Têh tâm ntŭk cà phê, bên rhêp ƀô nkah cà phê mê̆ wâr ta ŭnh n’hanh ngêt ka chok cà phê kah way ơm, Y Pốt Niê (ndeh năm 1988), ƀon Kla, xă Dray Sáp, nkuăl Krông Ana, n’gor Dak Lak mât nău ŭch nkret wâr cà phê, n’hao rnoh khlay ntil tơm tăm aơ. Jêh 3 năm ndâk njêng đah ndơ moh “Êđê Café”, Y Pốt lĕ ndơ̆ ndơ bah nơm tât đah ntŭk tăch lam dak n’hanh tăch n’gluh an âk dak ta lam ntŭr neh.

Năch bah Nhật Bản tât khâl ntŭk nkra njêng bah Êđê Café

Pah kan tâm nău kan dak si bah năm 2014, bôl gŭ ta Nkual ƀon têh HCM mô lah sĭt Dak Lak, bu klô ndăm Y Pốt Niê hôm e rvê đah nău ƀô kah cà phê wâr êng bah rnăk wâl. Khay 8 năm 2019, Y Pốt ntrŭnh ntlơi kan dak si, rdâk njêng đah cà phê. Nô ndâk njêng Công ty TNHH Êđê Cafe n’hanh dơi Cục Sở hữu trí tuệ dăn ntô lĭr êng. Jêh 3 ndâk njêng, ndơ moh “Êđê Café” dơi ntŭk tăch tâm dak n’hanh dak bah dih wơt dơn; dơi n’gâng kan ƀon lan kơp dơn ndơ OCOP 4 sao. Rblang mpeh săk moh công ty lah Êđê Cafa, Y Pốt Niê an gĭt:

Lah mpeh nuĭh Êđê he ri dŭt đêt nuĭh Êđê tăch rgâl, gâp ŭch nuĭh hăn lor mpeh tăch rgâl, tal 2 tay ŭch djôt tât nău lư bah nuĭh Êđê, ŭch an saơ nuĭh Êđê dơi ƀư đŏng ăp ntil n’hanh lơn lah nuĭh Êđê dơi djôt tât ndơ di bah nơm an lam ntŭr neh gĭt tât. Tât nar aơ gâp lĕ dơi saơ nău nĕ n’hanh nar lơ âk nuĭh gĭt tât đah Ê đê Cafe.

Y Pốt ƀa ƀơ djôt ndơ bah nơm mpla nsơ ta ăp rgum mpla tăch ndơ-Mpla nsơ rgum tăch rgâl dơi ƀư ta Quảng Ninh

Gay tŏng ndơ nkret wâr cà phê môi, Y Pốt tâm rgop rwăt cà phê bah nuĭh ƀon lan ta ntŭk đah rnoh khlay lơn ntŭk tăch 10.000 prăk/kg rlăi. Ndrel đah nĕ, nô ntop kơl ntil sầu riêng, bơ an kônh wa tăm srah, rgŏ jă kônh wa rgâl trong tăm hữu cơ. Tât aƀaơ, công ty nô lĕ geh nkual tăm rlău 50 ha cà phê. Công ty nta an nău kan đăp mpăn an âk nuĭh Êđê pah kan, đah rnoh prăk khay bah 12-20 rkeh prăk du khay. Wa Y Phen Niê, Kruanh hôị nông dân xă Dray Sáp, an gĭt, bah trong ƀư bah Y Pốt, bah nău mĭn ƀư lŏ mir bah nuĭh ƀon lan rgâl nău mĭn, nău rêh nar lơ sâm geh âk lơn:

Y Pốt Niê đah ndơ moh Êđê Café

Ntrong kan tĭng rmôt tâm rgop bah Công ty Êđê Cafe dŭt âk nuĭh ƀon lan dơi râng nti nsơm ndrel. Bah ntŭk nĕ lĕ nsĭt tay âk wăng sa n’hanh nău geh bah tơm cà phê nsĭt săk rnglăy n’hanh nău rgop nĕ nta an nău hun hao bah ƀon lan dŭt âk”.

 Rlău ma ndơ cà phê môi, Y Pốt mĭn joi, nkra njêng âk ntil ndơ n’hanh geh nău êng an ndơ bah nơm. Aƀaơ, nô lĕ an luh ntil ndơ cà phê tâm rgop đah ăp ntil bum play n’hanh dơi âk nuĭh ŭch. Nô nsrôih râng ăp mpla nsơ, rgum tăch ndơ n’hanh nău ƀư mpeh lŏ mir hữu cơ, nkoch ndơ ta ăp trong trực tuyến, mạng xã hội... gay mĭn joi ntŭk tăch. Âk ntŭk kan lĕ tât ntŭk gay mĭn joi n’hanh kan ndrel tăch rgâl. Nô Vũ Trường Sinh, Giám đốc Công ty Logicstic Tân Phát Địa, bah Đồng Nai tât tâm rgop tăch rgâl ta Công ty Êđê Café, nkoch:

Rlău 2 nar gĭt saơ ta aơ n’hanh ƀư n’hêl na nê̆ ta nông trường an tât nkra njêng gâp saơ ndơ dŭt uĕh. Jêng mpŏng ŭch mpeh đah gâp n’hanh Êđê Cafe kan ndrel tâm năm tât, gâp mbra geh du trong kan ndơ̆ ăp ndơ luh dak bah dih.

Y Pốt Niê dơi an ndơ nkhôm ƀon lan nkra njêng blău năm 2022

Dơi gĭt tăng cà phê, Y Pốt nsĭt geh săk rnglăy. Năm 2020, Công ty Êđê Cafe dơi Viện Nghiên cứu doanh nghiệp jêt n’hanh dah găp an sam ƀŭt kơp dơn “Top 10-ndơ moh ntô lĭr nsing nơm 3 nkual, ndơ tăch rgâl uĕh kah âk”. Năm 2021, cà phê Robusta bah Công ty Êđê Café dơi kơp dơn “Ndơ lŏ mir thôn ƀon ntoh lư gưl n’gor”, ndơ OCOP 3 sao bah Dak Lak. Mhe aơ, Y Pốt Niê lah ngoăy tâm âk “Nuĭh ƀon lan Việt Nam blău ngăn năm 2022” yor Trung ương Hội nông dân Việt Nam rnê nkhôm. Lah mpeh trong hăn bah năp, Y Pốt nkoch:

Nău bôk năp nkual tăm lah dŭt têh n’hanh lĕ lam xă Dray Sáp n’hanh nkuăl Krông Ana mbra ƀư tĭng n’hanh boăt nthoi bah Êđê Café. Nău mpŏng kâp têh ngăn bah Êđê Café djôt tât ndơ khlay ngăn, ndơ di ngăn an lam ntŭr neh dơi gĭt tât”.

Đah nău ŭch n’hanh nsrôih mô rlu, Y Pốt Niê lĕ djôt ƀô kah cà phê tâm di bah nuĭh rnoi nơm hăn ngai.