƀon lan. Ntoh lư, ta ăp nkual rkŭm mrô 5, xă Ea Bar, nkuăl Buôn Đôn lap dơi wơt ăp đồng chí Phạm Minh Tấn, Groi bí thư rnâng kan N’gor ủy, Y Giang Gry Niê Knơng, tỉnh ủy viên, Kruanh Ủy ban MTTQ Việt Nam n’gor, n’hanh kruanh ăp n’gâng kan, nău kan, gưl ủy, n’gâng kan ƀon lan. Ntoh ngơi ta aơ, wa Phạm Minh Tấn, Groi Bí thư rnâng kan N’gor ủy Dak Lak kơp dơn n’hanh rnê ăp nău rgop bah nuĭh ƀon lan ăp nkual ƀon lan gŭ rkŭm mrô 5 ƀư tĭng ăp ntrong leo tâm rlong rŏng dak, kơt ăp nău rgŏ jă tă bah gưl ủy, n’gâng kan ƀon lan, Mặt trận Tổ quốc n’hanh ăp nsum mpôl rgŏ jă tâm năm bah năp. Nkre mpŏng gưl ủy, n’gâng kan ƀon lan, Mặt trận Tổ quốc, ăp nsum mpôl n’hanh nuĭh ƀon lan 5 thôn mât uĕh tay nuih n’hâm tâm rnglăp, rlet rlău jêr jŏt, ntŭl rlong gay hun hao nkra njêng, ndâk njêng nkual ƀon lan gŭ hun hao, nău rêh nuĭh ƀon lan nar lơ hơm răm, uĕh lăng./.