VOV4.M’nông: Bôk nău kan du xă du ndơ (kuăl lah bôk nău kan OCOP) ta Dak Lak dôl geh nău hun hao dăng. Nar lơ âk ndơ OCOP geh kơp dơn 3-4 sao. Nău aơ pơk luh dơi hun hao ndơ lŏ mir ta ntŭk, hun hao wăng sa nkual ƀon lan tĭng trong hao khlay ndơ lŏ mir

Lah ntŭk geh ndơ mắc ca grăp dơi geh kơp dơn ndơ OCOP 4 sao gưl n’gor, Công ty Cổ phần Damaca Nguyên Phương ta xă Phú Lộc, nkuăl Krông Năng dôl nsrôih rgâl mhe trong nkra njêng, công nghệ uĕh mhe, ntô lĭr ndơ râng uănh lah ndơ OCOP gưl ngih dak. Wa Phạm Đình Nhân, Kruanh jrô kan Maketing Công ty cổ phần Damaca Nguyên Phương an gĭt: bah rnôk ndơ dơi kơp dơn n’hanh dŏng ntô lĭr OCOP lĕ geh nsing nơm đah nuĭh dŏng, ndơ lăp ăp siêu thị, ntŭk tâm pă tăch dơh lơn. Rnoh ndơ tăch nar lơ hao. Êng năm 2021, bôl khuch bah srê Covid-19 yơn công ty lĕ ndơ̆ an ntŭk tăch nklăp 70 tấn grăp mắc ca.

“Jêh rnôk geh kơp dơn OCOP 4 sao, công ty mô rlu hao uĕh ndơ, ntô lĭr dŭng an rgâl uĕh gay tâm di đah rnoh ndơ bah OCOP. Rlău ma nĕ mpôl hên hôm ndâk ƀư ntŭk êng nkra n’hao săk geh nkra njêng gay râng OCOP 5 sao gưl ngih dak rƀŏng tât ăp sam ƀŭt nchăm rwăt ndơ tâm dak n’hanh tăch n’gluh”.

Ntŭk nkret njêng mắc ca bah Công ty Cổ phần Damaca Nguyên Phương

Gĭt năl na nê̆ săk rnglăy bah bôk nău kan du xă du ndơ mô geh êng nuĭh lah ƀon lan-ăp nuĭh tơm râng bôk nău kan. An saơ na nê̆ ngăn lah ndơ phe kloh uĕh HTB bah hợp tác xã tăch rgâl ăp ntil ndơ lŏ mir Thăng Bình, xă Cư Kty, nkuăl Krông Bông. Bah rnôk dơi kơp dơn ndơ OCOP 3 sao, rnoh khlay phe lĕ hao rlău 2 tơ̆ nkôp đah bah năp, rnoh ndơ tăch hao bah 200 tấn hao 400 tấn du năm, nsĭt tay nău geh đah âk ntil an hợp tác xã kơt ăp nuĭh râng. Wa Võ Văn Sơn, Kruanh Hợp tác xã tăch rgâl ndơ lŏ mir Thăng Bình nkoch:

“Bah năp đaơ ndơ bah gâp mô dơi ntŭk tăch uănh lah prêh aƀaơ lĕ dơi geh kơp dơn OCOP ri na nê̆ khlay ndơ hao âk bah rnoh khlay, bah jâng nsan ndơ nuĭh ƀon lan dơi geh âk ndơ lơn, đăp mpăn dŭt âk. Ntŭk tăch rwăt tâm n’gor, bah dih n’gor n’ăp dak bah dih”.

Nuĭh kan bah Hợp tác xã tăch rgâl ăp ntil ndơ lŏ mir Thăng Bình uănh nđôi ndrĭch tuch tăm lor yan rek mhe

Tĭng N’gâng kan tuch tăm mât rong n’hanh hun hao ƀon lan n’gor Dak Lak, tât aƀaơ, lam n’gor lĕ geh 72 ndơ dơi kơp dơn ndơ OCOP gưl n’gor. Tâm nĕ 8 ndơ geh 4 sao, dŭt âk lah cà phê, ca cao, mắc ca. Ăp ndơ aơ dôl dơi ntuh kơl n’hao uĕh tay rƀŏng tât geh 5 sao gưl ngih dak, n’hao dơi râng lăp ntŭk tăch lam ntŭr neh. Wa Dương Tín Đức, Chánh Văn phòng tâm pă ƀĭt joet bôk nău kan ƀon lan mhe n’gor Dak Lak an gĭt:

“Mpôl hên mbra nsrôih đah nău ntop kơl bah ngih dak mbra n’hao prêh ăp ndơ bah 3 tât 4 sao, bah 4 sao hao 5 sao gay dơi geh ăp nău tâm di uĕh ngăn ri rnôk nĕ mbra boăt nthoi ăp ndơ nkual neh lah nău ntrŭt ngăch tăch rgâl. Lah ndơ 3 sào ri ăp siêu thị, ăp ntŭk tăch ndơ mbra ŭch dơn, 4 sao dơi hăn lam dak n’hanh 5 sao dơi hăn đêt ngăn 45 dak bôk nău kan OCOP aơ”. Đah ăp nău geh, dơh nơih đah ăp ndơ lŏ mir, ƀư i ty, n’gor Dak Lak dôl nsrôih ƀư lôch jêh bôk nău kan OCOP gay hun hao wăng sa nkual ƀon lan, rgâl dăp tay nkra njêng lŏ mir, ƀư tĭng săk rnglăy nău rƀŏng ndâk njêng ƀon lan mhe, n’hao nău rêh nuĭh ƀon lan./.

          Nuĭh rblang: Y Sưng Phê Ja